ប្រទេសវៀតណាម ៖ យោងតាមភ្នាក់ងារសារព័ត៌មាន Viet Nam News កាលពីថ្ងៃច័ន្ទកន្លងមកបានឲ្យដឹងថា រដ្ឋាភិបាលវៀតណាមនឹងត្រួតពិនិត្យកំណើនតម្លៃអគិ្គសនីក្នុងពេលថ្មីៗនេះដែលកើនឡើងបាន៨.៣៦% មកស្មើ ៨.០២ដុល្លារក្នុងមួយគីឡូវ៉ាត់ម៉ោងចាប់ពីថ្ងៃទី ២០ ខែមីនា។
យោងទៅតាមឯកសារដែលផ្ញើពីការិ យាល័យរដ្ឋាភិបាលបានឲ្យដឹងថា លោកនាយករដ្ឋមន្ត្រី Nguyen Xuan Phuc បានស្នើដល់ក្រុមអ្នកស៊ើបអង្កេតរដ្ឋាភិបាលឲ្យសហការជាមួយនឹងក្រសួងឧស្សាហកម្មនិងពាណិជ្ជកម្ម ព្រមទាំងក្រសួងហិរញ្ញវត្ថុឲ្យសិក្សាពីការគណនាតម្លៃ និងការប្រមូលថ្លៃអគ្គិសនីផងដែរ។
ក្រុមការងារខាងលើនិងក្រសួងទាំងពីរត្រូវបញ្ជាក់ថាតើកំណើនអគ្គិសនីជារឿងត្រឹមត្រូវឬទេ និងរាយការណ៍ប្រាប់ដល់លោកនាយករដ្ឋមន្ត្រីវិញនៅខែក្រោយ។
ឯកសារខាងលើបានឲ្យដឹងទៀតថា លោកនាយករដ្ឋមន្ត្រីបានសម្រេចចិត្តដូច្នេះបន្ទាប់ពីគ្រួសារជាច្រើនក្នុងប្រទេសរិះគន់ពីកំណើនភ្លាមៗនេះកាលពីខែមេសា។ លោក Do Thang Hai ដែលជាអនុរដ្ឋមន្ត្រីក្រសួងឧស្សាហកម្មនិងពាណិជ្ជកម្មបានចែករំលែកកង្វល់របស់ប្រជាជនទាក់ទិននឹងកំណើនតម្លៃអគ្គិសនីកាលពីខែមុនផងដែរ។ ប៉ុន្តែក្រសួងជាច្រើនបានត្រួតពិនិត្យពីឥទ្ធិពលនៃកំណើននេះដល់ការរស់នៅរបស់ប្រជាជនហើយ។
លោកបានបន្ថែមទៀតថា ក្រសួងលោកបានស្នើដល់ Viet Nam Electricity (EVN) ឲ្យដោះស្រាយរាល់ការរិះគន់របស់ប្រជាជនទាក់ទិននឹងកំណើននេះ ប៉ុន្តែ EVN បាននិយាយថាកំណើននេះមួយផ្នែកក៏មកពីកំណើននៃការប្រើប្រាស់អគ្គិសនីផងដែរដែលបង្កពីអាកាសធាតុក្តៅ។ជាមួយគ្នានេះទៀត តម្លៃផលិតផល និងសេវាកម្មសំខាន់ៗជាច្រើនក៏បានកើនឡើងយ៉ាងខ្លាំងដែរបន្ទាប់ពីតម្លៃអគ្គសិនីនិងប្រេងឥន្ធនៈបានកើនឡើង។
ចែករំលែកព័តមាននេះ