ខេត្តកំពង់ចាម ៖ ទោះបីជាមានការហាមមិនឲ្យមានការនាំចូលជ្រូករស់ពីប្រទេសវៀតណាម ដោយសារព្រួយបារម្ភពីការផ្ទុះជំងឺប៉េស្តជ្រូកអាហ្វ្រិក ដែលជាជំងឺមួយមិនមានថ្នាំព្យាបាលនៅឡើយ ហើយមេរោគនេះនឹងឆ្លងយ៉ាងរហ័សទៅជ្រូកផ្សេងៗនឹងត្រូវងាប់បន្តបន្ទាប់យ៉ាងណាក្តី ក៏ក្រុមឈ្មួញនៅតែបំពានដោយប្រើប្រាស់មធ្យោបាយគ្រប់បែបយ៉ាងដឹកចូលមកកម្ពុជា ហើយក៏ត្រូវបានស្ថាប័នជំនាញសហការជាមួយសមត្ថកិច្ចបង្ក្រាបបានហូរហែ ។ ជាក់ស្តែង គ្រាន់តែនៅថ្ងៃទី១៤ ឧសភា រហូតមកដល់ព្រឹកថ្ងៃទី១៥ ឧសភា ជ្រូកចំនួន៣៤ក្បាល ត្រូវបានបង្ក្រាបទាន់ពេលវេលា ។
លោក នង ម៉េងហ៊ាង ប្រធានការិយាល័យផលិតកម្មនិងបសុព្យាបាលខេត្តឲ្យដឹងថា ដោយមានការណែនាំពីលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទក៏ដូចជាលោក គួច ចំរើន អភិបាលនៃគណៈអភិបាលខេត្ត និងប្រធានមន្ទីរកសិកម្មខេត្ត បានឲ្យស្ថាប័នជំនាញរបស់លោកត្រូវចេញបំពេញបេសកកម្មនៅតាមដងផ្លូវនានាក្នុងខេត្ត ដើម្បីទប់ស្កាត់មិនឲ្យមានលំហូរជ្រូកនាំចូលមកពីប្រទេសវៀតណាមកាត់តាមខេត្តត្បូងឃ្មុំ ចូលមកក្រុងកំពង់ចាមបានឡើយ ។
លោក នង ម៉េងហ៊ាង ប្រធានការិយាល័យបសុព្យាបាលខេត្តប្រាប់បន្តថា រហូតមកដល់វេលាម៉ោង៤និង៣០នាទីយប់ទៀបភ្លឺឈានចូលព្រឹកថ្ងៃទី១៥ ឧសភា ត្រង់ចំណុចភូមិអណ្តូងស្វាយ ឃុំវិហារធំ ស្រុកកំពង់សៀម មានរថយន្តតួរីស១គ្រឿង មិនមានពាក់ស្លាកលេខ ដឹកជ្រូកចំនួន១៧ក្បាល ចេញមកពីប្រទេសវៀតណាមកាត់តាមខេត្តត្បូងឃ្មុំ និងត្រូវបានបង្ក្រាបនិងដឹងថាម្ចាស់ជ្រូកនៅខេត្តត្បូងឃ្មុំ ។
ជ្រូកនិងរថយន្តត្រូវបានដកហូតហើយនៅថ្ងៃទី១៦ ឧសភា មន្ត្រីរបស់លោកនឹងបូមយកឈាមជ្រូកដើម្បីទៅពិនិត្យនៅវិទ្យាស្ថានស្រាវជ្រាវបសុព្យាបាលនៃអគ្គនាយកដ្ឋានសុខភាពសត្វនិងផលិតកម្មសត្វ ។ ជាមួយគ្នានេះ មន្ត្រីកំពុងតែបំពេញបែបបទផ្ញើទៅរដ្ឋមន្ត្រីក្រសួងកសិកម្ម ដើម្បីសុំគោលការណ៍ផាកពិន័យរថយន្តដឹកជ្រូកនេះចំនួន១០ទៅ១៥លានរៀលតាមផ្លូវច្បាប់ផងដែរ ។ ក្រុមមន្ត្រីក៏បានឱ្យដឹងដែរថា សម្រាប់ករណីបង្ក្រាបមុនៗតាមរយៈការធ្វើតេស្តឈាមមិនឃើញមានមេរោគប៉េស្តជ្រូកអាហ្វ្រិកនោះទេ ។
លោក រី ដាវិន ប្រធានការិយាល័យបសុព្យបាលខេត្តត្បូងឃ្មុំ ប្រាប់ឲ្យដឹងដែរថា នៅរសៀលថ្ងៃទី១៤ ឧសភា ២០១៩ មន្ត្រីរបស់លោកបង្ក្រាបបានជ្រូកចំនួន៦ក្បាល នៅថ្នល់ទទឹង ឃុំជប់ ស្រុកត្បូងឃ្មុំ និងបន្តចាប់ជ្រូកចំនួន១១ក្បាលទៀត នៅក្នុងទីសត្តឃាតស្រុកអូររាំងឪ រថយន្តសាំយ៉ុងដឹកជ្រូកចំនួន១៧ក្បាល បានដឹកចេញមកពីវៀតណាមដោយលួចលាក់ ហើយបានបើកកាត់តាមស្ពានមាត់ឃ្មង់ ឆ្លងស្ពានគីហ្សុ៊ណា ចូលក្រុងកំពង់ចាម ហើយកម្លាំងរបស់លោកដែលតាមប្រមាញ់ក៏បានឲ្យពេទ្យសត្វខេត្តកំពង់ចាម ចាប់បានទាន់ពេលវេលា ៕
ចែករំលែកព័តមាននេះ