រាជធានីភ្នំពេញ ៖ យោងតាមប្រភពព័ត៌មានពីមន្ត្រីក្រសួងសាធារណការ និងដឹកជញ្ជូន ដែលអាចជឿទុកចិត្តបានបានឲ្យដឹងថា ក្នុងពេលនេះ មន្ត្រីជំនាញរបស់ក្រសួងសាធារណការ និងដឹកជញ្ជូន បាននិងកំពុងតែមមារញឹកចងក្រងរៀបចំឯកសារផ្លូវការ ដើម្បីបញ្ចូលទិន្នន័យក្នុងប្រពន្ធ័ស្វ័យប្រវត្តិកម្ម ដាក់ឲ្យដំណើរការប្រឡងយកប័ណ្ណបើកបរ សម្រាប់អ្នកដែលមិនចេះអក្សរ ។
មន្ត្រីដដែលបានឲ្យដឹងទៀតថា គម្រោងការខាងលើនេះ ក្រសួងសាធារណការ បានកំណត់យកនៅត្រឹមថ្ងៃទី៣០ ឧសភានេះ រៀបចំឲ្យបានរួចរាល់ និងអាចដាក់ឲ្យដំណើរការនៅអំឡុងខែមិថុនា ឆាប់ៗនេះ ។ មន្ត្រីដដែលបានបន្តថា ជាធម្មតាការប្រឡងសម្រាប់អ្នកចេះអក្សរ ត្រូវប្រឡងទ្រឹស្តីតាមរយៈសំនួរចម្លើយ ដោយធិកលើកុំព្យួរទ័រ ពេលជាប់ទើបបន្តទៅប្រឡងដៃចង្កូតទៀត ទាល់តែជាប់ទាំងពីរនេះ បានចេញលទ្ធផលថាជាប់ ។
ចំណែកឯកសារដែលគ្រោងបញ្ជូលក្នុងទិន្នន័យកុំព្យួរទ័រ ប្រពន្ធ័ស្វ័យប្រវត្តិកម្ម ការប្រឡងសម្រាប់អ្នកមិនចេះអក្សរ អាចផ្លាស់ប្តូរតែកម្មវិធីប្រឡងទ្រឹស្តីតាមរយៈកុំព្យួរទ័រទេ ហើយក៏អាចមិនមានជាអក្សរដែរ គឺមានតែរូបភាព និងសំឡេងតែម្តង ឬក៏អាចមានសំនួរផ្ទាល់មាត់ខ្លះក៏ថាបាន ប៉ុន្តែទោះជាយ៉ាងណា ក្រសួងបានកំណត់យកការប្រឡងគ្រប់វិញ្ញាសា ត្រូវតែមានការត្រួតពិនិត្យដោយគណៈកម្មការមេប្រយោគផង និងត្រួតពិនិត្យតាមរយៈប្រពន្ធ័កាមេរ៉ាសុវត្ថិភាព ស្វ័យប្រវត្តិផងដែរ ។
មន្ត្រីដដែលបានបញ្ជាក់ទៀតថា ក្នុងពេលបច្ចុប្បន្ននេះ ប្រជាពលរដ្ឋខ្មែរ ដែលមិនចេះអក្សរខ្មែរមានតិចទេ គឺមិនដល់៣%ផង នៃប្រជាពលរដ្ខសរុប ចំណែកអ្នកបេីកបរមិនចេះអក្សរខ្មែរ ភាគច្រេីនអ្នករត់ម៉ូតូកង់បីតែម្តង ព្រោះពួកគាត់មកពីបណ្តាខេត្តនានា មករត់នៅរាជធានីភ្នំពេញ ។ម៉ូតូកង់បីនៅភ្នំពេញមានជិត២ម៉ឺន៥ពាន់គ្រឿង មន្ត្រីជំនាញអំពាវនាវឲ្យអ្នកបើកបររួសរាន់ទៅរៀន និងប្រឡងយកប័ណ្ណបើកបរឲ្យបានគ្រប់ៗគ្នា ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានអោយកោះសន្តិភាពដឹងថា ម៉ូតូកង់បីដែលបានចុះបញ្ជីផ្លូវការ និងកំពុងធ្វើចរាចរណ៏ក្នុងរាជធានីភ្នំពេញ មានចំនួន២៤.៤២៩គ្រឿង ក្នុងនោះម៉ូតូកង់បីខ្មែរមានចំនួន១០.០៩១គ្រឿង និងម៉ូតូកង់បីឥណ្ឌាមានចំនួន១៤.៣៣៨គ្រឿង ដែលអ្នកបើកបរមិនទាន់មានប័ណ្ណបើកបរត្រឹមត្រូវ និងត្រូវឲ្យពួកគាត់រួសរាន់ទៅរៀនច្បាប់ និងប្រឡងយកប័ណ្ណបើកបរឲ្យបានគ្រប់ៗគ្នា ។
លោក សាំ ពិសិដ្ឋ បានឲ្យដឹងទៀតថា ក្នុងរយៈពេលកន្លងមក ក្រុមបងប្អូន អ្នកបើកបរត្រីចក្រយានយន្ត ជាពិសេសរ៉ឺម៉កម៉ូតូកង់បី ភាគច្រើនពុំមានប័ណ្ណបើកបរត្រឹមត្រូវ ព្រមទាំងមិនទាន់បានយល់ដឹងពីច្បាប់ និងស្លាកសញ្ញាចរាចរណ៏ឲ្យបានត្រឹមត្រូវនោះដែរ ។ ដោយសារហេតុផលបែបនេះ ទើបគណៈកម្មាធិការសុវត្ថិភាពចរាចរណ៍ផ្លូវគោក ក្រសួងសាធារណការ និងរដ្ឋបាលរាជធានីភ្នំពេញ បានចាត់ឲ្យមន្ទីរសាធារណការ និងដឹកជញ្ជួនរាជធានីភ្នំពេញ រៀបចំវគ្គបណ្តុះបណ្តាលច្បាប់ចរាចរណ៍ផ្លូវគោកដោយឥតគិតថ្លៃ ដើម្បីឲ្យបងប្អូនរត់ម៉ូតូកង់បីចេះច្បាប់ចរាចរណ៍ និងឲ្យមានប័ណ្ណបើកបរត្រឹមត្រូវតាមផ្លូវច្បាប់ ។
លោកបន្តថា វគ្គបណ្តុះបណ្តាលនោះ មានរយៈពេល២ខែ គឺគិតចាប់ពីថ្ងៃទី២ ខែមីនា ដល់ថ្ងៃទី៤ ខែឧសភា ដែលទើបតែបញ្ចប់ក្នុងពេលថ្មីៗនេះ និងត្រូវបានចែកចេញជា៩វគ្គ ដោយមានអ្នកចូលរៀនវគ្គសរុបចំនួន៦.៤៣៥នាក់ បេក្ខជនដាក់ពាក្យប្រឡងចំនួន៣.០៦០នាក់ អវត្តមានចំនួន១១៤នាក់ និងប្រឡងជាប់មានចំនួន១.៦១០នាក់ ។
លោក សាំ ពិសិដ្ឋ បានបញ្ជាក់ថា ការបណ្តុះបណ្តាលនេះ គឺជាធ្វើឡើងដោយឥតគិតថ្លៃ តែសិក្ខាកាមដែលជាម្ចាស់ម៉ូតូកង់បី ដាក់ពាក្យប្រឡងនោះ ត្រូវបង់ថ្លៃសេវារដ្ឋ សរុបរួមចំនួន៤ម៉ឺនរៀល ក្នុងនោះពិនិត្យសុខភាព១ម៉ឺនរៀលផងដែរ ។ ចំពោះបងប្អូនមានប័ណ្ណបើកបររថយន្ត បើទៅបើកបរម៉ូតូកង់បីក៏ត្រូវតែមានប័ណ្ណបើកបរម៉ូតូកង់បីដែរ ។
លោកនាយកមន្ទីរសាធារណការ និងដឹកជញ្ជូនរាជធានីភ្នំពេញ បានអំពាវនាវឲ្យបងប្អូនជាអ្នកបើកបរម៉ូតូកង់បីទាំងអស់ រួសរាន់ទៅរៀន និងប្រឡងយកប័ណ្ណបើកបរឲ្យបានគ្រប់ៗគ្នា ជៀសវាងសមត្ថកិច្ចធ្វើការត្រួតពិនិត្យ តាមផ្លូវ ចំណែកឯក្រុមការងារ បាននិងកំពុងត្រៀមចាំទទួលបងប្អូនជានិច្ច ។
គួររំលឹកថា លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ នៅក្នុងកិច្ចប្រជុំបូកសរុបការងារ របស់គណៈកម្មាធិការសុវត្ថិភាពចរាចរណ៍ផ្លូវគោក ពីថ្ងៃទី៩ ខែមេសា ឆ្នាំ២០១៩ ធ្លាប់បានបញ្ជាក់ថា ក្រសួងសម្រេចទុកពេល៣ខែ ឱ្យអ្នកប្រកបរបររត់ម៉ូតូកង់បីទាំងអស់ចូលទៅរៀន និងប្រឡងយកប័ណ្ណបើកបរ ដើម្បីរួមចំណែកកាត់បន្ថយគ្រោះថ្នាក់ចរាចរណ៍ និងការកកស្ទះចរាចរណ៍ ក្នុងរាជធានីភ្នំពេញ ។
ចែករំលែកព័តមាននេះ