តារាស្រីដែលប្រឡូកក្នុងអាជីពជាពិធីការិនី ហើយក្លាយជាតារាចម្រៀង កញ្ញា មាស អាលីស បានទទួលជោគជ័យក្នុងអាជីពរបស់ខ្លួនយ៉ាងខ្លាំង ដោយក្រៅពីមានមុខឡើងប៉ុស្តិ៍ទូរទស្សន៍មិនសូវលោះពេល នាងក៏បានច្រៀងប្រចាំក្នុងហាងធំមួយយ៉ាងកាលីបផងដែរ ដោយសារតែទឹកដមសំលេងរបស់នាងស្រដៀងគ្នា អ្នកចម្រៀង អ្នកនាង ហួយ មាស។
នាងក៏ទើបតែត្រូវបានស្ថានទូតអាមេរិក ផ្ដល់សិទ្ធិឱ្យចេញទៅច្រៀងសហរដ្ឋអាមេរិកជាលើកដំបូងនៅចុងខែឧសភា នេះផងដែរ ខណៈដែលនាងប្រកាសថា សុខចិត្តទម្លាក់ចោលការងារក្នុងស្រុកទាំងអស់ គ្រាន់តែបានដំណឹងជាប់ទៅច្រៀង។
កញ្ញា មាស អាលីស បានបង្ហាញអារម្មណ៍រំភើបយ៉ាងខ្លាំងដែលការប្រែខ្លួនធ្វើជាតារាចម្រៀងរបស់នាង ទទួលបានជោគជ័យ ហើយធ្វើឱ្យនាងត្រូវបានបងប្អូនខ្មែររស់នៅប្រទេសអាមេរិក ហើយសំណាងត្រូវបានសម្ភាសន៍ជាប់ទៅទៀត។ កញ្ញាថា ខ្លួនត្រូវបានស្ថានទូតអាមេរិកយល់ព្រមឱ្យទិដ្ឋាការទៅសម្ដែងនៅក្នុងប្រទេសនោះរយៈពេល៧ខែ ដោយគម្រោងចាកចេញសម្ដែងរបស់នាង គឺនឹងចេញពីប្រទេសកម្ពុជា នៅអំឡុងចុងខែ៥នេះ។
កញ្ញាថា នេះជាលើកទី១ ដែលខ្លួនមានឱកាសបានចេញនៅក្នុងប្រទេសមហាអំណាច ដែលតារាភាគច្រើនទទួលបានការអញ្ជើញដូចគ្នា តែសម្ភាសន៍ទៅមិនងាយជាប់។ អ្វីដែលនាងកាន់តែសប្បាយចិត្តទៅទៀត គឺកន្លែងដែលនាងច្រៀងប្រចាំថ្ងៃ បានយល់ព្រមផ្ដល់ច្បាប់ឱ្យនាង៧ខែ ក្នុងពេលដែលនាងព្រលយថា បើត្រឡប់មកវិញ កន្លែងច្រៀងប្រចាំថ្ងៃ មិនឱ្យចូលច្រៀង ក៏នាងមិនអាចបោះបង់ឱកាសទៅសម្ដែង៧ខែនៅសហរដ្ឋអាមេរិកនោះដែរ៕
ចែករំលែកព័តមាននេះ