រាជធានីភ្នំពេញ ៖ កីឡាករថៃ ទួន ប៉េ បាន បង្ហាញពីការរំភើបចិត្តយ៉ាងខ្លាំងរហូតដល់ថ្នាក់ទប់ទឹកភ្នែកមិនបាន ក្រោយពីត្រូវបានគណៈកម្មការរៀបចំការប្រកួតប្រកាសឱ្យឈ្នះកីឡាករកម្ពុជាសួន ចាន់នី ដាច់ទាំង៥ទឹកនៅក្នុងការប្រកួតវគ្គផ្ដាច់ព្រ័ត្រដណ្ដើមពានរង្វាន់អន្តរជាតិកំពូលអ្នកប្រយុទ្ធកណ្ដាប់ដៃដែកនៅលើសង្វៀនទូរទស្សន៍ស៊ីអិនស៊ីកាលពីថ្ងៃអាទិត្យទី៥ ឧសភា កន្លងមកនេះ ។
ព្រឹត្តិការណ៍ប្រកួតប្រដាល់ដ៏ជក់ចិត្តមួយនេះ ត្រូវបានគេរៀបចំធ្វើឡើងអស់រយៈពេលជិត៦ខែមក ហើយដោយមានកីឡាករ៨រូបក្នុងនោះកម្ពុជា៤រូបនិងថៃ៤រូបធ្វើការប្រកួតប្រជែងគ្នា។ ទីបំផុតនៅសល់កីឡាករ២រូបប៉ុណ្ណោះដែលមានឱកាសឡើងមកប្រកួតនៅវគ្គផ្ដាច់ព្រ័ត្រគឺកីឡាករសួន ចាន់នី និងកីឡាករទួន ប៉េ។
ក្រោយពីបានក្លាយជាម្ចាស់ពានរង្វាន់កំពូលអ្នកប្រយុទ្ធកណ្ដាប់ដៃដែកក្នុងប្រភេទទម្ងន់៦០គីឡូក្រាមរួចមក កីឡាករថៃរូបនេះ បាននិយាយថា គេពិតជាមានការរំភើបចិត្តយ៉ាងខ្លាំង ហើយក៏សូមអរគុណដល់គណៈកម្មការរៀបចំការប្រកួតផងដែរដែលបានផ្ដល់នូវភាពយុត្តិធម៌ដល់រូបគេ ។ មុនពេលប្រកួតលោកក៏មានការបារម្ភខ្លះដែរដោយសារសួន ចាន់នី គឺជាជើងខ្លាំងមួយរូបដែលមានកម្ពស់ខ្ពស់ជាងខ្លួនទោះបីជាលោកធ្លាប់វាយឱ្យសន្លប់កាលពីវគ្គជម្រុះម្ដងរួចមកហើយក្ដី ។
ចំណែក សួន ចាន់នី បានសារភាពថា លោកពិតជាធ្វើមិនបានល្អមែន ជាពិសេសចូលដល់ទឹកទី៤និងទី៥កម្លាំងចាប់ផ្ដើមស្រុតចុះយ៉ាងខ្លាំង រហូតបាត់បង់ឱកាសវាយតបតស្ទើរទាំងស្រុងខណៈអ្នកតាមដានការប្រកួតភាគច្រើនបង្ហាញនូវការគាំទ្រចំពោះលទ្ធផលបែបនេះ ។
ចំណាត់ថ្នាក់លេខ៣បានទៅលើកីឡាករថៃ វីថាក់ យ៉ាយុទ្ធ បន្ទាប់ពីយកឈ្នះកីឡាករកម្ពុជា លី ភា ។ ចំណែកប្រាក់រង្វាន់វិញ លេខ១បាន២៤លានរៀល លេខ២បាន១២លានរៀល លេខ៣បាន៨លានរៀល និងលេខ៤បាន៤លានរៀល៕
ចែករំលែកព័តមាននេះ