រាជធានីភ្នំពេញ ៖ មកទល់ពេលនេះ កីឡាករ ឈាវ បូរ៉ា ដែលល្បីល្បាញផ្នែកអុកចត្រង្គ ឬអុកខ្មែរ បន្ទាប់ពីលោកដណ្ដើមបានពានស្ដេចអុក២ឆ្នាំជាប់គ្នាកាលពីប៉ុន្មានឆ្នាំមុនក្នុងព្រឹត្តិការណ៍អង្គរសង្ក្រាន្តសៀម
រាប នៅមិនទាន់សម្រេចបំណងទទួលបានការ បណ្ដុះបណ្ដាលផ្នែកអុកអន្តរជាតិនៅក្រៅប្រទេសដូចការគ្រោងទុកនោះទេ ដោយសារតែលោកមិនមានលទ្ធភាពចេញទៅសិក្សាដោយខ្លួនឯង ។ ទោះបីយ៉ាងណា លោកនៅតែមានមហិច្ឆតាចង់ចេះស្ទាត់ជំនាញនេះ ដោយរំពឹងថាការសិក្សាស្វែងយល់ពីអុកអន្តរជាតិ តាមប្រព័ន្ធយូធូបកន្លងមក នឹងអាចឱ្យលោកចូលប្រកួតអុកអន្តរជាតិ ហើយក្លាយជាកីឡាករល្បីក្នុងជំនាញនេះផងដែរ។
លោក ឈាវ បូរ៉ា ដែលជាស្ដេចអុក២ជំនាន់ដ៏ល្បីល្បាញ និងជាអគ្គលេខាធិការសហព័ន្ធកីឡាអុកចត្រង្គកម្ពុជាបានអះអាងថា នៅក្នុងប្រទេសកម្ពុជាលោកត្រូវបានគេទទួលស្គាល់ហើយថាជាអ្នកមានជំនាញផ្នែកអុកចត្រង្គ ឬអុកខ្មែរ ប៉ុន្តែជំនាញដែលលោកចេះនេះ គឺពេញនិយមតែនៅតំបន់ជិតខាងរួមមានថៃ ឡាវនិងវៀតណាមប៉ុណ្ណោះ ចំណែកនៅបណ្ដាពិភពលោកទាំងមូលគេនិយមលេងអុកអន្តរជាតិ និងអុកចិនច្រើនជាង ទើបលោកចង់ចេះជំនាញនោះឱ្យស្ទាត់ ។
លោកថា អុកចិន និងអុកអន្តរជាតិ មានលក្ខណៈខុសគ្នាដាច់ឆ្ងាយពីអុកចត្រង្គរបស់ខ្មែរតាំងពីរបៀបលេង រចនាបថ និងចំណុចពិសេសជាច្រើនទៀត ដែលធ្វើឱ្យអុកទាំង២មិនអាចច្រឡំគ្នាបានទេ បើទោះជាមានឈ្មោះថាអុកដូចគ្នាយ៉ាងណាក្ដី ។ អ៊ីចឹងហើយទើបនៅប្រទេសកម្ពុជាត្រូវបានបែងចែកកីឡាអុកជាពីរគឺអុកចត្រង្គ និងអុកអន្តរជាតិ ប៉ុន្តែលោកថាកីឡាអុកអន្តរជាតិនៅកម្ពុជាមិនសូវដើរទេ ដោយសារតែកីឡាករភាគច្រើននិយមលេងតែអុកខ្មែរ ហើយសម្រាប់ការប្រកួតក្នុងស្រុកក៏មិនសូវមានការប្រកួតអុកអន្តរជាតិផុសផុល ដែលនាំឱ្យមានការចាប់អារម្មណ៍លើអុកអន្តរជាតិ។
ក្នុងនោះគ្រូបង្វឹកផ្នែកអុកអន្តរជាតិដែលមានជំនាញអុកអន្តរជាតិ ក៏មិនមានអ្នកពិតប្រាកដមកបណ្ដុះដល់កូនខ្មែរដែលចង់ចេះនោះដែរ ទើបធ្វើឱ្យសូម្បីតែលោកដែលចង់ចេះផ្នែកអុក ចត្រង្គ មិនមានជម្រើសក្រៅពីលេងតាមយូធូប ប្រសិនបើចង់ចេះស្ទាត់ ។ លោកចង់ឱ្យប្រទេសកម្ពុជាមានការរីកចម្រើនលើវិស័យកីឡាអុកអន្តរជាតិឱ្យច្រើនជាង ឬបានស្មើនឹងអុកចត្រង្គដោយសារតែលោកយល់ថា បើកម្ពុជាមានតែ
អុកខ្មែររីកចម្រើនហើយចូលមិនចុះនឹងអុកអន្តរជាតិ គឺមិនខុសពីល្បីតែក្នុងអណ្ដូង តែលទ្ធផលចុងក្រោយមិនអាចបោះជំហានស្មើមុខស្មើមាត់លើឆាកអន្តរជាតិនោះឡើយ ។
លោកថា កីឡាអុកខ្មែរមានការរីកចម្រើនក្នុងប៉ុន្មានឆ្នាំចុងក្រោយដោយលោកបើកសាលាបណ្ដុះបណ្ដាល ក៏មានអ្នករៀនច្រើនដែរ ប៉ុន្តែនៅពេលមានការអញ្ជើញឱ្យតំណាងកម្ពុជាចេញប្រកួតកីឡាអុកជាមួយនឹងបណ្ដាប្រទេសផ្សេងៗ គឺកម្ពុជានៅតែទៅមិនរួច ។ លោកថា ខ្លួនចង់បង្វឹកខ្លួនឯងឱ្យចេះលេងអុកអន្តរជាតិក្នុងពេលខាងមុខ ប៉ុន្តែមកទល់ពេលនេះអុកអន្តរជាតិអត់មានអ្នកបង្រៀននៅក្នុងប្រទេសកម្ពុជាទាល់តែសោះ គឺមានតែនៅក្រៅស្រុកទើបលោកមានបំណងស្នើឱ្យគណៈកម្មាធិការជាតិអូឡាំពិកកម្ពុជាប្រើយុទ្ធសាស្ត្របែបណាដើម្បីឱ្យកម្ពុជាមានគ្រូបង្វឹកផ្នែកកីឡាអុកអន្តរជាតិ ដើម្បីជាប្រយោជន៍ដល់កីឡាករអុកចត្រង្គ ដោយលោកប្រកាសថា បើមានគឺលោកនឹងស្ម័គ្រចិត្តធ្វើជាអ្នកទៅសិក្សាមុនគេ ដើម្បីស្វែងយល់ឱ្យស៊ីជម្រៅ ។
លោកចង់ឱ្យកីឡាអុកអន្តរជាតិមានរូបភាពទូលំទូលាយនៅក្នុងប្រទេស ហើយបើលោកបានទទួលការជ្រោមជ្រែងឱ្យចេញទៅហាត់រៀននៅក្រៅប្រទេស នោះលោកនឹងធ្វើការចាកចេញទៅសិក្សាជំនាញនោះឱ្យបានស្ទាត់ដូចការចង់បាន គឺលោកនឹងប្រឹងប្រែងឱ្យអស់ពីសមត្ថភាព ។ លោកនៅចង់ក្លាយជាអ្នកជំនាញផ្នែកអុកអន្តរជាតិ បើទោះជាលោកគឺជាអគ្គលេខាធិការសហព័ន្ធអុកចត្រង្គ ដែលមិនអាចទៅធ្វើជាកីឡាករអុកអន្តរជាតិ នៅក្នុងសហព័ន្ធមួយផ្សេងទៀតក្ដី ។
លោកថា ខ្លួនចង់ចេះជំនាញនេះស្ទាត់ ដើម្បីទុកគ្រាន់បង្ហាត់សិស្សផង ឬអាចវិវត្តន៍ខ្លួនក្លាយជាកីឡាករអុកអន្តរជាតិផងនៅពេលណាមួយ ដោយសារតែលោកនៅមានបំណងធំមួយ គឺចង់ឈ្នះពានក្នុងនាមជាម្ចាស់ជើងឯកអុកអន្តរជាតិមួយទៀត បន្ទាប់ពីបានក្លាយជាម្ចាស់ពានជើងឯកអុកខ្មែរច្រើនដងមកហើយ ។ យ៉ាងណាមិញ នៅក្នុងកាលៈទេសៈ ដែលកម្ពុជាមិនទាន់មានអ្នកបង្វឹកក្នុងស្រុក លោកនៅតែបន្តរៀនលេងអុកអន្តរជាតិតាមបណ្ដាញយូធូប ដោយលោកប្រកាសថា បើរៀនស្ទាត់ជំនាញដូចការចង់បាន គឹនឹងសាកល្បងចូលប្រកួតក្នុងកម្មវិធីណាមួយឱ្យខាងតែបាន ។
ប្រសិនបើការប្រកួតមានលទ្ធផលល្អ នោះលោកនឹងងាកមកបើកបង្រៀនអុកអន្តរជាតិនេះមួយទៀត ដើម្បីចែករំលែកចំណេះដឹង និងដើម្បីឱ្យលោកទទួលបានកេរ្តិ៍ឈ្មោះល្បីល្បាញលើអាជីពនេះបន្ថែម ៕
ចែករំលែកព័តមាននេះ