គូស្នេហ៍វ័យក្មេងមួយគូត្រូវចាប់ដុតទាំងរស់នៅជាយក្រុងមុមបៃ ប្រទេសឥណ្ឌា ដោយសារក្រុមគ្រួសារប្រឆាំងស្នេហា និងការរៀបអាពាហ៍ពិពាហ៍របស់ពួកគេ ព្រោះខុសវណ្ណៈគ្នា ។ នារីដែលមានគភ៌២ខែបានស្លាប់បាត់បង់ជីវិត ខណៈគូស្នេហ៍រងរបួស ។
ម៉េនហ្គេស រ៉ាន់សុីង អាយុ២៣ឆ្នាំ និងគូស្នេហ៍នាងរុកមីនី អាយុ១៩ឆ្នាំ ត្រូវចាប់ដុតទាំងរស់ ដោយសមាជិក៣នាក់ក្នុងក្រុមគ្រួសាររបស់ខាងស្រី ក្នុងនោះមានឪពុករបស់នាងផងដែរ ។
ប៉ូលិសឲ្យដឹងថានារីរងគ្រោះដល់ជីវិតមានផ្ទៃពោះ២ខែ ។ មូលហេតុដែលកើតឡើងព្រោះអ្នកទាំង២មានវណ្ណៈខុសគ្នា ហើយពួកគេបានទៅសួរសុខទុក្ខបងប្អូន នៅក្នុងភូមិមួយក្បែរក្រុងមុមបៃកាលពីថ្ងៃទី១ ខែឧសភា ឆ្នាំ២០១៩ ។
ក្រុមគ្រួសារខាងស្រីមិនព្រមឲ្យនាងរុកមីនីត្រឡប់ទៅវិញជាមួយគូស្នេហ៍ទេ ។ ពេលនោះរ៉ាន់សុីង ក៏ទាស់សំដីជាមួយឳពុក និងសមាជិកគ្រួសាររបស់នាង រហូតឈានដល់ប្រតាយប្រតប់គ្នា ។ ជម្លោះកាន់តែធ្ងន់ឡើង ដោយគូស្នេហ៍នេះត្រូវក្រុមគ្រួសារខាងស្រីយកប្រេងកាតចាក់ដុតទាំងរស់តែម្តង ។ ប៉ូលិសបានចាប់ខ្លួនជនល្មើស២នាក់ ខណៈឪពុកខាងស្រីបានគេចខ្លួនបាត់ ៕
ចែករំលែកព័តមាននេះ