ខេត្តព្រះសីហនុ ៖ ឥរិយាបថអវិជ្ជមានរបស់ជនជាតិចិនមួយក្តាប់តូច ហាក់កំពុងធ្វើឱ្យជនជាតិខ្មែរម្ចាស់ស្រុក ត្រូវបានកត់សម្គាល់និងថ្កោលទោសអស់ពីរឿងមួយដល់រឿងមួយ ។ រឿងថ្មីមួយទៀតកាន់តែធ្វើឱ្យមានការហួសចិត្ត ចំពោះជនជាតិចិន១ក្រុមដែលបានបង្ហោះវីដេអូឃ្លីប ។ ពេលនេះ…
ខេត្តព្រះសីហនុ ៖ ឥរិយាបថអវិជ្ជមានរបស់ជនជាតិចិនមួយក្តាប់តូច ហាក់កំពុងធ្វើឱ្យជនជាតិខ្មែរម្ចាស់ស្រុក ត្រូវបានកត់សម្គាល់និងថ្កោលទោសអស់ពីរឿងមួយដល់រឿងមួយ ។ រឿងថ្មីមួយទៀតកាន់តែធ្វើឱ្យមានការហួសចិត្ត ចំពោះជនជាតិចិន១ក្រុមដែលបានបង្ហោះវីដេអូឃ្លីប ។ ពេលនេះ កម្លាំងនគរបាលខេត្តព្រះសីហនុ ដោយសហការជាមួយនាយកដ្ឋានជំនាញដែលពាក់ព័ន្ធ កំពុងបើកប្រតិបត្តិការតាមស្វែងរកចាប់ខ្លួន ជនជាតិចិនមួយក្រុម ដែលបានបង្ហោះវីដេអូស្រែកគំរាមថា ពួកគេមកពីខេត្តឆុងឆីង ចង់បង្កអសន្ដិសុខ នៅខេត្តព្រះសីហនុ ។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានថ្លែង ឲ្យដឹងនៅព្រឹកថ្ងៃទី១២ ឧសភាថា បន្ទាប់ពីទទួលបានបទបញ្ជាយ៉ាងម៉ឺងម៉ាត់ ពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិនោះ លោកបានបញ្ជាកម្លាំងជំនាញបើកការស្រាវជ្រាវភ្លាមៗជាបន្ទាន់ ។ ទោះបីជាបែបណា រហូតមកដល់ល្ងាចថ្ងៃដដែលការស្វែងរកក្រុមជនជាតិចិនទាំងនោះនៅមិនទាន់ឈានដល់ការវែកមុខឃើញនៅឡើយទេ ។
បើតាមលោកឧត្តមសេនីយ៍ស្នងការថា កម្លាំងជំនាញនៃស្នងការដ្ឋាននគរបាលខេត្ត កំពុងសហការជាមួយនាយកដ្ឋានជំនាញដែលពាក់ព័ន្ធបើកប្រតិបត្ដិការយ៉ាងក្ដៅគគុក ដើម្បីស្រាវជ្រាវ និងឈានដល់ការចាប់ខ្លូនជនជាតិចិនមួយក្រុមខាងលើ។ ទោះជាយ៉ាងណាក៏ដោយ លោកឧត្តមសេនីយ៍ទោ ជួន ណារិន្ទ មិនទាន់អាចបញ្ជាក់ច្បាស់នៅឡើយនោះទេថា ជនជាតិចិនដែលបង្ហោះវីដេអូនោះកំពុងស្នាក់នៅ ឬក៏ធ្វើការនៅខេត្តព្រះសីហនុនោះទេ ពោលគឺស្ថិតនៅក្រោមការស្រាវជ្រាវនៅឡើយ ។
យោងតាមមន្ដ្រីមានសមត្ថកិច្ចបានវិភាគថា តាមរយៈវីដេអូឃ្លឹបរបស់ជនជាតិចិនមួយក្រុមនេះ ពួកគេបានស្រែកដោយមេខ្លោងនិងបន្ទរដោយក្រុមបក្សពួកជាបរិវារដោះអាវបញ្ចេញសាច់ដុំបង្ហាញស្នាមសាក់ជាក្រុមអ្នកលេងឬហៅថាជាពួកម៉ាហ្វ៊ីយ៉ាត្រូវបានបកប្រែជាភាសាខ្មែរក្រៅផ្លូវការថា «ពួកគេមកពីខេត្តឆុង
ឆីង ។ កំពង់សោម(ក្រុងព្រះសីហនុ)៣ឆ្នាំក្រោយយើងចង់ឲ្យវឹកវរគឺវឹកវរចង់ឲ្យសុវត្ថិភាព គឺសុវត្ថិភាព» ។ ការស្រែកគំរាមនេះពិតជាបានទាក់ទងទៅនឹងខេត្តមាត់សមុទ្រខ្មែរគឺជាការព្រមានទាក់ទិននឹងសន្តិសុខ ដូច្នេះ ត្រូវតែស្រាវជ្រាវឱ្យបានដល់ទីជម្រៅ តើពួកគេជាក្រុមណា ? តើដោយមូលហេតុអ្វី ទើបពួកគេនិយាយបែបនេះ ។
ការបង្ហោះវីដេអូឃ្លីបនេះ គឺក្រោយពេលដែលមានការបាញ់សម្លាប់ជនជាតិចិនដូចគ្នា ក្នុងរថយន្តបន្ទាប់ពីជិះចេញពីសណ្ឋាគារខ្សាច់ស បានតែប៉ុន្មានម៉ែត្រ ដែលរហូតមកដល់ពេលនេះចាប់ជនដៃដល់មិនទាន់បាននៅឡើយ ទោះបីជនជាតិចិន២នាក់ត្រូវបានចាប់ក្នុងថ្ងៃដដែលនោះក្តី ។
នាយឧត្តមសេនីយ៍សន្ដិបណ្ដិត នេត សាវឿន អគ្គស្នងការនគរបាលជាតិ បានបញ្ជាឲ្យកម្លាំងនាយកដ្ឋានជំនាញ សហការជាមួយស្នងការដ្ឋាននគរបាលខេត្តព្រះសីហនុ ស្រាវជ្រាវភ្លាម ហើយបើរកឃើញត្រូវចាត់វិធានការច្បាប់ជាបន្ទាន់ ឬត្រូវបណ្ដេញចេញពីកម្ពុជា ឱ្យផុតតែម្តង ៕
ចែករំលែកព័តមាននេះ