រាជធានីភ្នំពេញ ៖ ស្របពេលកម្ពុជាកំពុងទទួលបានកំណើនទេសចរចិនមកទស្សនាកម្ពុជាមានការកើនឡើងជារៀងរាល់ឆ្នាំ ជាពិសេសនោះគឺវិស័យទេសចរណ៍កម្ពុជាមិនអាចកាត់ផ្តាច់ចេញពីការស្រូបទាញកំណើននៃលំហូរទេសចរ និងវិនិយោគិនចិនបានឡើយ ។
ជាងនេះទៅទៀតនៅឆ្នាំ២០២០ខាងមុខ កម្ពុជារំពឹងថានឹងទទួលបានភ្ញៀវទេសចរចិនប្រមាណ ៣ លាននាក់ ហើយនឹងកើនឡើងដល់ ៥ លាននាក់នៅ ឆ្នាំ ២០២៥ និង ៨ លាននាក់នៅឆ្នាំ ២០៣០ ដូច្នេះគឺទាមទារឲ្យកម្ពុជាត្រូវពង្រឹងអ្វីខ្លះដើម្បីទាក់ទាញ និងទាញយកផលប្រយោជន៍ពីទេសចរចិន ឲ្យបានដូចការគ្រោងទុក? ប្រាកដណាស់ អ្នកជំនាញខាងវិស័យទេសចរណ៍បានលើកឡើងថា កម្ពុជាត្រូវការរឹតបន្តឹងច្បាប់និងបង្កើតច្បាប់បន្ថែមដើម្បីបង្កភាពងាយស្រួលដល់ភ្ញៀវទេសចរក្នុងការមកទស្សនាទឹកដីដែលសំបូរទៅដោយអរិយធម៌រុងរឿង និងជាគោលដៅទេសចរណ៍ដ៏សំខាន់មួយសម្រាប់ភ្ញៀវអន្តរជាតិគ្រប់ជាតិសាសន៍នោះ ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានថ្លែងឲ្យដឹងតាមទូរស័ព្ទនាព្រឹកថ្ងៃទី៦ ឧសភានេះថា ប្រទេសកម្ពុជាចាំបាច់បង្កើតច្បាប់បន្ថែមក្នុងការគ្រប់គ្រង ព្រោះករណីអត់ដែលកើតមានឡើងនៅកម្ពុជា ហើយមុននឹងបង្កើតច្បាប់យើងត្រៀមខ្លួនរួចរាល់ហើយឫនៅ មិនមែនបង្កើតច្បាប់មកចោលនោះទេ។
ប្រធានសមាគមទេសចរណ៍អាស៊ីប៉ាស៊ីហ្វិក មានប្រសាសន៍បញ្ជាក់ថា «យើងឃើញស្រាប់ហើយ ច្បាប់ទេសចរណ៍ត្រូវបានបង្កើតឡើង៥ ឬ៦ ឆ្នាំមកហើយ តែរហូតមកដល់សព្វថ្ងៃសម្រាប់ការអនុវត្តន៍នៅមានកម្រិត។ វាត្រូវកើតឡើងពីឆន្ទៈរបស់មនុស្ស គឺមានតែច្បាប់ទេដែលបង្កើតចេញជាឆន្ទៈ និងមានតែរឹតបន្តឹងច្បាប់ទេ» ។ សម្តេចតេជោហ៊ុន សែន នាយករដ្ឋមន្ត្រីកម្ពុជាធ្លាប់ថ្លែងថា បច្ចុប្បន្នវិស័យអាកាសចរណ៍ចិនបានហោះត្រង់មកកម្ពុជាកាន់តែកើនឡើង កាន់តែច្រើននាពេលបច្ចុប្បន្ននេះ ហើយសម្តេចបានស្នើសុំឲ្យក្រុមហ៊ុនចិន ដែលកំពុងវិនិយោគគំរោងតារាសាគរនៅខេត្តកោះកុង សាងសង់ព្រលានយន្តហោះអាចទទួលអ្នកដំណើរឲ្យបាន៣លាននាក់ និងទទួលទានអង្ករកម្ពុជា ក្នុងន័យសម្រួលដល់ការធ្វើដំណើររបស់ទេសចរចិនមកកាន់កម្ពុជា ។
សូមបញ្ជាក់ថាកាលពីឆ្នាំ២០១៨កន្លងមកនេះ កម្ពុជាទទួលបានភ្ញៀវទេសចរអន្តរជាតិចំនួន៦,២លាននាក់ ក្នុងនោះភ្ញៀវទេសចរចិនបានកើនពី១,២កាលពីឆ្នាំ២០១៧ និងចំនួនអ្នកទេសចរចិនមកដល់កម្ពុជាមានចំនួនជាង២លាននាក់ក្នុងឆ្នាំ ២០១៨ ដោយស្ថិតនៅលំដាប់លេខមួយ។ ខាងក្រោមនេះ ជាតួលេខនៃចំនួនអ្នកទេសចរណ៍ចិនមកកម្ពុជានៅក្នុងរយៈពេល១០ឆ្នាំចុងក្រោយ។ ២០១៨ ចំនួន ២លាន; ២០១៧ ចំនួន១,២លាន; ២០១៦ ចំនួន៨,៣ សែន;២០១៥ ចំនួនជិត ៧សែន; ២០១៤ ចំនួន៥,៦សែន; ២០១៣ ចំនួន៤,៦សែន; ២០១២ ចំនួន៣,៣សែន; ២០១១ ចំនួន ២,៤សែន; ២០១០ ចំនួនជិត១,៨សែន; ២០០៩ ចំនួន ជិត១,៣សែន ។ ការប្រែប្រួលនៅក្នុងរយៈពេល១០ឆ្នាំនេះនៃចំនួនទេសចរណ៍ចិនមានសន្ទុះខ្លាំងជាងគេបំផុត៕
ចែករំលែកព័តមាននេះ