ខេត្តកំពង់ឆ្នាំង ៖ សាឡាងចម្លងដទទឹងរបស់ក្រុមហ៊ុនអាជីវកម្មដទទឹង ពីទីរួមខេត្តកំពង់ឆ្នាំងទៅស្រុកកំពង់លែង មានការមមារញឹកដឹកចម្លងអ្នកដំណើរជាខ្លាំង ក្នុងនោះរថយន្តជាច្រើនគ្រឿងត្រូវបានដឹកឆ្លងកាត់តាមកំពង់ចម្លងមួយនេះដែរ ដើម្បីបានធ្វើដំណើរផ្លូវកាត់ពីខេត្តកំពង់ឆ្នាំង ទៅខេត្តកំពង់ធំ និងពីខេត្តកំពង់ធំ មកខេត្តកំពង់ឆ្នាំង ។
ទន្ទឹមនឹងនេះ ក៏មានម្ចាស់រថយន្តដែលធ្វើដំណើរឆ្លងកាត់តាមកំពង់ចម្លងខាងលើ សំណូមពរឱ្យម្ចាស់អាជីវកម្មបញ្ចុះតម្លៃថែមទៀត ។ ម្ចាស់រថយន្តទាំងនោះនិយាយថា សព្វថ្ងៃនេះរថយន្តជាលក្ខណៈគ្រួសារមួយគ្រឿងថ្លៃ២៨.០០០រៀល ឬស្មើនឹង៧ដុល្លារ ពួកគាត់សំណូមពរឱ្យមានការបញ្ចុះថ្លៃជាងនេះបន្តិចត្រឹមតែ២ម៉ឺនរៀល ឬស្មើនឹង៥ដុល្លារបានហើយ ។
ពួកគាត់លើកឡើងថា ចម្ងាយផ្លូវពីទីរួមខេត្តកំពង់ឆ្នាំង ទៅស្រុកកំពង់លែងកាន់តែខិតជិតណាស់ដែរ ព្រោះដោយសារក្រសួងសារធារណការបានជីកព្រែកកាត់២កន្លែង ដើម្បីធ្វើជាផ្លូវទឹកកាត់ត្រង់ឱ្យការធ្វើដំណើរបានឆាប់រហ័ស ចំណេញពេលវេលា ហើយក៏លែងធ្វើដំណើរតាមផ្លូវវាងដូចមុនទៀតដែរ ដោយហេតុនេះហើយពួកគាត់សំណូមពរឱ្យចុះថ្លៃជាងនេះបន្តិច។
ជុំវិញការទាមទារចុះថ្លៃនេះដែរ ម្ចាស់ដចម្លងលោក ប៊ុន ណាវឌ្ឍន៍ បានប្រាប់ឱ្យដឹង កាលពីរសៀលថ្ងៃទី១៤ ខែឧសភាថា កាលចាប់ផ្តើមមុនដំបូងរថយន្តមួយគ្រឿង យកថ្លៃរហូតដល់៥០ដុល្លារឯណោះ ។ ប៉ុន្តែក្រោយមក មានផ្លូវកាត់ ដែលជីកដោយក្រសួងសារធាណការនិងដឹកជញ្ជូន គួបផ្សំនឹងសំណួមពរផង មន្ទីរសេដ្ឋកិច្ចនិងហិរញ្ញវត្ថុ បានកំណត់ឱ្យយកត្រឹម៦ម៉ឺនរៀល ក្នុងរថយន្តលក្ខណៈគ្រួសារមួយគ្រឿង ។
ក្រោយមកទៀត ក៏មានសំណួមពរពីប្រជាពលរដ្ឋជាថ្មី ឱ្យបញ្ចុះតម្លៃជាថ្មីទៀត ទើបខាងមន្ទីរសេដ្ឋកិច្ចនិងហិរញ្ញវត្ថុកំណត់ឱ្យចុះថ្លៃដល់ទៅ២៨.០០០រៀល ស្មើនឹង៧ដុល្លារ ហើយក្រុមហ៊ុនរបស់លោកក៏យល់ព្រមតាម ។ ពេលនេះ ចង់បញ្ចុះថ្លៃជាងនេះទៀតមិនអាចទៅរួចទេ ណាថ្លៃប្រេង ថ្លៃកម្មករ គឺច្រើនមិនអាចចុះថ្លៃបានឡើយ។
លោក បុ៊ន ណាវឌ្ឍន៍ បញ្ជាក់ថា កាលមុនបានកំណត់ពេលវេលាចេញដំណើរមួយថ្ងៃ៨ជើងដោយ៤ជើងទៅ៤ជើងមក ។ ប៉ុន្តែសព្វថ្ងៃមានអ្នកធ្វើដំណើរច្រើន ទើបក្រុមហ៊ុនរបស់លោកដឹកជញ្ជូនគ្មានកំណត់ម៉ោងពេលទេ ពេញគឺចេញដើម្បីឱ្យទាន់ការធ្វើដំណើររបស់បងប្អូន ។ ម្យ៉ាងវិញទៀត បានកំណត់បិទការដឹកជញ្ជូននៅម៉ោង៦ល្ងាច ប៉ុន្តែដល់ម៉ោងនេះបើនៅមានអ្នកធ្វើដំណើរច្រើនក៏ត្រូវដឹកជញ្ជូនជូនពួកគាត់ដែរ ។
ទោះជាយ៉ាងនេះក្តី ប្រជាពលរដ្ឋនៅតែស្នើសុំឱ្យអាជ្ញាធរខេត្ត និងមន្ត្រីជំនាញជួយបញ្ចុះថ្លៃត្រឹម៥ដុល្លារឬស្មើនឹង២ម៉ឺនរៀលបានហើយ ។ ចំណែកថ្លៃមនុស្សម្នាក់១ពាន់រៀល ម៉ូតូ១គ្រឿង ថ្លៃ១.៥០០រៀល គឺមិនមានបញ្ហាទេ ។
គួររំឭកថា កាលពីពេលថ្មីៗនេះ ក្នុងការបើក ពិធីបុណ្យទន្លេនៅខេត្តកំពង់ឆ្នាំង សម្តេចតេជោនាយករដ្ឋមន្ត្រី បានសម្រេចឱ្យធ្វើស្ពាននិងផ្លូវ ឆ្លងកាត់ពីទីរួមខេត្តកំពង់ឆ្នាំងទៅខេត្តកំពង់ធំហើយ ។ គម្រោងនេះនឹងចាប់ផ្តើមនៅចុងឆ្នាំ២០១៩ខាងមុខនេះ ហើយយ៉ាងយូរ៥ឆ្នាំខាង មុខទៀត កម្ពុជានឹងមានស្ពានវែងជាងគេនៅក្នុងប្រទេស ដែលដល់ពេលនោះអ្នកស្រុកកំពង់លែងក៏ដូចជាប្រជាពលរដ្ឋទូទៅលែងលំបាកដូចសព្វថ្ងៃទៀតហើយ ៕
ចែករំលែកព័តមាននេះ