បញ្ហាដែលស្មាតហ្វូន Galaxy Fold របស់ Samsung កំពុងជួបប្រទះប្រៀបដូចជាកំពុងតែពន្យាពេលនៃការចេញលក់ស្មាតហ្វូននេះលើទីផ្សារបន្ថែមទៀត ។ ក្រុមហ៊ុន Samsung មានគម្រោងចេញលក់ Galaxy Fold នៅថ្ងៃទី២៦ ខែមេសា ។ ប៉ុន្តែប៉ុន្មានថ្ងៃមុនពេលកំណត់ ក្រុមហ៊ុនបច្ចេកវិទ្យាកូរ៉េខាងត្បូងនេះបានពន្យាពេលថ្ងៃចេញលក់ជាផ្លូវការនៃស្មាតហ្វូនតម្លៃ២ពាន់ដុល្លាររបស់ខ្លួនបន្ទាប់មានការរាយការណ៍មកថា Galaxy Fold មួយចំនួនមានបញ្ហា ។
ក្រុមត្រួតពិនិត្យផលិតផលបានជួបនឹងបញ្ហាស្គ្រីនបែកបាក់ ស្គ្រីនលោតៗ និងមានករណីមួយស្គ្រីនបានបំប៉ោងឡើងថែមទៀត ។ ស្មាតហ្វូនដែលអាចបត់បែនបានគឺជាស្មាតហ្វូនថ្មីមួយប្រភេទដែលកំពុងទាក់ទាញចំណាប់អារម្មណ៍អតិថិជនជុំវិញពិភពលោក ។ ការច្នៃម៉ូដស្មាតហ្វូនទាំងនេះផ្តល់ជាស្មាតហ្វូនដែលមានស្គ្រីនធំជាងមុនទ្វេដង ប៉ុន្តែនៅតែមានទំហំតូចគ្រប់គ្រាន់សម្រាប់ការយកតាមខ្លួន ។ ប៉ុន្តែស្មាតហ្វូនដ៏ទំនើបនេះមានតម្លៃដើមចាប់ពី ១,៩៨០ដុល្លារឯណោះក្នុងមួយគ្រឿង ហើយកង្វល់ទាក់ទិននឹងភាពរឹងមាំរបស់វានៅតែមានច្រើនដដែល ។
Samsung បានផ្តល់ដំណឹងដល់អតិថិជនដែលបានកម្ម៉ង់ Galaxy Fold ទាក់ទិននឹងការពន្យាពេលនេះ និងបាននិយាយថាពួកគេនឹងផ្តល់ពត៌មានលម្អិតនៅកំឡុងពេលពីរសប្តាហ៍។ ពីរសប្តាហ៍បានកន្លងផុត ហើយអតិថិជនដែលបានកម្ម៉ង់នៅមិនទាន់ដឹងច្បាស់ពីកាលបរិច្ឆេទដែលទូរស័ព្ទនេះនឹងមកដល់ក្នុងដៃរបស់ពួកគេនៅឡើយទេ ។
Samsung បាននិយាយថាពួកគេកំពុងតែធ្វើការក្នុងការបង្កើនគុណភាពរបស់ទូរស័ព្ទដែលធ្វើឲ្យពួកគេមិនអាចបញ្ជាក់ប្រាប់ពីកាលបរិច្ឆេទក្នុងការចេញលក់នៅឡើយ។ ក្រុមហ៊ុននេះមិនទាន់ទូទាត់ថវិកាជាមួយនឹងអតិថិជនឡើយ ហើយពួកគេក៏អនុញ្ញាតឲ្យអតិថិជនលុបការកម្ម៉ង់ដែរប្រសិនបើពួកគេផ្លាស់ប្តូរគំនិត។
Samsung បាននិយាយក្នុងអ៊ីមែលថា ប្រសិនបើ Galaxy Fold មិនអាចត្រូវបានដាក់លក់នៅថ្ងៃទី៣១ខែឧសភានោះទេ ការកម្ម៉ង់នឹងត្រូវបានលុបចោលដោយស្វ័យប្រវត្តិប្រសិនបើអតិថិជនមិនបញ្ជាក់ប្រាប់ក្រុមហ៊ុនសាជាថ្មីថាពួកគេចង់បន្តការកម្ម៉ង់ ៕
ចែករំលែកព័តមាននេះ