គ្រួសារបាត់ដីផ្ទាល់ខ្លួន…សុំអាជ្ញាធរជួយសម្រួលឱ្យសមស្របមកគាត់វិញផង
- តាកែវ
ខេត្តតាកែវ ៖ ការកើតទុក្ខមិនសុខចិត្តមួយ បានកើតឡើងលើគ្រួសារ លោកអូក ញ៉ និងអ្នកស្រី ម៉ី ផាន្នី ដែលរស់នៅភូមិព្រៃស្រោង…
ខេត្តតាកែវ ៖ ការកើតទុក្ខមិនសុខចិត្តមួយ បានកើតឡើងលើគ្រួសារ លោកអូក ញ៉ និងអ្នកស្រី ម៉ី ផាន្នី ដែលរស់នៅភូមិព្រៃស្រោង ឃុំអង្គតាសោម ស្រុកត្រាំកក់ ខេត្តតាកែវ ចំពោះអាជ្ញាធរដែលបានសម្រេចបើកផ្លូវឱ្យពលរដ្ឋ តែធ្វើឱ្យលោកត្រូវបាត់បង់ដីផ្ទាល់ខ្លួនគាត់ ទាំងដែលមិនទទួលបាដំណោះស្រាយណាមួយឱ្យសមស្របមកវិញ ។
តាមគ្រួសាររងគ្រោះខាងលើ ដែលបានបាត់បង់ដីបាននិយាយប្រាប់អ្នកសារព័ត៌មាន កាលពីព្រឹកថ្ងៃទី០៦ ឧសភា ថា ដើមឡើយ ការទំនាស់ដីធ្លីចំពោះពលរដ្ឋនិងគ្រួសារគាត់ គឺមានជាយូរឆ្នាំណាស់ហើយ លើបញ្ហាសុំបើកផ្លូវលើផ្លូវចាស់ ដែលមានស្រាប់ដែលជាផ្លូវភ្លឺស្រែតែប៉ុណ្ណោះ រហូតកើតក្តីក្តាំងតវ៉ាគ្នាតាំងពីឆ្នាំ២០០០មកម្ល៉េះ ។
លុះដល់ពេលបច្ចុប្បន្ន ភាគីទាំងសងខាងនៃផ្លូវបានសម្រេចផ្តល់ដីរបស់ខ្លួន ដើម្បីពង្រីកផ្លូវឲ្យបានទំហំ២,៥ ម៉ែត្រ ធំជាងមុនដែលជាផ្លូវភ្លឺស្រែនោះអាចបើកបររថយន្តចេញចូលបានដល់ប្រជាពលរដ្ឋ ដែលរស់នៅខាងក្រោយ ។
ដោយមានមហិច្ឆតាចង់បានពីសំណាក់បងប្អូនប្រជាពលរដ្ឋ ដែលរស់នៅខាងក្រោយ ក៏កើតមានរឿងសុំបើកផ្លូវសារជាថ្មីម្តងទៀត ដែលក្នុងនោះ ក្រោមការដឹកនាំរបស់អតិតអភិបាលស្រុកត្រាំកក់ លោក តឹក តុងលីម បានធ្វើការបកស្រាយបំភ្លឺលើករណីពង្រីកផ្លូវនេះទៅថ្នាក់ខេត្តយ៉ាងច្បាស់ថា ដើមឡើយផ្លូវនេះគឺជាផ្លូវភ្លឺស្រែតែប៉ុណ្ណោះ ។
ដោយមានសភាពតូចចង្អៀត ពលរដ្ឋដែលរស់នៅខាងក្រោយ បានស្នើសុំឲ្យម្ចាស់ដីដែលនៅខាងមុខ គឺលោកអូក ញ៉ និងភាគីដីម្ខាងទៀតនៃផ្លូវ មេត្តាជួយបើកផ្លូវឲ្យបានធំជាងនេះ ក្រោយមកភាគីទាំងសងខាងបានសម្រេចបើកផ្លូវតាមសំណូមពរប្រជាពលរដ្ឋឲ្យធំជាងមុន ក្នុងទំហំ២,៥ម៉ែត្រ។
លុះអភិបាលស្រុកចាស់ត្រូវចូលនិវត្តន៍ប្តូរអភិបាលស្រុកថ្មី ដោយលោក កៅ វគ្គសែល ក៏កើតមានរឿងសុំបើកផ្លូវសាជាថ្មីម្តងទៀតដែលមានទំហំរហូតដល់៥ម៉ែត្រ ដែលអនុវត្តដីការបស់សាលាដំបូងខេត្តតាកែវ ថ្ងៃទី២៦ ធ្នូ ឆ្នាំ២០១៨ ឲ្យវាយកម្ទេចរបងផ្ទះរបស់គាត់ ធ្វើឲ្យប៉ះពាល់ដីផ្ទាល់ខ្លួនរបស់លោកអូក ញ៉ ជាច្រើនម៉ែត្រថែមទៀត ។
អ្វីដែលគ្រួសារគាត់នោះមិនសុខចិត្ត ការពង្រីកផ្លូវគឺទាល់តែមានការចួករួមវិភាគទានគ្នាទាំងម្ចាស់ដីសងខាងនៃផ្លូវ ហេតុអ្វីបានជាពង្រីកផ្លូវយកដីគាត់តែម្ខាង តើនេះជារឿងយុត្តិធម៌ដែរឬទេ? ដោយកើតជា
ចម្ងល់លោកអូក ញ៉ និងអ្នកស្រីម៉ី ផាន្នី តែងតែទៅជួបលោក កៅ វគ្គសែល ដែលជាអភិបាលស្រុកត្រាំកក់ ជួយដោះស្រាយដល់ប្រជាពលរដ្ឋ តែត្រូវលោក កៅ វគ្គសែល ប្រើពាក្យសម្តីមិនសមគួរនិងស្តីបន្ទោសគ្រប់ពេលដែលជួប ។
ពួកគាត់បានលើកឡើងថា តើមន្ត្រីទាំងនោះ ជាចៅហ្វាយរាស្ត្រឬជាអ្នកបម្រើរាស្ត្រ? បើពេលជួបម្តងៗសុំឲ្យធ្វើការដោះស្រាយជូនដូចទៅជួបចៅហ្វាយនាយអញ្ចឹង! ដែលការអនុវត្តរបស់លោកអភិបាលស្រុកត្រាំកក់រូបនេះវាផ្ទុយទៅនិងប្រសាសន៍របស់សម្តេចតេជោ ហ៊ុន សែន ដែលសម្តេចតែងតែនិយាយថា មន្ត្រីរាជការគឺជាអ្នកបម្រើរាស្ត្រ មិនមែនជាចៅហ្វាយនាយនោះទេ ។
ជុំវិញករណីនេះ អ្នកសារព័ត៌មានបានទាក់ទងតាមរយៈទូរស័ព្ទទៅលោក កៅ វគ្គសែល អភិបាលស្រុកត្រាំកក់ នៅថ្ងៃរសៀល០៦ ឧសភា ដដែល ដើម្បីសុំការបំភ្លឺ តែទូរស័ព្ទរបស់លោកខលចូល តែមិនមានអ្នកទទួលនោះទេ ។
ដោយឡែក លោក នួន សុធា ប្រធានមន្ទីរសូរិយោដីខេត្តតាកែវ បានប្រាប់ឲ្យដឹងតាមរយៈទូរស័ព្ទថា រឿងនេះ លោកមិនសូវដឹងច្បាស់នោះទេ ព្រោះភូមិបាលស្រុកត្រាំកក់ជាអ្នកធ្វើ ហើយមន្ទីរគ្រាន់តែមានសិទ្ធិគូសផ្គងប្លង់តែប៉ុណ្ណោះ ចំណែករឿងពង្រីកផ្លូវចូលដីភាគីតែម្ខាងគឺ លោកមិនបានឆ្លើយតបអ្វីទាំងអស់ ។
ចែករំលែកព័តមាននេះ