ខេត្តបាត់ដំបង ៖ ក្មេងទំនើងចំនួន២នាក់ក្នុងចំណោមបក្សពួក៣នាក់ ដែលបែកគំនិតស្ទាក់កាប់ប្លន់យកម៉ូតូតាមដងផ្លូវទាំងថ្ងៃ បានត្រូវកម្លាំងអន្តរាគមន៍ផ្នែកបង្ការបង្ក្រាបនៃការិយាល័យព្រហ្មទណ្ឌកម្រិតស្រាល សហការជាមួយកម្លាំងនគរបាលស្រុកសង្កែ ធ្វើការស្រាវជ្រាវឃាត់ខ្លួនបានកាលពីវេលាម៉ោងប្រមាណ៩និង៤០នាទីព្រឹកថ្ងៃទី២ ខែឧសភាកន្លងទៅ នៅភូមិបល្ល័ង្ក សង្កាត់អូរម៉ាល់ ក្រុងបាត់ដំបង ក្រោយពីក្រុមនេះ ធ្វើសកម្មភាពបានមួយថ្ងៃ ។
នាយការិយាល័យនគរបាលព្រហ្មទណ្ឌកម្រិតស្រាល លោក ឈឿង គឹមសុង បានឲ្យដឹងថា ជនទាំង២នាក់ដែលត្រូវបានឃាត់ខ្លួននេះ ម្នាក់ឈ្មោះ ភ័ណ្ឌ សុភា ភេទប្រុស អាយុ១៦ឆ្នាំ រស់នៅភូមិអណ្តូងព្រីង សង្កាត់អូរម៉ាល់ ក្រុងបាត់ដំបង និងម្នាក់ទៀតឈ្មោះ ផាន់ សង្វាពេជ្រ ភេទប្រុស អាយុ១៧ឆ្នាំ រស់នៅភូមិផ្កាស្លា សង្កាត់ចំការសំរោង ក្រុងបាត់ដំបង រីឯបក្សពួកម្នាក់ទៀតរត់គេចខ្លួនបាត់ ។
លោកនាយការិយាល័យថ្លែងថា ជនទាំង២នាក់រួមនឹងបក្សពួកម្នាក់ទៀត ត្រូវសង្ស័យថាបាននាំគ្នាធ្វើសកម្មភាពស្ទាក់កាប់ជនជនរងគ្រោះម្នាក់ឈ្មោះ ហុន កានឿន ភេទប្រុស អាយុ២១ឆ្នាំ រស់នៅភូមិអូរគគីរ ឃុំអូរដា ស្រុកកំរៀង ដើម្បីប្លន់យកម៉ូតូមួយគ្រឿងម៉ាកសុ៊យហ្សុ៊យគីណិច សេ៊រីឆ្នាំ២០១៨ ពណ៌ស ពាក់ផ្លាកលេខ ភ្នំពេញ ១JS-០៧៤៨ កាលពីវេលាម៉ោងជាង១រសៀលថ្ងៃទី១ខែឧសភា ខណ:ជនរងគ្រោះកំពុងធ្វើដំណើតាមផ្លូវដល់ភូមិតាកុក ឃុំនរា ស្រុកសង្កែ ។
លោក ឈឿង គឹមសុង បញ្ជាក់ថា ក្រោយកើតហេតុ លោកស្នងការបានបញ្ជាឲ្យកម្លាំងការិយាល័យរបស់លោកតាមស៊ើបអង្កេតមុខសញ្ញាក្រុមជនសង្ស័យយ៉ាងដុតដៃដុតជើងបំផុត រហូតឈានដលឃាត់ខ្លួនជនដៃដល់បាន២នាក់ រីឯម្នាក់ទៀតកំពុងរត់គេចខ្លួន ។ ជាមួយនឹងការឃាត់ខ្លួននេះ ជនទំនើងដែលបែកគំនិតធ្វើចោរស្ទាក់ប្លន់អ្នកដំណើតាមដងផ្លូវនេះសារភាពថា ពួកខ្លួនមានគ្នា៣នាក់ ហើយពិតជាបានស្ទាក់កាប់ជនរងគ្រោះខាងលើ ដើម្បីប្លន់យកម៉ូតូមែន ។
ជនអន្ធពាលទាំង២នាក់នេះនិយាយថា ក្រោយពីប្លន់បានសម្រេច ពួកខ្លួនបានជិះម៉ូតូនោះយកទៅប្តូរផ្លាកលេខនៅផ្ទះបក្សពួកនៅកន្លែងចាប់ខ្លួនខាងលើ តែទើបបានមួយថ្ងៃក៏សមត្ថកិច្ចឆ្មក់ទៅក្រសោបជាប់តែម្ដង ។ នៅពេលសួរថា តើហេតុអ្វីត្រូវប្ដូរផ្លាកលេខ ? ក្រុមជនពាលនេះបានផ្ដល់ចម្លើយយ៉ាងខ្លីថា ពួកខ្លួនប្ដូរផ្លាកដើម្បីងាយស្រូលជិះធ្វើសកម្មភាពប្រព្រឹត្តបទល្មើសទៀត ។
នៅក្នុងសកម្មភាពប្លន់នេះ បើតាមលោកឈឿង គឹមសុង ថា នៅក្នុងហេតុការណ៍កាប់ប្លន់យកុំម៉ូតូនោះ ជនរងគ្រោះមិនមានរបួសស្នាមទេ ព្រោះពេលនោះជនរងគ្រោះបានផ្ដូលម៉ូតូរត់ ទើបក្រុមជនល្មើសលើកម៉ូតូជិះគេចខ្លួនបាត់ទៅ។
លោកនាយការិយាល័យបញ្ជាក់ថា បើតាមការស្រាវជ្រាវកន្លងមក ក្រុមជនដៃដល់ទាំងនេះគឺជាមុខសញ្ញាក្រុមក្មេងទំនើង តែពួកនេះបានបែកគំនិតធ្វើចោរឆក់ចោរប្លន់ម្ដង ។ ទោះជាយ៉ាងណា ជាមួយនឹងការចាប់ខ្លួននេះ សមត្ថកិច្ចដកហូតបានម៉ូតូចំនួន២គ្រឿងពីជនសង្ស័យ រួមទាំងវត្ថុតាងមួយចំនួនទៀត។ លោកស្នងការ បានបញ្ជាឲ្យមន្ត្រីជំនាញនៃអធិការដ្ឋាននគរបាលស្រុកសង្កែ ធ្វើការសាកសួរដើម្បីកសាងសំណុំរឿង និងបញ្ជូនបន្តទៅការិយាល័យជំនាញដើម្បីចាត់ការតាមនីតិវិធី ៕
ចែករំលែកព័តមាននេះ