រាជធានីភ្នំពេញ ៖ ក្នុងពេលវិស័យអចលនទ្រព្យ ជាពិសេសវិស័យសំណង់កំពុងរីកដុះដាលខ្លាំងនៅកម្ពុជានោះ ការផ្ដល់កម្ចីនៅក្នុងវិស័យនេះក៏បានកើនឡើងគួរឲ្យកត់សម្គាល់ដែរ រហូតមានការព្រមានពីសេដ្ឋវិទូមួយចំនួន អំពីហានិភ័យណាមួយដែលនឹងកើតឡើងពីកម្ចី ក្នុងវិស័យអចលនទ្រព្យនេះ ។
ជាមួយគ្នានេះផងដែរ មានទស្សនទានជាច្រើនពីវិស័យឯកជន ក៏ដូចជាប្រមុខដឹកនាំរាជរដ្ឋាភិបាលបានលើកឡើងថា ទំនាក់ទំនងនយោបាយដ៏រឹងមាំរបស់ប្រទេសកម្ពុជាជាមួយប្រទេសចិន ពាក់ព័ន្ធនឹង «គំនិតផ្តួចផ្តើមផ្លូវមួយ ខ្សែក្រវ៉ាត់» មួយរបស់ចិន នឹងទាក់ទាញការវិនិយោគចិនយ៉ាងច្រើនបន្ថែមទៀត ជាពិសេសមានលទ្ធផលជាច្រើនបានបង្ហាញឲ្យឃើញតាមរយៈការសាងសង់សណ្ឋាគារថ្មីៗ អចលនទ្រព្យផ្សេងៗ លំនៅដ្ឋាន ហាងលក់ទំនិញនិងកាស៊ីណូ ដែលភាគច្រើននៅក្នុងទីក្រុងភ្នំពេញ ក៏ដូចជាក្រុងព្រះសីហនុ ជាដើម។
បើតាមទស្សនទានរបស់ធនាគារពិភពលោកប្រចាំកម្ពុជាថា សេដ្ឋកិច្ចកម្ពុជា បានរក្សាលំនឹងមួយល្អប្រសើរហើយ ប៉ុន្តែយ៉ាងណាក៏ដោយកម្ពុជាគួរតែប្រយ័ត្នប្រយែងខ្ពស់ចំពោះការផ្ដល់កម្ចីទៅលើអចលនទ្រព្យ និងការដំឡើងប្រាក់បៀវត្សរ៍ ។ របាយការណ៍របស់ធនាគាពិភពលោក ឬហៅថា World Bank បានឲ្យដឹងថាភាពមិនប្រាកដប្រជាដែលបន្តមាន បានធ្វើអោយហានិភ័យកាន់តែមានសភាពតានតឹង ។
នៅក្នុងខែកុម្ភៈដើមឆ្នាំនេះសហភាពអឺរ៉ុបបានចាប់ផ្ដើមដំណើរព្យួរបណ្ដោះអាសន្ននូវភាពអនុគ្រោះ សម្រាប់កម្ពុជាក្រោមប្រព័ន្ធអនុគ្រោះ «គ្រប់មុខទំនិញទាំងអស់លើកលែងគ្រឿងសព្វាវុធ» (EBA) ។ ជាងនេះទៅទៀត បច្ចុប្បន្ននេះ ទីផ្សារក្នុងសហភាពអឺរ៉ុប មានចំណែកជាងមួយភាគបីនៃមុខទំនិញនាំចេញសំខាន់ៗរបស់កម្ពុជា (ក្នុងនោះមានសំលៀកបំពាក់ ស្បែកជើង និងទោចចក្រយាន)។ អាស្រ័យហេតុនេះ ការបាត់បង់ភាពអនុគ្រោះ EBA ដែលអនុញ្ញាតឱ្យកម្ពុជានាំទំនិញចូលអឺរ៉ុបដោយមិនជាប់ពន្ធនិងកូតា ទំនងជាអាចនឹងធ្វើឱ្យកំណើននៃការនាំចេញថយល្បឿនមកវិញ។ ជាងនេះទៅទៀត ដោយសារកម្ពុជាពឹងពាក់ខ្លាំងលើការហូរចូលមូលធនមកពីប្រទេសចិន ការធ្លាក់ចុះយ៉ាងគំហុករបស់សេដ្ឋកិច្ចចិនក្នុងកាលៈទេសៈណាមួយ នឹងអាចជះផលមិនល្អ មកលើទស្សនវិស័យកំណើនសេដ្ឋកិច្ចរបស់កម្ពុជាដែរ ។
ក្នុងស្ថានភាពដែលបន្តខ្វះភាពប្រាកដប្រជាបែបនេះ សំខាន់ណាស់ដែលគេត្រូវធ្វើយ៉ាងណាកាត់បន្ថយភាពងាយរងគ្រោះផ្នែកម៉ាក្រូសេដ្ឋកិច្ចឱ្យមកនៅកម្រិតទាបបំផុត ។ វិធានការចាំបាច់រួមមាន រក្សាបញ្ជីបៀវត្សរ៍សាធារណៈកុំឱ្យរីកមាឌតទៅទៀត ពង្រឹងសមត្ថភាពឃ្លាំមើលនិងត្រៀមឆ្លើយតបវិបត្តិនៅក្នុងវិស័យហិរញ្ញវត្ថុ និងពិចារណា ចាត់វិធានការប្រុងប្រយ័ត្នផ្នែកម៉ាក្រូសេដ្ឋកិច្ចថែមទៀត ដូចជាការដាក់កំហិតដល់ធនាគារក្នុងការផ្តល់កម្ចីឱ្យផ្នែកសំណង់ និងអចលនទ្រព្យ ជាដើម ។
របាយការណ៍ធនាគារជាតិនៃកម្ពុជា បានបង្ហាញថា «វឌ្ឍនភាពក្នុងវិស័យសំណង់ បានឆ្លុះបញ្ចាំងតាមរយៈសូចនាករសំខាន់ៗ ដូចជាការកើនឡើងនៃការនាំចូលសម្ភារៈសំណង់ កំណើនឥណទានចំពោះវិស័យសំណង់ និងផ្ទៃក្រឡាសំណង់ ជាដើម ។ ក្នុងវិស័យនេះដែរ បានផ្ដល់ការងារដល់អ្នកជំនាញ និងកម្មករប្រមាណ២២ម៉ឺននាក់ ធ្វើការតាមការដ្ឋាននានាទូទាំងប្រទេស ក្រោមការវិនិយោគភាគច្រើនពីវិនិយោគិនបរទេសដូចជា ចិន កូរ៉េ ជប៉ុន ថៃ តៃវ៉ាន់ សិង្ហបុរី និងអង់គ្លេស ជាដើម» ។
យ៉ាងណាមិញ នៅក្នុងរបាយការណ៍ប្រចាំឆ្នាំ២០១៨ និងទិសដៅ២០១៩ របស់ធនាគារជាតិនៃកម្ពុជាក៏បានលើកឡើងអំពីបញ្ហាប្រឈមមួយចំនួនដែលអាចប៉ះពាល់ដល់សេដ្ឋកិច្ចកម្ពុជាសម្រាប់ឆ្នាំ ២០១៩ ជាពិសេសបណ្តាលមកពីកត្តាខាងក្នុងដូចជា៖ ១- ការបន្តពឹងផ្អែកកាន់តែខ្លាំងនៃកំណើនសេដ្ឋកិច្ចលើវិស័យសំណង់, ២)- កំណើនឥណទានខ្ពស់ទៅកាន់វិស័យសំណង់និងអចលទ្រព្យ និង៣)- ការកើនឡើងលឿនៃប្រាក់ឈ្នួលអប្បបរមា ដែលបង្កើនថ្លៃដើមផលិតកម្មក្នុងវិស័យកាត់ដេរសម្លៀកបំពាក់និងស្បែកជើង ។
របាយការណ៍ដដែលបានឆ្លុះបញ្ចាំងឲ្យឃើញ ថាការឲ្យខ្ចីពីសំណាក់ធនាគារនិងគ្រឹះស្ថានហិរញ្ញវត្ថុនានាសម្រាប់ការទិញផ្ទះជាកម្មសិទ្ធផ្ទាល់ខ្លួនមានការកើនឡើងគួរឲ្យកត់សម្គាល់ផងដែរ ជាក់ស្តែងក្នុងឆ្នាំ ២០១៨ គឺការឲ្យខ្ចីសម្រាប់ការទិញផ្ទះជាកម្មសិទ្ធផ្ទាល់ខ្លួនមានចំនួនដល់ទៅ ៨ ២៧០ ប៊ីលានរៀល កើនឡើងពីចំនួនប្រមាណជាង ៦ ២៩៦ ប៊ីលានរៀលក្នុងឆ្នាំ ២០១៧ ។
បើតាមលោក ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល បានឲ្យដឹងថា សព្វថ្ងៃនេះ សក្ដានុពលវិនិយោគក្នុងវិស័យអចលនទ្រព្យនៅតែមានឱកាសច្រើនទៀត ពីព្រោះតម្រូវការនៅតែមានខ្ពស់ ជាពិសេសក្នុងវិស័យដីធ្លី ។ លោកបន្តថា « ខ្ញុំមើលមិនឃើញថា វិស័យអចលនទ្រព្យមានបញ្ហាណាមួយកើតឡើងនោះទេ ហើយវានៅតែមានឱកាសច្រើនទៀតសម្រាប់វិនិយោគិនបណ្ដាក់ទុនវិនិយោគក្នុងវិស័យនេះ ទាំងសំណង់និងដីធ្លី » ។
អគ្គនាយកក្រុមហ៊ុនអចលនទ្រព្យ ស៊ីភីអិល បានមានប្រសាសន៍បន្តថា នៅពេលខាងមុខនេះ វិនិយោគិនថ្មីៗនឹងចូលមកបណ្ដាក់ទុនវិនិយោគ នៅកម្ពុជាបន្ថែមទៀត ស្របពេលដែលតម្រូវការនៅតែមាន តែអ្វីដែលកម្ពុជាត្រូវត្រៀមខ្លួនទទួលពួកគេនោះ គឺចំណេះដឹងនិងជំនាញ ។ ការវិនិយោគអ្វីមួយត្រូវការចំណេះដឹង និងជំនាញច្បាស់លាស់ ដើម្បីការពារហានិភ័យដែលនឹងកើតឡើងនៅពេលណាមួយ ដូច្នេះហើយអ្នកវិនិយោគ រឺបម្រើសេវាវិស័យអចលនទ្រព្យត្រូវតែឆ្លងកាត់ការបណ្ដុះបណ្ដាលត្រឹមត្រូវ មុននឹងចេញប្រឡូកនឹងការងារនេះ ៕
ចែករំលែកព័តមាននេះ