រាជធានីភ្នំពេញ ៖ ព្រឹត្តិការណ៍ប្រដាល់ ដែលដាក់ឈ្មោះថា«អធិរាជគុនខ្មែរ»នឹងចាប់ ផ្ដើមបើកការប្រកួតជាផ្លូវការហើយនៅថ្ងៃ អាទិត្យទី១២ ឧសភា ខាងមុខនេះ លើសង្វៀនទូរទស្សន៍PNNវេលាម៉ោង១២ថ្ងៃត្រង់ដោយបានប្រមូលផ្ដុំទៅដោយកីឡាករជើងខ្លាំងកម្ពុជា៨នាក់ និងថៃ៨នាក់ ឱ្យប្រកួតដណ្ដើមចំណាត់ថ្នាក់លេខ១ដើម្បីទទួលទឹកប្រាក់រង្វាន់ចំនួន១ម៉ឺនដុល្លារអាមេរិក។
តាមរយៈសន្និសីទសារព័ត៌មានមួយដែលបានធ្វើឡើងនៅសង្វៀនទូរទស្សន៍៍PNNក្នុងតំបន់អភិវឌ្ឍន៍លីយ៉ុងផាត់ កាលពីព្រឹកថ្ងៃទី៨ឧសភា កន្លងមកនេះ ឱ្យដឹងថា ព្រឹត្តិការណ៍ប្រកួតប្រដាល់«អធិរាជគុនខ្មែរ»ជាកម្មវិធីប្រកួតប្លែកដែលមិនធ្លាប់មានទាល់តែសោះនៅក្នុងប្រទេសកម្ពុជាពីមុនមក ។ សង្ឃឹមថាតាមរយៈកម្មវិធីប្រដាល់នេះនឹងធ្វើឱ្យអ្នកនិយមតាមដានការប្រកួតពិតជាជក់ចិត្តមិនខាន ។
ការប្រកួតនេះធ្វើឡើងក្នុងប្រភេទទម្ងន់៦០គីឡូក្រាម និងចែកចេញជាពីរពូល ។ ពូលកម្ពុជាមានកីឡាករ ឃុន ឌីម៉ា, ឡៅ ចិត្រា, សុខ សាវិន, លន បញ្ញា, កូយ ឡាយ, ធន់ មករា, ឡុង ជិន និងសារឿន ចាន់ ដែលត្រូវឡើងតតាំងជាមួយជើងខ្លាំងមកពីថៃចំនួន៨រូបទៀត។
ការប្រកួតនេះធ្វើឡើងតាមរូបមន្តចាញ់ធ្លាក់ៗ ដោយពុំមានការសន្សំពិន្ទុអ្វីឡើយ ។ ជារៀង រាល់ខែមានកីឡាករកម្ពុជាចំនួន២នាក់ប្រកួតជាមួយកីឡាករថៃ២នាក់ដើម្បីស្វែងរកអ្នកឈ្នះចំនួន២នាក់ឡើងទៅប្រកួតដណ្ដើមជើងឯកខ្សែក្រវាត់ប្រាក់ ។ បន្ទាប់ពីរកឃើញ ម្ចាស់ខ្សែក្រវាត់ប្រាក់ទាំង៤នាក់រួចមក ពួកគេនឹងត្រូវឡើងទៅតតាំងគ្នានៅវគ្គពាក់កណ្ដាលផ្ដាច់ព្រ័ត្រ ដើម្បីឆ្ពោះទៅប្រកួតដណ្ដើមជើង ឯកខ្សែក្រវាត់«អធិរាជគុនខ្មែរ»ដែលមាន ទឹកប្រាក់រហូតដល់ទៅ១ម៉ឺនដុល្លារអាមេរិក។
លោក ងិន ភារម្យ តំណាងឱ្យសហព័ន្ធកីឡា ប្រដាល់គុនខ្មែរបានមានប្រសាសន៍ផ្ដាំផ្ញើទៅដល់កីឡាករប្រដាល់ទាំងអស់ត្រូវតែប្រឹងប្រែង ប្រកួតឱ្យអស់ពីសមត្ថភាព រក្សាឱ្យបាននូវក្រមសីលធម៌ក្នុងនាមំណាងម្ចាស់ក្បាច់គុនបូរាណខ្មែរ ។ លោកសង្ឃឹមថា គ្រប់បណ្ដាក្លិបទាំងអស់នឹងចូលរួមសហការគ្នាធ្វើឱ្យការប្រកួតប្រព្រឹត្ត ទៅដោយរលូនតាំងពីដើមដល់ចប់៕
ចែករំលែកព័តមាននេះ