ខេត្តព្រៃវែង ៖ ដីបឹងក្រចាប់ បឹងប្រា និងដីជុំវិញបឹងទាំង២នេះ កំពុងត្រូវបានឈ្មួញដើរប្រមូលទិញ ដោយបំផុសបំផុលឲ្យប្រជាពលរដ្ឋផ្តិតមេដៃលក់ក្នុងតម្លៃថោកៗ ទោះបីដីនេះជាដីសាធារណៈរបស់រដ្ឋក្តី ចំណែកខាងអាជ្ញាធរបែរជាធ្វើមិនដឹងមិនឮសម្ងំស្ងាត់ឈឹង ។ដីបឹងទាំង២នេះ ស្ថិតនៅក្នុងឃុំព្រែកតាសរ ស្រុកពោធិ៍រៀង មានទំហំសរុប១៧ហិកតា ត្រូវបានឈ្មួញប្រមូលទិញកាលពីអំឡុងចុងខែមីនាថ្មីៗកន្លងមកនេះ ហើយបច្ចុប្បន្នក្រុមឈ្មួញបានដើរបោះបង្គោលកំណត់ព្រំដីរួចរាល់អស់ហើយ ។
ប្រភពព័ត៌មានពីពលរដ្ឋក្នុងឃុំព្រែកតាសរ បានឲ្យដឹងថា ដីបឹងប្រា ឈ្មួញទិញបានចំនួន១៥ហិកតា និងដីបឹងក្រចាប់ទិញបាន៧ហិកតាហើយ ដោយការទិញ-លក់ដីបឹងសាធារណៈទាំង២នេះ មានមន្ត្រីសាលាស្រុកពោធិ៍រៀងម្នាក់ជាអ្នករៀបចំឯកសារប្លង់ដី និងមន្ត្រីសាលាស្រុកខ្សាច់កណ្តាល ខេត្តកណ្តាលម្នាក់ ជាអ្នករកម៉ូយចិនមកទិញបន្ត ។
ពលរដ្ឋនៅឃុំព្រែកតាសរ បានលើកឡើងថាបឹងក្រចាប់ និងបឹងប្រានេះ ពីមុនស្ថិតក្នុងតំបន់ឡូត៍នេសាទលេខ២ មានចម្ងាយតែជាង៣០០ម៉ែត្រប៉ុណ្ណោះពីទន្លេតូច ហើយក៏ស្ថិតនៅជិតផ្ទះអ្នកស្រុកដែរ ។ អ្នកស្រុកបានត្រាយព្រៃលិចទឹក ឆ្ការយកដីបន្តិចម្តងៗ ដើម្បីរុករានដីធ្វើស្រែប្រាំង ហើយនៅឆ្នាំ២០១១រាជរដ្ឋាភិបាលបានរំលាយតំបន់ឡូត៍នេសាទទាំងអស់ប្រគល់ឲ្យពលរដ្ឋសហគមន៍គ្រប់គ្រង ម្នាក់ៗប្រឹងធ្វើស្រែ ។
លុះនៅដើមឆ្នាំ២០១៩នេះ មន្ត្រីសាលាស្រុកពោធិ៍រៀង និងមន្ត្រីសាលាឃុំព្រែកតាសរ សហការជាមួយលោក សយ សុធន ជាអ្នកឈរឈ្មោះទិញដី បានដើរចរចាជាមួយអ្នកភូមិប្រមូលទិញដីទាំងនោះដោយឲ្យតម្លៃទាបៗ គឺចាប់ពី៣.០០០ដុល្លារទៅ៤.៥០០ដុល្លារប៉ុណ្ណោះក្នុងមួយហិកតា ។ប្រជាពលរដ្ឋបន្តថា ការប្រមូលទិញនេះ មន្ត្រីសាលាស្រុកពោធិ៍រៀង និងសាលាឃុំព្រែកតាសរ ប្រាប់អ្នកស្រុកថា បើគេសួរត្រូវឆ្លើយថា លក់ដីក្រុមសាមគ្គី(កំឡុងឆ្នាំ១៩៧៩-១៩៨០) ទេ មិនមែនលក់-ទិញដីបឹងទេ ដោយអ្នកឈរទិញ
ដីឈ្មោះ សយ សុធុន និងក្រោមការរៀបចំពីលោក ម៉ៅ ថេត អភិបាលរងស្រុកពោធិ៍រៀង ។
ជុំវិញការលើកឡើងខាងលើនេះ កោះសន្តិភាពមិនអាចសុំការបំភ្លឺពីលោក ម៉ៅ ថេត អភិបាលរងស្រុកបានទេ រីឯលោក យស ស៊ីណាត អភិបាលស្រុកពោធិ៍រៀង មានប្រសាសន៍ថា លោកពុំបានដឹងរឿងនេះទេ ព្រោះលោកជាប់ទៅរៀននៅភ្នំពេញ បើចង់ដឹងសួរលោកមេឃុំចុះ ។ចំណែកឯលោក ម៉ែន សារឿន មេឃុំព្រែកតាសរ បានបដិសេធថា ដីបឹងទាំងនោះមិនមានការទិញ-លក់ទេ តែដីជុំវិញបឹងអ្នកស្រុកលក់មែន ក៏ប៉ុន្តែខ្ញុំមិនចុះហត្ថលេខាទទួលស្គាល់ទេ ហើយតំបន់មេទឹក ក៏មិនអាចធ្វើការទិញ-លក់បានដែរ ព្រោះខុសច្បាប់ ។
រីឯលោក សយ សុធន ដែលជាឈ្មួញទិញដីបានទទួលស្គាល់ថា គាត់ពិតជាបានទិញដីក្រុមសាមគ្គីនៅបឹងក្រចាប់ និងបឹងប្រាមែន ។ ដីបឹងក្រចាប់សរុប៧ហិកតា ប៉ុន្តែអាជ្ញាធរដកទុក១ហិកតាចំកណ្ដាលដី ហើយគាត់ទិញបាន៦ហិកតា ។ ដោយឡែក ដីបឹងប្រាសរុប១៥ហិកតា អាជ្ញាធរដកទុក២ហិកតា ចំកណ្ដាលដី ក្នុងនោះគាត់ទិញបានតែមួយចំនួនទេ នៅសល់មួយចំនួនទៀត នៅលើពលរដ្ឋអាស្រ័យផលដដែល ។បើតាមពលរដ្ឋបន្ថែមថា បើការទិញដីបឹងទាំង២នេះបានជោគជ័យ ក្រុមឈ្មួញនឹងប្រមូលទិញដីជុំវិញបឹង ដីបឹងរលា បឹងផលិត និងបឹងត្រាវបន្តទៀត ព្រោះថាតំបន់ទាំងនេះចិនចង់ទិញ មកពីជាប់គម្រោងស្ថាបនាផ្លូវល្បឿនលឿនភ្នំពេញ-បាវិត ។
ចំណែកករណីទិញ-លក់បឹងនេះ លោក ជុំ សុភី ប្រធានមន្ទីរធនធានទឹកនិងឧតុនិយមខេត្ត មានប្រសាសន៍ថា មិនបានដឹងទេចាំឲ្យមន្ត្រីចុះទៅពិនិត្យ ។រីឯលោក អេង ផេងអាន ប្រធានមន្ទីររៀបចំដែនដី នគរូបនីយកម្ម និងសំណង់ខេត្ត មានប្រសាសន៍ថា ដីបឹងមិនអាចប្រគល់ឲ្យឯកជនទេ ហើយការងារនេះប្រសិនបើមន្ទីរធនធានទឹកថាមិនមែនជាដីបឹង លោកនឹងចាត់ឱ្យមន្ត្រីចុះទៅពិនិត្យមើល ៕
ចែករំលែកព័តមាននេះ