រាជធានីភ្នំពេញ ៖ ប៉ុន្មានថ្ងៃនេះ កីឡាករ កែវ រំចង់ បានក្លាយជាប្រធានបទក្ដៅ ដោយមានការចាប់អារម្មណ៍យ៉ាងខ្លាំងនៅក្នុងសង្គមហ្វេសប៊ុក ពាក់ព័ន្ធជំហរលោកឈប់ប្រកួតជាមួយកីឡាករក្នុងស្រុក។ អ្នកខ្លះបានគាំទ្រ ប៉ុន្តែអ្នកខ្លះ ក៏មានការរិះគន់ផងដែរ ខណៈដែលគេកត់សម្គាល់ថា បើទោះជាជំហរគាំទ្រ ឬរិះគន់ តែកែវ រំចង់ កំពុងទាញនូវប្រជាប្រិយភាពពីប្រធានបទនោះ។
អ្នកលេងហ្វេសប៊ុកកាន់តែច្រើន ត្រូវគេកត់សម្គាល់ថា បានបើកប្រធានបទជជែកគ្នា និង Share ជំហររបស់ កែវ រំចង់ អមដោយការបញ្ចេញមតិគាំទ្រផង និងរិះគន់ផង ។ អ្នកគាំទ្រ បានលើកឡើងថា គឺជាការប្រសើរណាស់ ដែលកីឡាកររូបនេះ បដិសេធមិនធ្វើការប្រកួតជាមួយកីឡាករគ្នាឯង បើទោះជាអ្នករៀបចំកម្មវិធីហា៑នឱ្យតម្លៃកម្រិតណា ក្នុងពេលដែលគេបានដឹងរួចជាស្រេចថា នេះគឺជាជំហរដែលមានតែម្នាក់នៅកម្ពុជា ហើយបើទោះជានៅប្រកួតក៏ពិបាកដាក់គូ។
ប៉ុន្តែអ្នកលេងហ្វេសប៊ុកមួយចំនួនតូច បានរិះគន់ថា ហេតុផលដែល កែវ រំចង់ ឈប់ប្រកួតជាមួយកីឡាករកម្ពុជា គឺដោយសារតែខ្លាចចាញ់កីឡាករកម្ពុជាណាមួយ ហើយបាក់មុខ នៅពេលប្រកួតចប់។ អ្នកទាំងនោះបន្តថា កីឡាករ កែវ រំចង់ ប្រកួតល្អ ប៉ុន្តែគេនៅមានអាការៈវ៉ៃច្រឡោតៗនៅពេលប៉ះគូប្រកួតខ្លាំង និងពេលធ្វើអីមិនសូវបាននៅលើរេញ។
អ្នកទាំងនោះបន្តថា កែវ រំចង់ គឺជាកីឡាករ ដែលទទួលបានការជ្រោមជ្រែងនៅប៉ុស្តិ៍បាយ័ន ដូច្នេះរាល់ការប្រកួតរបស់កីឡាកររូបនេះ នៅប៉ុស្តិ៍បាយ័ន គឺទោះជាចាញ់ប្រៀបកីឡាករថៃបន្តិចបន្តួច ក៏នៅតែឈ្នះនោះដែរ ទើបគេប្រកាសជំហរឈប់ធ្វើការប្រកួតជាមួយកីឡាករក្នុងស្រុកដូចគ្នា ដើម្បីកុំឱ្យអាម៉ាស់ប្រសិនបើចាញ់។
អ្នករិះគន់ទាំងនោះបន្តទៀតថា កែវ រំចង់ សុខចិត្តគេឱ្យប៉ុន្មានក៏មិនទទួលប្រកួតជាមួយកម្ពុជាគ្នាឯងនោះដែរ ព្រោះបើប្រកួតចាញ់ថៃ គណៈកម្មការនឹងប្រកាសថាកីឡាករថៃនោះខ្លាំងប្រចាំប្រទេសថៃ វាមិនសូវបាក់មុខដូចចាញ់គ្នាឯង ដែលសុទ្ធតែអ្នកគាំទ្រការប្រដាល់ស្គាល់ច្បាស់ពីសមត្ថភាព។
អ្នកទាំងនោះបានទាំងព្រលយថា អ្នករៀបចំប្រចាំប៉ុស្តិ៍បាយ័ន ដែលជាអ្នកកុងត្រាផ្ដាច់មុខលើ កែវ រំចង់ សុទ្ធតែបានដឹងពីសមាសភាពរបស់កីឡាករថៃដែលដាក់ឱ្យប្រកួតជាមួយជាមុនអស់ហើយ គឺមិនចេះតែដាក់ប្រថុយប្រថានបំបាក់គេនោះទេ ដើម្បីកុំឱ្យខូចប្រជាប្រិយភាពរបស់កែវ រំចង់ ដែលតួឯករបស់បាយ័ន និងដើម្បីកុំឱ្យបាក់មុខគេនៅលើសង្វៀនផង។
អ្នកលេងហ្វេសប៊ុកខ្លះ បានទាំងអះអាងថា កែវ រំចង់ បើទទួលប្រកួតជាមួយកីឡាករក្នុងស្រុក ក៏មិនប្រាកដថាឈ្នះកីឡាករជាគូប្រកួតនោះដែរ ដោយសារតែកីឡាករក្នុងស្រុកមួយចំនួនក៏ខ្លាំងមិនធម្មតា ជាពិសេសអ្នកល្បី ហើយបន្តរក្សាក្រេឌីតបានមកដល់បច្ចុប្បន្ន។ យ៉ាងណាមិញម្នាក់ៗហាក់គាំទ្រ និងឱ្យតម្លៃលើជំហររបស់ កែវ រំចង់ ដែលប្រកាសមិនប្រកួតជាមួយកីឡាករគ្នាឯង។
កែវ រំចង់ មិនត្រូវបានគេឃើញចេញមុខប្រតិកម្មថា លោកឈប់ប្រកួតជាមួយកីឡាករក្នុងស្រុក ព្រោះតែខ្លាចចាញ់អាម៉ាស់មុខនោះទេ ដោយលោកត្រូវគេកត់សម្គាល់ថា នៅស្ងៀម បើទោះជាលោកគឺជាអ្នកសកម្មនឹងការលេងហ្វេសប៊ុក ដែលពិតជាដឹងច្បាស់ពីការលើកឡើង។
ចែករំលែកព័តមាននេះ