សហរដ្ឋអាមេរិក ៖ ភ្នាក់ងារសារព័ត៌មាន China Daily បានរាយការណ៍មកកាលពីថ្ងៃអាទិត្យថា ក្រុមហ៊ុន Apple Inc បានប្រកាសកាលពីថ្ងៃអង្គារ៍មុនថាពួកគេរកប្រាក់ចំណូលបាន៥៨ប៊ីលានដុល្លារសម្រាប់ត្រីមាសទី២នាឆ្នាំ ២០១៩នេះ ដែលទាបជាងឆ្នាំមុន ៥%ប៉ុន្តែនៅតែខ្ពស់ជាងការគិតទុករបស់ទីផ្សារ។
លោក Luca Maestri ដែលជានាយកទទួលបន្ទុកផ្នែកហិរញ្ញវត្ថុរបស់ Apple បាននិយាយថា “ពួកយើងរកលំហូរប្រាក់សម្រាប់ដំណើរការក្រុមហ៊ុនបាន ១១.២ប៊ីលានដុល្លារសម្រាប់ត្រីមាសទី ២ ហើយបន្តវិនិយោគបន្ថែមទៀតលើគ្រប់ផ្នែកនៃអាជីវកម្មរបស់ពួកយើង”។
លោក Tim Cook ដែលជានាយកប្រតិបត្តិរបស់ក្រុមហ៊ុនក៏បានឲ្យដឹងដែរថា ប្រាក់ចំណូលបានពីសេវាកម្មដូចជា Apple Music, App Store និងអាជីវកម្មដទៃទៀតបានកើនដល់កម្រិតខ្ពស់ជាងគេរបស់ក្រុមហ៊ុនដែលស្មើ ១១.៥ប៊ីលានដុល្លារផងដែរ។
លោកបានបន្ថែមថា “លទ្ធផលសម្រាប់ត្រីមាសទី ២បានបង្ហាញពីភាពរឹងមាំនៃមូលដ្ឋានរបស់យើងដែលមានអ្នកប្រើប្រាស់សកម្ម ១.៤ប៊ីលានគ្រឿង ខណៈដែលពួកយើងមើលឃើញកំណើនដល់កម្រិតខ្ពស់ជាងគេថ្មីសម្រាប់សេវាកម្ម និងការលូតលាស់ដ៏រឹងមាំក្នុងផ្នែកផលិតផលដែលអាចពាក់បាន ផលិតផលក្នុងផ្ទះ និងគ្រឿងបំពាក់ផ្សេងៗជាដើម។”
គួរបញ្ជាក់ដែរថា Apple មិនប្រកាសពីចំនួនលក់ iPhone, iPad និង Mac ទៀតឡើយដូចដែលពួកគេបានប្រកាសកាលពីឆ្នាំមុន។ ប៉ុន្តែក្រុមហ៊ុននេះបានព្យាករណ៍មកថាប្រាក់ចំណូលរបស់ពូកគេសម្រាប់ត្រីមាសទី៣នាឆ្នាំនេះនឹងកើនមកស្មើរវាង ៥២.៥ប៊ីលានដុល្លារទៅ ៥៤.៥ប៊ីលានដុល្លារផងដែរ ដោយមានការចំណាយក្នុងការដំណើរការអាជីវកម្មរវាងប្រមាណ ៨.៧ប៊ីលាន ទៅ ៨.៨ប៊ីលានដុល្លារ។
ចែករំលែកព័តមាននេះ