ខេត្តស្វាយរៀង ៖ លំនៅដ្ឋានរបស់ប្រជាពលរដ្ឋចំនួន៤៩ខ្នង ស្មើ៥ភូមិ នៅក្នុងឃុំជ្រៃធំ ស្រុករមាសហែក ត្រូវខ្យល់កន្ត្រាក់ បណ្តាលឲ្យដួលរលំខ្ទេចខ្ទី និងខ្លះប៉ើងដំបូល និងមួយចំនួនទៀតប៉ើងលោតចេញពីជើងតាងតម្កល់ និងខូចខាតទាំងស្រុង ដែលមានចំនួន០៥ខ្នងផ្ទះផងដែរ ។
បើតាមអាជ្ញាធរស្រុកបានឲ្យដឹងថា ករណីគ្រោះធម្មជាតិនេះកើតឡើង កាលពីវេលាម៉ោង៤និង៤៥នាទីល្ងាច នៅថ្ងៃទី៥ ខែឧសភា ឆ្នាំ២០១៩ នៅឃុំជ្រៃធំ ស្រុករមាសហែក ។ បើតាមសមត្ថកិច្ចបានឲ្យដឹងថា នៅល្ងាចថ្ងៃកើតហេតុខាងលើមានភ្លៀងមួយមេធំលាយឡំ និងខ្យល់កន្ត្រាក់បានបោកបក់យ៉ាងខ្លាំងធ្វើឲ្យរលំផ្ទះ និងរបើកដំបូលអស់ចំនួន៤៩ខ្នងផ្ទះ ក្នុងនោះរលំរាបដល់ដីខូចខាតទាំងស្រុងចំនួន០៥ខ្នង ។ ប្រភពដដែលបានបន្តទៀតថា ភូមិដែលរងគ្រោះក្នុងបាតុភូតគ្រោះធម្មជាតិនោះរួមមាន ១-ភូមិថ្មីចំនួន៣២ខ្នងផ្ទះ ២- ភូមិត្រពាំងស្មាច់១១ខ្នងផ្ទះ ៣- ភូមិសណ្តោរចំនួន០៣ខ្នងផ្ទះ ៤-ភូមិដក់ពរចំនួន២ខ្នងផ្ទះ និង៥-ភូមិព្រៃរំដែងចំនួន១ខ្នងផ្ទះ ។ ហើយក្នុងនោះដែរក៏មានដួលផ្លាកគណបក្សប្រជាជនមួយផ្ទាំង និងផ្លាកទូរស័ព្ទទាន់ហេតុការណ៍មួយនៅកែងភូមិថ្មី ។
ប្រជាពលរដ្ឋដែលរងគ្រោះខូចផ្ទះទាំងស្រុងមានចំនួន០៥ខ្នងនោះ១-ឈ្មោះអាំ សឿន ភេទ ប្រុស អាយុ៦៣ឆ្នាំ នៅភូមិថ្មីផ្ទះទំហំ៦ម៉ែត្រគុណ៥ម៉ែត្រសង់អំពីឈើជញ្ជាំងស័ង្កសីប្រក់ស័ង្កសី លោតចុះចេញពីជើងតម្កល់បាក់ខូចទាំងស្រុង ។ ២- ឈ្មោះសៅ វ៉ាន់ ភេទប្រុស អាយុ៥១ឆ្នាំ នៅភូមិថ្មីផ្ទះទំហំ៤ម៉ែត្រគុណ៦ម៉ែត្រសង់អំពីឈើជញ្ជាំងស័ង្កសីប្រក់ស័ង្កសីលោតចុះចេញពីជើងតម្កល់ខូចទាំងស្រុង ។ ៣-ឈ្មោះ កុយ កាយ ភេទប្រុស អាយុ៤៩ឆ្នាំ នៅភូមិត្រពាំងស្មាច់ផ្ទះទំហំ៥ម៉ែត្រគុណ៦ម៉ែត្រសង់ពីឈើជញ្ជាំងស្លឹកដំបូលប្រក់ស័ង្កសីដួលខូចខាតទាំងស្រុង ។
៤-ឈ្មោះពោជ តូ ភេទស្រី អាយុ៣០ឆ្នាំ នៅភូមិត្រពាំងស្មាច់ផ្ទះទំហំ៤ម៉ែត្រគុណ៦ម៉ែត្រសង់ពីឈើជញ្ជាំងស័ង្កសីដំបូលប្រក់សង្ក័សីដួលខូចខាតទាំងស្រុង ។ ៥-ឈ្មោះសៅ តឿន ភេទប្រុស អាយុ២៥ឆ្នាំ នៅភូមិដក់ពរផ្ទះទំហំ៤ម៉ែត្រគុណ៥ម៉ែត្រសង់ពីឈើជញ្ជាំងស័ង្កសីដំបូងប្រក់ស័ង្កសីលោតចុះចេញពីជើងតម្កល់បាក់ខូចទាំងស្រុង ។ហើយករណីភ្លៀងផ្គរខ្យល់កន្ត្រាក់នេះមិនបណ្តាលអោយគ្រោះថ្នាក់ដល់មនុស្សទេ ៕
ចែករំលែកព័តមាននេះ