រាជធានីភ្នំពេញ ៖ មកទល់ពេលនេះ ព្រឹត្តិការណ៍ស៊ីហ្គេមដែលកម្ពុជាគ្រោងធ្វើនៅឆ្នាំ២០២៣កាន់តែកៀកជិតដល់ហើយ ឯសហព័ន្ធកីឡាកាយសម្ព័ន្ធបានអះអាងថា ខ្លួនក៏កំពុងពង្រឹងកម្លាំងយ៉ាងសកម្មដើម្បីធ្វើឱ្យសហព័ន្ធរបស់ខ្លួនមានឱកាសដណ្ដើមបានមេដាយ ។ យ៉ាងណាមិញ មន្ត្រីទទួលបន្ទុកបានអះអាងថា ដើម្បីអាចឱ្យសហព័ន្ធទទួលបានជោគជ័យ គឺលុះត្រាមានការជ្រោមជ្រែងពីម្ចាស់ក្រុមហ៊ុន និងវិស័យឯកជនបន្ថែម ទើបអាចឱ្យសហព័ន្ធសម្រេចផែនការទៅបាន។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានអះអាងថាសហព័ន្ធទាំងមូលបានត្រៀមខ្លួនច្រើនណាស់មិនមែនស្ងាត់ទេ ដោយត្រូវពង្រឹងទាំងកីឡាករ និងក្រុមគ្រូបង្វឹក ។ លោកថា សហព័ន្ធក្រៅពីបានបញ្ជូនកីឡាករទៅហ្វឹកហាត់ពង្រឹងសមត្ថភាពនៅប្រទេសចិនរយៈពេល៤ខែកន្លងមក ក៏បានបញ្ជូនឱ្យទៅហ្វឹកហាត់នៅក្នុងប្រទេសជាដៃគូផ្សេងទៀតមិនសូវដាច់នោះផង ។ កីឡាកាយសម្ព័ន្ធ មិនបានធ្វេសប្រហែសសម្រាប់ព្រឹត្តិការណ៍ស៊ីហ្គេមនៅពេលខាងមុខ និងស៊ីហ្គេមរបស់កម្ពុជានៅឆ្នាំ២០២៣នោះទេ គឺកាន់តែបានពង្រឹងសមត្ថភាពខ្លាំងឡើងដើម្បីកេរ្តិ៍ឈ្មោះ។
ជាក់ស្ដែង សហព័ន្ធបានបញ្ជូនកីឡាករដែលមានសមត្ថភាពទៅចូលរួមប្រកួតស៊ីហ្គេមមិនដែលដាច់ទេ ដើម្បីទៅដកស្រង់យកបទពិសោធន៍ពីការប្រកួតអន្តរជាតិ យកមកបណ្ដុះបណ្ដាលដល់កីឡាករនៅក្នុងប្រទេស ។ លោកថា នៅក្នុងព្រឹត្តិការណ៍កីឡាជាតិ២លើកកន្លងមក សហព័ន្ធជម្រើសបានជើងខ្លាំងក្មេងៗ
កាន់តែច្រើន តែមិនទាន់ច្បាស់ថាពួកគេនឹងក្លាយជាទ័ពស្រួចសម្រាប់ការប្រកួតស៊ីហ្គេមក្នុងឆ្នាំ២០២៣របស់កម្ពុជានោះទេ តែមានន័យថា សហព័ន្ធខ្លួនឯងមានការបម្រុងទុកច្បាស់លាស់។
លោកបន្តថា សហព័ន្ធកំពុងបង្កើនការហ្វឹកហាត់កីឡាករកីឡាការិនីក្មេងៗជារៀងរាល់ថ្ងៃ ដើម្បីឱ្យសមាសភាពកីឡាករទាំងនោះ អាចចូលប្រកួតបានកាន់តែល្អ ហើយអាចក្លាយជាធនធានពិតប្រាកដរបស់កម្ពុជាសម្រាប់ព្រឹត្តិការណ៍ស៊ីហ្គេមក្នុងឆ្នាំ២០២៣។
ជាមួយនឹងការអះអាងពីការត្រៀមខ្លួន លោក ណយ ផាណា ក៏បង្ហាញពីក្ដីបារម្ភផងដែរ ដោយសារតែសហព័ន្ធរបស់លោក ហាក់ខ្វះការជ្រោមជ្រែងពីវិស័យឯកជន នៅពេលសហព័ន្ធគិតគូរពីការបញ្ជូនកីឡាករឱ្យចេញប្រកួត ឬបើកការប្រកួត ដើម្បីលើកទឹកចិត្តដល់កីឡាករនានាជាដើម គឺពិបាកធ្វើឱ្យសហព័ន្ធសម្រេចគោលដៅ ។ ក្នុងនោះសូម្បីតែប្រាក់រង្វាន់លើកទឹកចិត្តកីឡាករ ឬការចំណាយលើការរៀបចំផ្សេងៗ ក៏សហព័ន្ធទាំងមូលរមែងខ្វះការជ្រោមជ្រែងពីវិស័យឯកជននោះដែរ។
លោកទទូចឱ្យមានការជ្រោមជ្រែងពីវិស័យនានា ជាពិសេសគឺវិស័យឯកជនប្រសិនបើមានការឧបត្ថម្ភគាំទ្រពេញទំហឹងដល់សហព័ន្ធ គឺកីឡាករ-កីឡាការិនីនឹងរឹតតែមានកម្លាំងចិត្តក្នុងការពង្រឹងសមត្ថភាព ។ លោកថា សហ័ន្ធកីឡាមួយ មិនអាចទៅមុខដោយរលូនបានទេ បើពឹងតែលើក្រសួង និងគណៈកមា្មធិការអូឡាំពិក ហើយគ្មានការចូលរួមលើកស្ទួយពីវិស័យឯកជន។ លោកឧទាហរណ៍យ៉ាងខ្លីថា ប្រសិនបើការប្រកួតមួយដែលសហព័ន្ធបានរៀបចំឡើង មានក្រុមហ៊ុនធំៗភាគច្រើនចូលរួមឧបត្ថម្ភច្បាស់ណាស់ថានឹងធ្វើឱ្យសហព័ន្ធមានលទ្ធភាពគ្រប់គ្រាន់ ជាពិសេសលើការបណ្ដុះបណ្ដាលគ្រូបង្វឹក លើការអញ្ជើញអ្នកមានសមត្ថភាពឱ្យមកបង្វឹក ការបញ្ជូនកីឡាករចេញ និងការប៉ះប៉ូវលើកទឹកចិត្តកីឡាករដែលបានសម្រាំងហើយឱ្យមានបម្រុងប្រយ័ត្ន ។
លោកបានប្រកាសថា កម្ពុជានឹងពិបាកធ្វើឱ្យកីឡាមួយនេះលេចធ្លោ ដោយសារតែធនធានកាយសម្ព័ន្ធ ដែលសហព័ន្ធបានសម្រាំងទុក ភាគច្រើនមិនសូវនៅស្ថិតស្ថេរជាមួយសហព័ន្ធ ដែលបញ្ហានេះគឺបណ្ដាលមកពីខ្វះការជ្រោមជ្រែងពីវិស័យឯកជន។ លោកថា កីឡាកររមែងត្រូវបានបម្រុងទុកជាប្រចាំ ប៉ុន្តែដោយសារតែសហព័ន្ធមានត្រឹមតែសមត្ថភាពបញ្ជូនកីឡាករតែម្នាក់ ឬ២នាក់ឱ្យចេញប្រកួត ឬចេញហ្វឹកហាត់នៅក្រៅ ប្រទេស ដូច្នេះវាជៀសមិនផុតនោះទេដែលធនធានកីឡាករបម្រុងទុកផ្សេងទៀតដែលសហព័ន្ធមិនសូវមានសកម្មភាពឱ្យចេញ គឺពិតជាបោះបង់អាជីព ។
លោកថា សហព័ន្ធរកបានធនធានកីឡាករក្មេងៗដែលមានឆន្ទៈច្រើនណាស់ ប៉ុន្តែឆន្ទៈរបស់ពួកគេក៏មិនសូវជាបានយូរដែរ ដោយសារតែសហព័ន្ធមិនមានប្រាក់ខែឱ្យខ្ពស់ និងជាប់លាប់ ហើយសហព័ន្ធក៏មិនមានលទ្ធភាពបង្កើតព្រឹត្តិការណ៍ឱ្យកីឡាករត្រៀម និងបម្រុងទាំងនោះបានច្រើន ។ លោកថា រាល់ឆ្នាំសហព័ន្ធជ្រើសកីឡាករបានពីការប្រកួតថ្នាក់ជាតិ និងពីការប្រកួតប្រចាំសហព័ន្ធបានច្រើននាក់ណាស់ ប៉ុន្តែសមាសភាពទាំងនោះក៏មិនសល់ច្រើនដែរ ដោយមានន័យថា លុះត្រាតែដល់សហព័ន្ធមានតម្រូវការឱ្យប្រកួតទើបងាកទៅប្រមែប្រមូលយកមក ហើយអ្នកខ្លះដែលខាងសហព័ន្ធសម្លឹងឃើញថាល្អ ពេលខ្លះក៏ប្ដូរឆន្ទៈអស់់ ធ្វើឱ្យសហព័ន្ធសោកស្ដាយ ឬមានន័យថា បណ្ដុះបណ្ដាលចោល ។
លោកបង្ហើបថា បើសហព័ន្ធមានការជ្រោមជ្រែងពីក្រុមហ៊ុនឯកជននានា ដើម្បីអាចបង្កើតព្រឹត្តិការណ៍នានា ឬបង្កើតសកម្មភាពឱ្យសមាសភាពរបស់កីឡាករកាយសម្ព័ន្ធបានបង្ហាញសមត្ថភាពញឹកញាប់នោះ ទោះជាខាងសហព័ន្ធមិនមានប្រាក់ខែច្រើនៗដើម្បីចងជើង ក៏ធនធានអ្នកដែលទទួលបានការបណ្ដុះបណ្ដាលពីសហព័ន្ធនឹងនៅត្រាំត្រែងជាមួយសហព័ន្ធដោយមិនរត់ទៅណានោះដែរ ។ បើមិនដូច្នោះទេ ទោះជាខាងសហព័ន្ធបណ្ដុះបណ្ដាលធនធានទាំងចាស់ទាំងថ្មីបានច្រើន ប៉ុន្តែអ្នកនៅតស៊ូពិតប្រាកដជាមួយសហព័ន្ធ ក៏មិនមែនទាំងអស់នោះដែរ៕
ចែករំលែកព័តមាននេះ