រាជធានីភ្នំពេញ ៖ កាលពីមួយរយៈមុន គ្មានអ្នកស្នេហាវិស័យប្រដាល់ណាម្នាក់មិនស្គាល់កីឡាករ យ៉េន ឌីណា ដែលបានប្ដូរមកប្រើឈ្មោះពិតថា ប៉ោ ភារិទ្ធិ នោះទេ…
រាជធានីភ្នំពេញ ៖ កាលពីមួយរយៈមុន គ្មានអ្នកស្នេហាវិស័យប្រដាល់ណាម្នាក់មិនស្គាល់កីឡាករ យ៉េន ឌីណា ដែលបានប្ដូរមកប្រើឈ្មោះពិតថា ប៉ោ ភារិទ្ធិ នោះទេ ដោយគេបានទាំងកញ្ជ្រោលអ្នកគាំទ្រឱ្យជាប់ចិត្តនឹងថ្វីដៃរបស់គេនោះផង ។ យ៉ាងណាមិញ ធៀបនឹងរយៈពេលនោះ គេហាក់ធ្លាក់ដៃជាងមុន ខណៈឱកាសឡើងប្រកួងលើសង្វៀនអន្តរជាតិធំៗក៏មិនសូវមាន ទើបធ្វើឱ្យមានការកោតសរសើរពេលឃើញគេត្រឡប់មកបង្ហាញខ្លួនក្នុងព្រឹត្តិ ការណ៍ប្រដាល់អន្តរជាតិជាថ្មី TV5 Boxing Knock Out Series By K-Cement រដូវកាលទី៥របស់ប៉ុស្ដិ៍លេខ៥ នាថ្ងៃសៅរ៍ស្អែកនេះ ។
ការប្រកួតដែលនឹងចាប់ផ្ដើមឡើងពីម៉ោង៦ល្ងាចទៅត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា ។
កីឡាករកម្ពុជាត្រូវបានគេចាប់អារម្មណ៍ហួសប្រមាណក្រោយពីមានការប្រកាសថា តម្រូវឱ្យស្វាគមន៍ Loom Leng ដែលអ្នកណាៗក៏ស្គាល់ថាជាជើងខ្លាំងវ័យក្មេងហើយធ្លាប់ប្រកួតឈ្នះលើកីឡាករកម្ពុជាកន្លងមក ។ វត្តមានកីឡាករទាំងកម្ពុជា និងថៃ ក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈមិត្តភាពក្នុងស្រុកទេ ពិតជាធ្វើឱ្យអ្នកស្នេហាវិស័យ ប្រដាល់មានការចាប់អារម្មណ៍ ជាពិសេសគឺវត្តមានរបស់កីឡាករ ប៉ោ ភារិទ្ធ រឹតតែមានការចាប់អារម្មណ៍ ដោយសារតែកីឡាកររូបនេះ ត្រូវគេដឹងថាជាជើងខ្លាំងនៅមុនពេលបាត់មួយរយៈ ។
លោក សេង កដិកា បញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ប៉ោ ភារិទ្ធិ ដោយសារតែកីឡាកររូបនេះ ធ្លាប់មានស្នាដៃរាប់មិនអស់ ហើយលោកជឿថាកណ្ដាប់ដៃ និងភាពខ្លាំងរបស់គេនឹងល្អ ទើបលោកសម្រេចដាក់ឱ្យប្រកួតជាលក្ខណៈអន្តរជាតិ ក្នុងសប្ដាហ៍ប្រកួតជម្រុះរវាងកីឡាករខ្លាំងៗលើកនេះ ។
លោកប្រកាសថា វត្តមានចុះមករបស់កីឡាករថៃ Loom Leng លោកទុកចិត្តកីឡាករកម្ពុជារូបនេះ ទើបលោកហ៊ានសម្រេចផ្គូផ្គង បើទោះជាមានអ្នកគាំទ្រភាគច្រើនថាកីឡាករកម្ពុជាអាចនឹងពិបាកទប់ជាមួយកីឡាករថៃក្ដី ។ លោកថា កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា។
មួយគូនេះ មានការចាប់អារម្មណ៍ភាគច្រើន ថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករកម្ពុជា ប៉ោ ភារិទ្ធិ មិនសូវមានទម្លាប់ឡើងវ៉ៃលាក់ដៃស្រាប់ទៅហើយ ស្របគ្នាដែលគេក៏ជាកីឡាករវាយស៊ូ ទៀតគឺលោកពេញចិត្ត ។
ទោះបីយ៉ាងណា លោកថា កីឡាករកម្ពុជាដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ ។ ដោយឡែកសម្រាប់គូប្រកួតជម្រុះដណ្ដើមយកកៅអី២នាក់ក្នុងសប្ដាហ៍នេះ ត្រូវបានគេអះអាងថាសុទ្ធតែត្រៀមខ្លួនរួចរាល់មុនការឡើងរេញ ដែលក្នុងវគ្គកន្លងមកគឺល្អមើលរួចស្រេចដូចគ្នា ៕
ចែករំលែកព័តមាននេះ