រាជធានីភ្នំពេញ ៖ សមត្ថកិច្ចប៉ុស្តិ៍នគរបាលរដ្ឋបាលទួលសង្កែទី២បានធ្វើការដកហូតម៉ូតូចំនួន២គ្រឿងយកទៅរក្សាទុក បន្ទាប់ពីមានជនសង្ស័យចំនួន២នាក់បានជិះទៅធ្វើសកម្មភាពគាស់ទ្វារទូរកុងតឺន័រលួចយកសំបកកង់រថយន្ត តែក៏ត្រូវម្ចាស់ដឹងទាន់ ធ្វើឱ្យជនសង្ស័យនាំគ្នារត់គេចខ្លួនបាត់ស្រមោល បន្សល់ទុកម៉ូតូ២គ្រឿងនៅកន្លែងកើតហេតុ ។
ហេតុការណ៍ខាងលើនេះបង្កឲ្យមានការភ្ញាក់ផ្អើលឡើងកាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី៩ ខែឧសភា ឆ្នាំ២០១៩ ត្រង់ចំណុចឃ្លាំងស្តុកសំបកកង់រថយន្តគ្មានយីហោមួយកន្លែង ស្ថិតតាមបណ្ដោយផ្លូវលំ ខាងក្រោយភោជនីយដ្ឋានយីហោ ដឹ ធើ រេស ក្នុងសង្កាត់ទួលសង្កែទី២ ខណ្ឌឬស្សីកែវ។
ម៉ូតូទាំង២គ្រឿងរបស់ក្រុមជនសង្ស័យបន្សល់ទុកនៅកន្លែងកើតហេតុ ហើយ ត្រូវបានសមត្ថកិច្ចដកហូតយកទៅរក្សាទុកនោះរួមមាន មួយគ្រឿងម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ កណ្តាល ១R-០៨២៤ និងមួយគ្រឿងទៀតម៉ាក GPX ពណ៌សលាយក្រហម គ្មានស្លាកលេខ។
បើតាមប្រភពពីបុរសម្នាក់ជាម្ចាស់ឃ្លាំងកើតហេតុខាងលើមិនបញ្ចេញឈ្មោះបានរៀបរាប់ប្រាប់ឲ្យដឹងថា ឃ្លាំងរបស់គាត់ខាងលើ គឺគ្មានអ្នកនៅដេកយាមនោះទេ មានតែទូរកុងតីន័រប្រមាណជាង១០ទូ ដែលគាត់ច្នៃធ្វើសម្រាប់ដាក់ស្តុកសំបកកង់រថយន្តនៅខាងក្នុង ចាក់សោចោលដោយមិនដែលមានបញ្ហានោះទេនាពេលកន្លងមក។
តាមប្រភពដដែលបានបន្តថា នៅមុនពេលកើតហេតុ កាលពីយប់ថ្ងៃទី៧ និងថ្ងៃទី៨ ឧសភា កន្លងទៅថ្មីៗនោះ ក៏ស្រាប់តែមានក្រុមជនសង្ស័យបានធ្វើសកម្មភាពផ្លោះរបងចូលក្នុងឃ្លាំង គាស់សោទ្វារទូកុងតឺន័រលួចយកសំបកកង់រថយន្តអស់ជាច្រើនគ្រាប់បានដោយសុវត្ថិភាពជាបន្តបន្ទាប់។ ក្នុងនោះលើកទី១-ក្រុមជនសង្ស័យលួចយកសំបកកង់រថយន្តប្រភេទរថយន្តតូចៗ អស់ចំនួនជាង១០គ្រាប់ និងលើកទី២-ក្រុមជនសង្ស័យលួចយកសំបកកង់រថយន្តប្រភេទរថយន្តដឹកដី អស់ចំនួន១០គ្រាប់ សរុបចំនួនសំបកកង់រថយន្តដែលត្រូវក្រុមជនសង្ស័យធ្វើសកម្មលួចយកទៅនោះ គិតជាទឹកប្រាក់អស់ប្រមាណជាង៣០០០ដុល្លារ។ បន្ទាប់ពីមានហេតុការណ៍ដូចច្នេះ គាត់ក៏បានកែច្នៃកន្លែងចាក់សោទ្វាទូកុងតឺន័របន្ថែមដើម្បីកុំឲ្យងាយស្រួលក្រុមជនសង្ស័យធ្វើការលួចគាស់បានសម្រេចទៀត។
តាមប្រភពដដែលបានបន្តទៀតថា រហូតដល់ល្ងាចថ្ងៃកើតហេតុខាងលើ ដោយសារតែគាត់បានគិតថា ក្រុមជនសង្ស័យនឹងមកធ្វើសកម្មភាពលួចសំបកកង់រថយន្តជាថ្មីម្តងទៀត ទើបគាត់រៀបចំគម្រោងការ ដោយធ្វើជាចាក់សោទ្វារទូកុងតីន័រ និងទ្វាររបងទុកចោលដូចសពដងជាធម្មតា ហើយគាត់បានយកទូរស័ព្ទមួយគ្រឿងទៅបង្កប់ទុកក្បែរទូកុងតឺន័រដែលនៅក្នុងឃ្លាំង រួចក៏បានយកទូរស័ព្ទមួយគ្រឿងផ្សេងទៀតតេទៅ ដើម្បីធ្វើជាឧបករណ៍ស្រូបសំឡេង។
តាមប្រភពដដែលបានបន្តទៀតថា បន្ទាប់មកគាត់ក៏បានទៅអង្គុយស្តាប់ក្នុងរថយន្តរបស់គាត់ដែលចតនៅឆ្ងាយពីឃ្លាំងស្តុកសំបកកង់រថយន្តខាងលើប្រមាណ៥០០ម៉ែត្រ លុះដល់វេលាកើតហេតុ គាត់ក៏បានឮសំឡេងឆ្កែព្រុសតាមទូរស័ព្ទដែលគាត់បានបង្កប់ទុកនៅក្នុងឃ្លាំងរបស់គាត់ខាងលើ។ ភ្លាមៗនោះគាត់ក៏ប្រញាប់ប្រញាល់រាយការណ៍ជូនសមត្ថកិច្ចមូលដ្ឋានចុះមកជួយអន្តរាគមន៍ភ្លាមៗ។
តាមប្រភពដដែលបានបន្តទៀតថា បន្ទាប់មក គាត់ក៏បានចូលទៅមើលក្នុងឃ្លាំង ស្រាប់តែប្រទះក្រុមជនសង្ស័យចំនួន២នាក់កំពុងធ្វើសកម្មភាពគាស់សោទ្វារទូកុងតឺន័រដាក់ស្តុកសំបកកង់រថយន្តខាងលើ ខណៈនោះក្រុមជនសង្ស័យបានដឹងខ្លួនក៏នាំគ្នាផ្លោះរបងរត់គេចខ្លួនបាត់ស្រមោល បន្សល់ទុកម៉ូតូចំនួន២គ្រឿង រួមជាមួយឧបករណ៍ជក់ថ្នាំញៀនមួយកំផ្លេ នៅក្នុងដីឡូត៍ក្បែរកន្លែងកើតហេតុ។
ក្រោយពេលកើតហេតុ សមត្ថកិច្ចមូលដ្ឋានក៏បានយកម៉ូតូរបស់ក្រុមជនសង្ស័យទាំងពីរគ្រឿងនោះទៅរក្សាទុកនៅប៉ុស្តិ៍នគរបាលរដ្ឋបាលទួលសង្កែទី២ ដើម្បីធ្វើការស្រាវជ្រាវរកមុខក្រុមជនសង្ស័យយកមកផ្តន្ទាទោសតាមផ្លូវច្បាប់៕
ចែករំលែកព័តមាននេះ