ខេត្តព្រៃវែង ៖ ដីបឹងក្រចាប់ បឹងប្រា និងដីជុំវិញបឹងទាំង២នេះ កំពុងត្រូវបានឈ្មួញដើរប្រមូលទិញ ដោយបំផុសបំផុលឱ្យប្រជាពលរដ្ឋផ្តិតមេដៃលក់ក្នុងតម្លៃថោកៗទាំងដែលដីនេះជាដីសាធារណៈរបស់រដ្ឋ ចំណែកខាងអាជ្ញាធរបែរជាធ្វើមិនដឹងមិនលឺសំងំស្ងាត់ឈឹង។ ដីបឹងទាំង២នេះ ស្ថិតនៅក្នុងឃុំព្រែកតាសរ…
ខេត្តព្រៃវែង ៖ ដីបឹងក្រចាប់ បឹងប្រា និងដីជុំវិញបឹងទាំង២នេះ កំពុងត្រូវបានឈ្មួញដើរប្រមូលទិញ ដោយបំផុសបំផុលឱ្យប្រជាពលរដ្ឋផ្តិតមេដៃលក់ក្នុងតម្លៃថោកៗទាំងដែលដីនេះជាដីសាធារណៈរបស់រដ្ឋ ចំណែកខាងអាជ្ញាធរបែរជាធ្វើមិនដឹងមិនលឺសំងំស្ងាត់ឈឹង។ ដីបឹងទាំង២នេះ ស្ថិតនៅក្នុងឃុំព្រែកតាសរ ស្រុកពោធិ៍រៀង ខេត្តព្រៃវែង មានទំហំសរុបចំនួន១៧ហិកតា និងត្រូវបានឈ្មួញចាប់ប្រមូលទិញយកកាលពីអំឡុងចុងខែមីនាថ្មីៗនេះ ហើយបច្ចុប្បន្នក្រុមឈ្មួញបានដើរបោះបង្គោលកំណត់ព្រំដីរួចរាល់អស់ហើយ។
ប្រភពព័ត៌មានពីប្រជាពលរដ្ឋក្នុងឃុំព្រែកតាសរ បានឱ្យដឹងថា ដីបឹងប្រាឈ្មួញទិញបានចំនួន១៥ហិកតា និងដីបឹងក្រចាប់ទិញបាន៧ហិកតាហើយ ដោយការទិញលក់ដីបឹងសាធារណៈទាំង២នេះ មានមន្ត្រីជាន់ខ្ពស់សាលាស្រុកពោធិរៀងម្នាក់ ជាអ្នករៀបចំឯកសារប្លង់ដី និងមន្ត្រីសាលាស្រុកខ្សាច់កណ្តាលម្នាក់ ជាអ្នករកម៉ូយចិនមកទិញបន្ត។
ប្រជាពលរដ្ឋនៅភូមិព្រែកឈ្មោះ ឃុំព្រែកតាសរ បានលើកឡើងថា បឹងក្រចាប់ និងបឹងប្រា នេះពីមុនស្ថិតក្នុងតំបន់ឡូតិ៍នេសាទលេខ២ វាមានចម្ងាយតែជាង៣០០ម៉ែត្រប៉ុណ្ណោះ ពីទន្លេតូច ហើយក៏ស្ថិតនៅជិតផ្ទះអ្នកស្រុកដែរ អ្នកស្រុកបានត្រាយព្រៃលិចទឹក ឆ្កាយកដីបន្តិចម្តងៗ ដើម្បីរុករានដីធ្វើស្រែប្រាំង ហើយនៅឆ្នាំ២០១១ រាជរដ្ឋាភិបាលបានរំលាយតំបន់ឡូតិ៍នេសាទទាំងអស់ប្រគល់ឲ្យពលរដ្ឋសហគមន៍គ្រប់គ្រង ម្នាក់ៗប្រឹងធ្វើស្រែ ហើយដើមឆ្នាំ២០១៩នេះ មន្ត្រីសាលាស្រុកពោធិរៀង និងមន្ត្រីសាលាឃុំព្រែកតាសរ សហការជាមួយលោក សយ សុធន បានដើរចរចាជាមួយអ្នកភូមិប្រមូលទិញដីទាំងនោះ ដោយឲ្យតម្លៃទាបៗ គឺចាប់ពី៣,០០០ដុល្លារទៅ៤,៥០០ដុល្លារប៉ុណ្ណោះក្នុងមួយហិកតា ។
ប្រជាពលរដ្ឋបន្តថា ការប្រមូលទិញនេះ មន្ត្រីសាលាស្រុកពោធិរៀង សាលាឃុំព្រែកតាសរ ប្រាប់អ្នកស្រុកថា បើគេសួរត្រូវឆ្លើយថា លក់ដីក្រុមសាមគ្គី (កំឡុងឆ្នាំ១៩៧៩-១៩៨០ ) ទេ មិនមែនលក់ទិញដីបឹងទេ ដោយអ្នកឈរទិញដីឈ្មោះលោក សយ សុធុន និងក្រោមការរៀបចំពីលោក ម៉ៅ ថេត អភិបាលរងស្រុកពោធិ៍រៀង។
ជុំវិញការលើកឡើងខាងលើនេះ កោះសន្តិភាព មិនអាចសុំការបំភ្លឺពីលោក ម៉ៅ ថេត អភិបាលរងស្រុកបានទេ រីឯលោក យស ស៊ីណាត អភិបាលស្រុកពោធិ៍រៀង បានមានប្រសាសន៍ថា លោកពុំបានដឹងរឿងនេះទេ ព្រោះលោកជាប់ទៅរៀននៅភ្នំពេញ បើចង់ដឹងសួរលោកមេឃុំចុះ។
ចំណែកឯលោក ម៉ែន សារឿន មេឃុំព្រែកតាសរ បានបដិសេធថា ដីបឹងទាំងនោះមិនមានការទិញ-លក់នោះទេ តែដីជុំវិញបឹងអ្នកស្រុកលក់មែន ក៏ប៉ុន្តែខ្ញុំមិនចុះហត្ថលេខាទទួលស្គាល់ទេ ហើយតំបន់មេទឹក ក៏មិនអាចធ្វើការទិញលក់បានដែរ ព្រោះវាខុសច្បាប់។
រីឯលោក សយ សុធុន ដែលជាឈ្មួញទិញដីបានទទួលស្គាល់ថា លោកពិតជាបានទិញដីរបបក្រុមនៅបឹងក្រចាប់ និងបឹងប្រា មែន។ ហើយដីបឹងក្រចាប់សរុប៧ហិកតា ប៉ុន្តែអាជ្ញាធរដកទុក១ហិកតាចំកណ្ដាលដី ហើយលោកទិញបាន៦ហិកតា។ ដោយឡែកដីបឹងប្រា សរុប១៥ហិកតា អាជ្ញាធរដកទុក២ហិកតា ចំកណ្ដាលដី ក្នុងនោះលោកទិញបានតែមួយចំនួនទេ នៅសល់មួយចំនួនទៀត នៅលើពលរដ្ឋអាស្រ័យផលដដែល។
ចែករំលែកព័តមាននេះ