ខេត្តក្រចេះ ៖ ត្រីផ្សោតញីដ៏ធំ១ក្បាល ត្រូវបានគេប្រទះឃើញងាប់អណ្តែតទឹកទន្លេមេគង្គហូរតាមខ្សែទឹក មកទើរនៅក្បែរក្រុងក្រចេះ និងបង្កឲ្យមានការភ្ញាក់ផ្អើលដល់មន្ត្រីជលផល ចុះទៅស្រង់យកមកពិនិត្យ កាលពីព្រឹកថ្ងៃទី១០ ខែឧសភា ។…
ខេត្តក្រចេះ ៖ ត្រីផ្សោតញីដ៏ធំ១ក្បាល ត្រូវបានគេប្រទះឃើញងាប់អណ្តែតទឹកទន្លេមេគង្គហូរតាមខ្សែទឹក មកទើរនៅក្បែរក្រុងក្រចេះ និងបង្កឲ្យមានការភ្ញាក់ផ្អើលដល់មន្ត្រីជលផល ចុះទៅស្រង់យកមកពិនិត្យ កាលពីព្រឹកថ្ងៃទី១០ ខែឧសភា ។ នៅមិនទាន់មានប្រភពព័ត៌មានជាក់លាក់ណាមួយថា ការងាប់ត្រីផ្សោតទឹកសាបក៏កម្រមួយក្បាលនេះបណ្តាលមកពីមូលហេតុអ្វី ហើយការងាប់នេះបានកើតឡើងពីពេលណា
ដែរ ។
ទោះបីជាបែបណា បើតាមមន្ត្រីខណ្ឌរដ្ឋបាលជលផលក្រចេះថ្លែងថា ការងាប់របស់ផ្សោតមួយក្បាលនេះបណ្តាលមកពីឈឺចាស់ ។ ក្រុមមន្ត្រីជំនាញអះអាងថា ក្រោយពីការពិនិត្យមិនឃើញមានស្លាកស្នាមអ្វីគួរឲ្យកត់ សម្គាល់នៅលើខ្លួនផ្សោតមួយក្បាលនេះទេ។ ផ្សោតញីមួយក្បាលនេះ ត្រូវគេស្គាល់ថា ជាផ្សោតដែលរស់នៅក្នុងអន្លង់កាំពី ដែលមានលេខសម្គាល់់ ID 25 ជាផ្សោតមានអាយុច្រើន ព្រោះធ្មេញបានបាក់រេចរឹល និងមានទម្ងន់១៩១គីឡូក្រាម ប្រវែងជាង២ម៉ែត្រ ។
ក្រុមមន្ត្រីនិយាយថា ខ្មោចត្រីផ្សោតមួយក្បាលនេះ ត្រូវបានមន្ត្រីជំនាញស្រង់ឡើងពីទឹកវេចខ្ចប់យកទៅរក្សាទុកនៅស្នាក់ការរបស់អង្គការជាដៃគូអភិរក្ស រង់ចាំការធ្វើកោសល្យវិច័យបន្ត ។ បើតាមលោក ម៉ុក ពន្លក នាយរងខណ្ឌរដ្ឋបាលជលផលក្រចេះ និងជាប្រធានឆ្មាំអភិរក្ស ធ្លាប់បានថ្លែងប្រាប់ឲ្យដឹងកាលពីពេលថ្មីៗកន្លងទៅថា សព្វថ្ងៃទន្លេមេគង្គខេត្តក្រចេះ មានត្រីផ្សោតរស់នៅក្នុងចន្លោះពី៥៥ទៅ៦០ក្បាល ។
ត្រីផ្សោតទាំងអស់នេះ សព្វថ្ងៃកំពុងរស់នៅតាមអន្លង់ចំនួន៥អន្លង់ធំៗក្នុងទន្លេមេគង្គខេត្តក្រចេះ ។ អន្លង់ទាំងនោះមានដូចជា អន្លង់ខ្សាច់ម្កាក់ អន្លង់កោះដំបង អន្លង់កោះផ្តៅ អន្លង់កន្ទុយកោះរងាវ និងអន្លង់ផ្សោតកាំពី ។ ក្នុងចំណោមអន្លង់ធំៗទាំង៥ គឺអន្លង់ផ្សោតកាំពីមានត្រីផ្សោតរស់នៅច្រើនជាងគេក្នុងចន្លោះចាប់ពី២០ទៅ៣០ក្បាល ។ លោកបានធ្វើការប៉ាន់ប្រមាណថា ក្នុងឆ្នាំ២០១៩នេះ ត្រីផ្សោតអាចមានកំណើនដល់ជាង១០ក្បាល តាមរយៈការបង្កកំណើត ៕
ចែករំលែកព័តមាននេះ