រាជធានីភ្នំពេញ ៖ ដោយយោងទៅតាមគោលការណ៍រៀបចំសណ្តាប់ធ្នាប់នៅតាមទីសារធារណៈ និងតាមដងផ្លូវនានាក្នុងរាជធានីភ្នំពេញកន្លងមក ជាពិសេសអាជ្ញាធរខណ្ឌចំការមន ដែលមានលោក ថេង សុថុល អភិបាលទើបឡើងកាន់តំណែងថ្មីកំពុងតែមាន ចំណាត់ការរឹតបន្តឹងអ្នកក្រីក្រ…
រាជធានីភ្នំពេញ ៖ ដោយយោងទៅតាមគោលការណ៍រៀបចំសណ្តាប់ធ្នាប់នៅតាមទីសារធារណៈ និងតាមដងផ្លូវនានាក្នុងរាជធានីភ្នំពេញកន្លងមក ជាពិសេសអាជ្ញាធរខណ្ឌចំការមន ដែលមានលោក ថេង សុថុល អភិបាលទើបឡើងកាន់តំណែងថ្មីកំពុងតែមាន ចំណាត់ការរឹតបន្តឹងអ្នកក្រីក្រ ដែលមានមុខរបរលក់ «ក្រសែត» ហៅកាសែត សៀវភៅសិក្សា ជាបណ្តើរៗ ខណៈដែលមុខរបរមួយនេះកំពុងតែប្រឈមមុខទៅនឹងការដុនដាបយ៉ាងខ្លាំងទៅហើយនោះ ។
ជាក់ស្តែង តូបលក់ក្រសែត សៀវភៅ ។ល។ ចំនួន៤តូប ដែលមានទីតាំងនៅជាប់របងវត្តទួលទំពូងខាងលិច តាមបណ្តោយផ្លូវលេខ១៥៥ ក្នុងសង្កាត់ទួលទំពូងទី១ ខណ្ឌចំការមនតែម្តង ត្រូវបានអាជ្ញាធរទើបឡើងថ្មីធ្វើទុក្ខបុកម្នេញតម្រូវឱ្យរុះរើចេញ ឈប់លែងឱ្យលក់ចាប់ពីថ្ងៃទី១៥ ខែឧសភា ឆ្នាំ២០១៩ នេះតទៅហើយ ដោយមិនមានដំណោះស្រាយអ្វីឡើយ គឺដេញចោលតែម្រ៉ង អត់មានរកទីតាំងណាឱ្យលក់ដូរសមរម្យឡើយ ដូចទៅងាប់ឯណាទៅៗ ។
ស្ត្រីឈ្មោះ សុខ ខេង អាយុ៥៦ឆ្នាំ បានរៀបរាប់ប្រាប់ឱ្យដឹងថា រូបគាត់បានទិញតូបលក់កាសែតនេះត
ពីគេក្នុងតម្លៃរាប់ពាន់ដុល្លារអស់រយៈពេលជាង៤ឆ្នាំមកហើយ ដើម្បីលក់ក្រសែត សៀវភៅ និងប៊ិច និងមានច្បាប់ចេញពីសាលារាជធានីឱ្យលក់យ៉ាងត្រឹមត្រូវ។
លុះមកដល់ថ្ងៃទី៣០ ខែមេសា ឆ្នាំ២០១៩ កន្លងមកនេះ ខាងសាលាសង្កាត់ទួលទំពូងទី១ បានហៅពួកគាត់ចំនួន៤តូប ដែលមានទីតាំងនៅតាមបណ្តោយផ្លូវលេខ១៥៥ ក្បែររបងវត្តទួលទំពូងខាងលិចឱ្យទៅធ្វើកិច្ចសន្យា និងផ្តិតមេដៃរុះរើតូបចេញឈប់លក់ឱ្យអស់ចាប់ពីថ្ងៃទី១៥ ខែឧសភា ឆ្នាំ២០១៩ ខាងមុខនេះជាកំហិត។ ប្រសិនបើពួកគាត់ទាំង៤តូប មិនព្រមនាំគ្នារុះរើតូបដោយខ្លួនឯងឱ្យអស់ទៅតាមកាលកំណត់ទេ កម្លាំងអាជ្ញាធរសង្កាត់ទួលទំពូងទី១ នឹងចុះធ្វើការរុះរើតែម្តង ។ ម្យ៉ាងវិញទៀតមិនទទួលខុសត្រូវរាល់ការបាត់បង់ ឬខូចខាតលើទ្រព្យសម្បត្តិរបស់ពួកគាត់ឡើយ ។
ស្រី្តអ្នកលក់ក្រសែតដដែលបានប្រាប់បន្តទៀតថា តូបលក់ក្រសែតរបស់ពួកគាត់ទាំង៤តូប គឺសុទ្ធតែមានច្បាប់អនុញ្ញាតិឱ្យលក់ពីសាលាក្រុងត្រឹមត្រូវ ដោយបានបង់ប្រាក់ចំនួន៣៥ដុល្លារចូលសាលារាជធានីភ្នំពេញជាប្រចាំឆ្នាំមិនដែលអាក់ខានម្តងណាឡើយ ហើយពួកគាត់សុទ្ធតែមានជីវភាពខ្សត់ខ្សោយបំផុត ។ ចុះហេតុអ្វីរហូតមកទល់នឹងពេលនេះ បែរជាអាជ្ញាធរសង្កាត់ទួលទំពូងទី១ តម្រូវឱ្យពួកគាត់នាំគ្នារុះរើតូបចេញ ដែលជាតូបលក់ដោយមានច្បាប់ត្រឹមត្រូវ ឈប់ឱ្យលក់ដូរទាំងបង្ខំ បែបនេះទៅវិញ ។
ដោយឡែក ការដេញតូបក្រសែតរបស់ពួកគាត់ឱ្យឈប់លក់នេះដែរ គឺធ្វើឡើងតែ៤តូប ដែលមានទីតាំងនៅជាប់ម្ខាងក្បែររបងវត្តតែប៉ុណ្ណោះ ។ ចំណែកឯតូបដទៃទៀត ដែលនៅជាប់ៗគ្នាខាងមុខសាលានោះមិនត្រូវបានអាជ្ញាធរដេញឱ្យរុះរើឡើយ ។
ស្ត្រីវ័យចំណាស់ឈ្មោះ មាន គឹមស្រូយ ជាអាជីវករតូបលក់ក្រសែតម្នាក់ទៀតបានប្រាប់ឱ្យដឹងថា កាលពីពេលកន្លងមក ខាងសាលាសង្កាត់ទួលទំពូងទី១ បានចេញលិខិតអញ្ជើញមួយមកដល់រូបគាត់ឱ្យទៅកាន់សាលាសង្កាត់នៅថ្ងៃទី២៩ ខែមេសា ឆ្នាំ២០១៩ ដោយរូបគាត់មិនបានដឹងថាមានបញ្ហាអ្វីឡើយ ។
លុះដល់ថ្ងៃកំណត់រូបគាត់ក៏បានឡើងទៅសាលាសង្កាត់ ទួលទំពូងទី១ ទៅជួបនឹងលោកចៅសង្កាត់រងម្នាក់ឈ្មោះ ហាក់ ពេលនោះក៏ស្រាប់តែលោកចៅសង្កាត់រូបនោះហុចក្រដាស់ កិច្ចសន្យាមួយសន្លឹក ដោយតម្រូវឱ្យផ្តិតមេដៃទាំងបង្ខំភ្លាមៗផងដែរ ។ ដោយក្នុងក្រដាស់កិច្ចសន្យា និង ផ្តិតមេដៃនេះដែរ គេតម្រូវឱ្យរូបគាត់ធ្វើការរុះរើតូបលក់ក្រសែតរបស់គាត់ឱ្យអស់នៅថ្ងៃទី១៥ ខែឧសភា ឆ្នាំ២០១៩ ខាងមុខ និងឈប់លក់នៅទីនេះតទៅទៀត ។
ពាក់ពន្ធ័ទៅនឹងការតម្រូវឱ្យរុះរើតូបឈប់លក់របស់គាត់នៅក្បែររបងវត្តទួលទំពូងនេះគាត់ថា រូបខ្ញុំមិនអាចសម្រេចយកបានភ្លាមៗទៅតាមកាលកំណត់បានឡើយ ព្រោះអីតូបកាសែតរបស់គាត់ជាតូបដែលមានច្បាប់អនុញ្ញាតិពីសាលាក្រុងឱ្យធ្វើការលក់ដូររកលុយចិញ្ចឹមកូននៅទីនេះអស់រយះពេលជាង៣០ឆ្នាំមកហើយយ៉ាងត្រឹមត្រូវ ។
ដោយមានទាំងប៉ាតង់ និង បានបង់លុយជូនចំនួន៣៥ដុល្លារក្នុងមួយឆ្នាំជាប្រចាំមិនដែលខាននោះទេ ម្យ៉ាងវិញទៀតរូបគាត់មិនមានកន្លែងលក់ផ្សេងទេ ប្រសិនបើឱ្យគាត់រុះរើចេញនោះ តើឱ្យរូបគាត់ទៅលក់នៅទីណាវិញទៅ?សព្វថ្ងៃរូបគាត់ប្រកបមុខរបរលក់កាសែតនេះ គឺលក់សំរាប់ឱ្យម៉ូយដែលមករកទិញតិចតួច គ្រាន់តែយកលុយចិញ្ចឹមកូនៗចាយប្រចាំថ្ងៃប៉ុណ្ណោះ ព្រោះតែមិនមានមុខរបរផ្សេងហើយម្យ៉ាងទៀតមុខរបរមួយនេះ ក៏កំពុងតែមានការធ្លាក់ចុះដុនដាប កាន់តែខ្លាំងមិនដូចពីមុនទេ ។
លោក ឆេង ជៀក ចៅសង្កាត់ទួលទំពូងទី១ បានប្រាប់តាមទូរស័ព្ទឱ្យដឹងថា លោកធ្វើនេះទៅតាមគោលការណ៍របស់ឯកឧត្តមអភិបាលរាជធានីភ្នំពេញ ក៏ដូចជារបស់លោកអភិបាលខណ្ឌចំការមនដែរ គឺឱ្យធ្វើការរៀបចំណីផ្លូវ លើទ្រូងផ្លូវឱ្យវាល ។ អីចឹងចំណីវត្ត ទ្រូវផ្លូវវត្តទី១ គឺត្រូវធ្វើឱ្យវាល ដើម្បីពុទ្ធបរិស័ទចាស់ៗទៅវត្តធ្វើបុណ្យបានស្រួលអត់មានការភ្ញាក់ផ្អើលទេ។
ដោយរៀបចំទៅតាមគោលការណ៍បញ្ជារបស់អភិបាលរាជធានីភ្នំពេញ ក៏ដូចជាអភិបាលខណ្ឌ ដើម្បីរៀបចំតាមចិញ្ចើមផ្លូវក៏ដូចជាផ្លូវសាធារណៈ ។ ពាក់ព័ន្ធទៅនឹងការបណ្តេញរុះរើ និងឈប់មានតូបលក់កាសែតទាំង៤តូបលក់នៅក្បែររបងខាងលិចវត្តទួលទំពូងនេះដែរ កោះសន្តិភាពយើងក៏បានទាក់ទងសុំការបំភ្លឺតាមរយៈទូរស័ព្ទទៅកាន់លោក ថេង សុថុល ជាអភិបាលខណ្ឌចំការមន ដែលទើបឡើងកាន់តំណែងថ្មីៗនេះដែរ តែលោកឆ្លើយថា «ពេលនេះរូបលោកជាប់រវល់ក្នុងកម្មវិធីសំណេះសំណាលមួយ» ពេលនេះមិនអាចនិយាយអ្វីបានទេ ។
មតិយោបល់របស់សាធារណជនបើក្រឡេកមើលទៅទីក្រុងបាងកកប្រទេសថៃ និងទីក្រុងហូជីមិញប្រទេសវៀតណាម នៅមានប្រជាជនប្រកបមុខរបរតាមចិញ្ចើមផ្លូវនៅឡើយ ។ គេរៀបចំឱ្យមានទីតាំងលក់ដូរយ៉ាងស្អាត មានសណ្តាប់ធ្នាប់ ព្រោះគេយល់ថា ប្រជាជនគេនៅក្រីក្រ គេជួយអ្នកក្រីក្រឱ្យមានមុខរបរទៅតាមលទ្ធភាព ។ ចំណែកនៅរាជធានីភ្នំពេញយើង អភិបាលក្រុងមុនៗចាប់តាំងពីលោក ជា សុផារ៉ា មកក៏មានការរៀបចំឱ្យមានសណ្តាប់ធ្នាប់ដែរ តាមចិញ្ចើមផ្លូវ ។ ជាពិសេសតូបលក់ក្រសែតសុទ្ធតែមានគំរូប្លង់តូប មើលទៅជាតូបតូចល្មមមានដំបូលមានខ្នាតឯកភាពសមរម្យនៅអែបចិញ្ចើមផ្លូវ ។
ពេលវេលានេះ អ្នកក្រសែតក៏ដូចអ្នកលក់ក្រសែតដែរ…ក្រនៅតែក្រ…ក្រម្លឹងហើយ…នៅតាមដេញប្រផាប់ចាប់ប្រភីងទៀត មិនសក្តិសមជាអាជ្ញាធរបំរើប្រជាជនបានល្អឡើយ ។ បើថាទីនោះ ទើសភ្នែក ទើសច្រមុះ ខ្លាចខូចបុណ្យសក្តិមុខមាត់គួររកទីណាមួយសមរម្យក្បែរៗឱ្យអ្នកក្ររកស៊ីបន្តទៀតផង កុំដេញតាមអំណាចពេក…កុំដេញឱ្យទៅងាប់ឯណាងាប់ទៅដូចនៅខណ្ឌចំការមនបែបនេះ ប្រាកដជាគ្មានការគាំទ្រ និងមិនអាចឱ្យអ្នកក្រទទួលយកបានឡើយ ៕
ចែករំលែកព័តមាននេះ