ខេត្តកំពង់ឆ្នាំង ៖ តាមព័ត៌មានចុងក្រោយថា មន្ត្រីសាលាស្រុកបានចុះទៅហាមឃាត់ និងឱ្យបញ្ឈប់ការបូមខ្សាច់ក្បែរផ្លូវនោះទៀតហើយ ។ គួរបញ្ជាក់ថា ទីតាំងបូមខ្សាច់មួយកន្លែង នៅចំណុចអ្នកតាបាត់ដាន ស្ថិតក្នុងភូមិល្វា ឃុំស្វាយរំពារ ស្រុកកំពង់លែង ដែលប្រជាពលរដ្ឋចោទថា គ្មានច្បាប់អនុញ្ញាតត្រឹមត្រូវពីមន្ទីរជំនាញ និងមានត្រឹមការអនុញ្ញាតពីមន្ត្រីក្រុមប្រឹក្សាឃុំស្វាយរំពារនោះ ធ្វើឱ្យប្រជាពលរដ្ឋ ក៏ដូចជាអាជ្ញាធរភូមិ មានការព្រួយបារម្ភចំពោះករណីបូមយកខ្សាច់នៅចំណុចខាងលើ ព្រោះកៀកជាប់នឹងផ្លូវលំដែលទើបកសាងហើយ ដែលអាចបាក់ស្រុតជាពុំខាន បើនៅតែបន្តការបូមខ្សាច់នៅចំណុចនោះបន្តទៀត ។
ជុំវិញករណីនេះ លោក ហួត ផាត អនុប្រធានភូមិល្វា ឃុំស្វាយរំពារ បានផ្តល់កិច្ចសម្ភាសន៍នៅកន្លែងបូមខ្សាច់ កាលពីរសៀលថ្ងៃទី១៣ ខែឧសភាថា ការបូមខ្សាច់នៅចំណុចអ្នកតាបាត់ដាននេះ កើតមានយូរហើយ មិនបានសុំការអនុញ្ញាតពីអាជ្ញាធរភូមិឡើយ ហើយអាជ្ញាធរឃុំ ក៏មិនបានប្រាប់ពីករណីបូមខ្សាច់នេះដែរ តែអ្នកបូមខ្សាច់ប្រាប់ថាមានការអនុញ្ញាតពីមន្ត្រីក្រុមប្រឹក្សាឃុំស្វាយរំពារ ។
លោកអនុប្រធានភូមិបញ្ជាក់ថា ដីដែលគេកំពុងបូមខ្សាច់នេះ ជាដីរបស់ឯកជនបានលក់ទៅឲ្យអ្នកបូមខ្សាច់ទើបគេបូមយកខ្សាច់លក់ ។ ប៉ុន្តែទោះបីជារវាងអ្នកលក់និងអ្នកទិញ ជាការព្រមព្រៀងឯកជនក៏ពិតមែន តែនៅចំណុចបូមខ្សាច់នេះ វាបានបាក់ជិតដល់ជើងទេរផ្លូវលំដែលទើបកសាងឡើងដោយអង្គការមួយ សម្រាប់ប្រជាពលរដ្ឋធ្វើដំណើរ ហើយបើសិនបាក់ដល់ផ្លូវលំនោះ តើនរណាជាអ្នកទទួលខុសត្រូវ ? ម្យ៉ាងវិញទៀត អ្នកបូមខ្សាច់នោះបានបូមជាប់នឹងព្រំដីប្រជាពលរដ្ឋផ្សេងទៀត ដែលនៅពេលមានភ្លៀង
ធ្លាក់នឹងបាក់ចូលដីគេ ដល់ពេលនោះនឹងកើតរឿងរ៉ាវជាក់ជាពុំខាន ។
ក្នុងនាមរូបលោកជាអាជ្ញាធរភូមិ លោកសូមឲ្យអាជ្ញាធរឃុំ បញ្ឈប់សកម្មភាពបូមយកខ្សាច់នៅចំណុចនោះជាបន្ទាន់ បើមិនដូច្នេះទេផ្លូវលំក្រាលក្រួសក្រហមនៅជាប់ទីតាំងបូមខ្សាច់នេះ នឹងខូចជាពុំខាន ។ ជុំវិញបញ្ហានេះ មិនអាចសុំការបំភ្លឺពីលោកមេឃុំបានទេ ដោយសារការទាក់ទងតាមទូរស័ព្ទហៅចូលហើយគ្មានអ្នកលើក ។
ដោយឡែក លោក សំ ចាន់ថន អភិបាលស្រុកកំពង់លែងថ្លែងថា លោកមិនបានដឹងរឿងហ្នឹងទេ តែចាំឲ្យមន្ត្រីនគរបាលប៉ុស្តិ៍ទៅពិនិត្យមើល ។ លោកបានបញ្ជាក់ថា ថ្វីបើជាដីឯកជនក៏ពិតមែន តែបើបូមជាប់ផ្លូវបែបនេះក៏មិនត្រូវដែរ ដីចំណីផ្លូវវាមានច្បាប់របស់វា មិនអាចឲ្យមានការរំលោភបំពានបានឡើយ ។
ទោះជាយ៉ាងនេះក្តី ក្រៅពីគ្មានច្បាប់អនុញ្ញាតពីមន្ទីរជំនាញហើយ ករណីបូមខ្សាច់ខាងលើនៅបានដឹកជញ្ជូនធ្វើឲ្យខូចផ្លូវ និងបង្កឲ្យដីហុយប៉ះពាល់ដល់សុខភាពអ្នករស់នៅតាមដងផ្លូវទៀតផង ។
ចែករំលែកព័តមាននេះ