រថយន្ត Toyota នឹងក្លាយជារថយន្តសម្រាប់ព្រះចៅអធិរាជជប៉ុនឡើងថ្មី

ថ្ងៃទី ០៨ ខែ ឧសភា ឆ្នាំ ២០១៩
ម៉ោង ១៤:៣៨
គង់ រិទ្ឋរីណា

ស្រមៃថាអ្នកគឺជាស្តេចនៃរាជវង្សទាំងមូល ហើយអ្នកត្រូវតែជ្រើសរើសឡានសម្រាប់ពិធីគ្រងរាជ្យរបស់អ្នក ។ តើអ្នកនឹងជ្រើសរើសអ្វី? គ្រួសាររាជវង្សមាននិន្នាការប្រើប្រាស់រថយន្តពិសេសៗ ដែលបង្កើតឡើងដោយក្រុមហ៊ុនផលិតរថយន្តក្នុងស្រុក ដូចជារថយន្ត Jaguar E-Type Zero ដែលប្រើសម្រាប់ពិធីមង្គលការរបស់ព្រះរាជបុត្រា Harry និង Meghan Markle ។

នៅពេលព្រះអង្គម្ចាស់រាជាណាចក្រជប៉ុន Naruhito បានរៀបការជាមួយព្រះនាង Masako កាលពីឆ្នាំ ១៩៩៣ ទ្រង់បានប្រើប្រាស់រថយន្តមកពីអង់គ្លេស Rolls-Royce Corniche Convertible ដែលអាចបើកដំបូលបាន ជាជាងការប្រើប្រាស់រថយន្តផលិតនៅក្នុងស្រុក។

ព្រះអង្គម្ចាស់ Naruhito ត្រូវបានកំណត់ ដើម្បីធ្វើជាអ្នកគ្រងរាជ្យបល្ល័ង្កអធិរាជថ្មីរបស់ប្រទេសជប៉ុន។ ទ្រង់ចង់ប្រើប្រាស់រថយន្ត Rolls Royce កាលពីមុនដែរ តែគេប្រាប់ថាវាកំពុងតែខូច។ កាសែត Wall Street Journal បានរាយការណ៍ថា ព្រះអង្គម្ចាស់ Naruhito នឹងប្រើឡានមួយគ្រឿង ដែលផលិតនៅក្នុងស្រុក។

មានតែឡានជប៉ុនមួយគ្រឿងប៉ុណ្ណោះ ដែលសមស្របនឹងអធិរាជ។ វាគឺជារថយន្ត Toyota Century។ ក្រុមហ៊ុន Toyota មិនដែលបានលក់រថយន្ត Century នៅសហរដ្ឋអាមេរិចនោះទេ ដោយសារតែមានមនុស្សតិចតួច ដែលហ៊ានជះលុយខ្ទង់ ២សែនដុល្លារទៅលើរថយន្ត Toyota។

រថយន្ត Century សេរ៊ីចាស់ ប្រើប្រាស់ម៉ាស៊ីន V12 ខណៈដែលសេរ៊ីថ្មីប្រើប្រាស់ម៉ាស៊ីន V8 ដែលមានទំហំស៊ីឡាំង 5.0-liter។ វាមានថាមពលដល់ទៅ ៤៣១សេះ ដែលស្មើទៅនឹងរថយន្ត Lexus LS600h សេរ៊ីមុន។

Toyota ផលិតរថយន្តនេះបានត្រឹមតែខ្ទង់ ៥០គ្រឿងក្នុងមួយខែប៉ុណ្ណោះ។ ដូច្នេះអ្នកទិញត្រូវរង់ចាំយូរ ទម្រាំតែដល់វេនរបស់ខ្លួន។ តែយើងមានការជឿជាក់ថា អធិរាជជប៉ុនថ្មីនឹងអាចយករថយន្តនោះមកប្រើប្រាស់បានភ្លាមៗ។ រថយន្តប្រណិតប្រភេទនេះ គឺមានភាពពេញនិយមនៅក្នុងចំណោមនាយកប្រតិបត្តិ អ្នកនយោបាយ និង ពេលនេះគឺខ្សែរាជវង្ស។

គួរបញ្ជាក់ផងដែរថា រថយន្ត Century របស់អធិរាជថ្មី នឹងជារថយន្តបើកដំបូល Convertible។ ព័ត៌មានលម្អិតនៅមិនទាន់ច្បាស់នៅឡើយទេ តែខាងរាជរដ្ឋាភិបាលជប៉ុនបញ្ជាក់ថា រថយន្តនោះគឺជារថយន្តបើកដំបូល។ ដូចនេះមានន័យថា Toyota ត្រូវកាត់ដំបូលចេញ ដូចទៅនឹងក្នុងរូប ដែលយើងបានឃើញស្រាប់៕