រាជធានីភ្នំពេញ៖ សិល្បៈល្ខោនបាសាក់កំពុងតែខំរស់ទាំងលំបាក នៅក្នុងយុគសម័យដ៏ទំនើប ដូច្នេះហើយសិល្បៈមួយនេះ និងសិល្បៈបុរាណខ្មែរមួយចំនួនទៀតកំពុងទាមទារការជួយគាំទ្រ និងសង្គ្រោះជាបន្ទាន់ ។ ស្ថិតនៅក្នុងបរិបទនៃបច្ចេកវិទ្យាដ៏ទំនើបដែលមានលំហូរចូលខ្សែភាពយន្ត ល្បីៗជាមួយនឹងការថតមានបច្ចេកទេសល្អ បូករួមជាមួយនឹងប្រព័ន្ធផ្សព្វផ្សាយដ៏ទូលំទូលាយផងនោះ…
រាជធានីភ្នំពេញ៖ សិល្បៈល្ខោនបាសាក់កំពុងតែខំរស់ទាំងលំបាក នៅក្នុងយុគសម័យដ៏ទំនើប ដូច្នេះហើយសិល្បៈមួយនេះ និងសិល្បៈបុរាណខ្មែរមួយចំនួនទៀតកំពុងទាមទារការជួយគាំទ្រ និងសង្គ្រោះជាបន្ទាន់ ។ ស្ថិតនៅក្នុងបរិបទនៃបច្ចេកវិទ្យាដ៏ទំនើបដែលមានលំហូរចូលខ្សែភាពយន្ត ល្បីៗជាមួយនឹងការថតមានបច្ចេកទេសល្អ បូករួមជាមួយនឹងប្រព័ន្ធផ្សព្វផ្សាយដ៏ទូលំទូលាយផងនោះ ធ្វើឲ្យសិល្បៈបុរាណខ្មែរ ក្នុងនោះល្ខោនបាសាក់ដែលធ្លាប់ជាទីពេញនិយមជួបការលំបាកដោយសារខ្វះការគាំទ្រ ។
បើទោះបីជាល្ខោនបាសាក់នៅតែមានការសម្តែងនៅតំបន់នានា និងមានការផ្សព្វផ្សាយតាមរយៈស្ថានីយទូរទស្សន៍ខ្លះក៏ដោយ ក៏ប៉ុន្តែសិល្បៈនេះធ្លាក់ការគាំទ្រខ្លាំង ខណៈពេលដែលយុវវ័យភាគច្រើនស្ទើរតែមិនបានចាប់អារម្មណ៍ទៅហើយ ។ ឈរលើបញ្ហានេះអ្នកប្រតិបត្តិនៅក្នុងផ្នែកសិល្បៈទស្សនីយភាពមួយនេះបានសម្តែងការព្រួយបារម្ភខ្លាំង និងបានស្នើឲ្យប្រជាពលរដ្ឋខ្មែរ ជាពិសេសយុវជនគួរងាកមកគាំទ្រលើវិស័យសិល្បៈបុរាណខ្មែរខ្លះផង ។
កាលពីពេល ថ្មីៗកន្លងមកប្រធានដឹកនាំក្រុមសិល្បៈល្ខោនបាសាក់មហាជនរាជធានីភ្នំពេញលោកអុល សំអាង ថ្លែងថា «ដោយសារតែបច្ចុប្បន្នបច្ចេកវិទ្យាកាន់តែទំនើបនោះ មហាជនជាច្រើនបានងាកទៅរកអ្វីដែល ទំនើបៗ ហើយភ្លេចអតីតកាល និងអនុស្សាវរីយ៍ដែលយើងបានធ្លាប់ឃើញនូវការសម្តែងល្ខោនបាសាក់នៅតាមវត្តអារាម ។ កាលពីជាង១០ឆ្នាំមុននៅពេលដែលបច្ចេកវិទ្យាមិនទាន់ទំនើប ហើយស្ថានីយទូរទស្សន៍នៅមានកម្រិតនោះ សិល្បៈល្ខោនបាសាក់បានក្លាយជាទីពេញនិយមណាស់សម្រាប់មហាជនទូទៅ ។ មហាជន ចាស់ៗមួយចំនួនខ្លះពួកគាត់ក៏មិនដែលភ្លេចនូវការគាំទ្រទៅលើទស្សនីយភាពល្ខោនបាសាក់នេះដែរ បើទោះបីជាការសម្តែងនៅតាមទីតំបន់នានា បច្ចុប្បន្នមានអ្នកចូលរួមទស្សនាតិចឬក៏ដោយ »។
សម្រាប់សិល្បៈល្ខោនបាសាក់សម័យនេះ លោកអុល សំអាង ថា«ចំណាប់អារម្មណ៍របស់យុវជនយុវនារី និងមនុស្សចាស់មួយចំនួនហាក់បានឃ្លាតឆ្ងាយពីសិល្បៈមួយនេះ ដោយពួកគេបានងាកមករកសិល្បៈសម័យ ទំនើបៗនេះវិញ។ ពួកគេអាចនឹងគិតថា សិល្បៈបុរាណគ្រាន់តែជាការកំដរ ឬលម្អឲ្យតែ មានៗប៉ុណ្ណោះ ទោះបីជាបានទស្សនា ឬមិនបានគឺមិនជាបញ្ហាឡើយ ក្នុងពេលដែលពួកគេមិនបានដឹងទេថា សិល្បៈបុរាណខ្មែរគឺមានការខិតខំថែរក្សាខ្លាំងណាស់ពីលោកគ្រូអ្នកគ្រូ ចាស់ៗ ក្នុងនោះក៏មានរូបលោកផងដែរ »។
បើតាមលោកអុល សំអាង បើទោះជាបច្ចុប្បន្នមានការគាំទ្រ ឬមិនគាំទ្រទៅលើសិល្បៈល្ខោនបាសាក់នេះក្តី រូបលោកក៏នៅតែបន្តបេសកកម្មលើវិថីសិល្បៈបុរាណជាតិនេះដដែល ។លោកនឹងខិតខំពុះពារទោះមានភាពលំបាកលំបិនយ៉ាងណា ទាំងការសម្តែងនៅទីជិតទីឆ្ងាយ ក្តៅត្រជាក់ក៏ដោយ លោកនៅតែមិនបោះបង់ចោលឡើយ ព្រោះនេះក៏ជាការចូលរួមផ្សព្វផ្សាយនូវសិល្បៈបុរាណខ្មែរដ៏ចំណាស់មួយនេះផងដែរ ។
ក្នុងនាមជាអ្នកប្រតិបត្តិលើសិល្បៈល្ខោនបាសាក់ លោកអុល សំអាង បានអំពាវនាវដល់មហាជន ជាពិសេសយុវវ័យគួរងាកមកចូលរួមគាំទ្រខ្លះលើវិស័យសិល្បៈបុរាណខ្មែរ ។ លោកបានស្នើដល់ភាគីពាក់ព័ន្ធទាំងអស់ឲ្យរួមគ្នាធ្វើសកម្មភាព ផ្សេងៗ ដើម្បីជាការបណ្តុះគំនិតដល់ ក្មេងៗជំនាន់ក្រោយឲ្យយល់ដឹងពីគុណតម្លៃនៃសិល្បៈបុរាណខ្មែរ និងចូលរួមថែរក្សានូវកេរមរតកដូនតាមួយនេះឲ្យគង់វង្ស៕
ចែករំលែកព័តមាននេះ