ខេត្តបន្ទាយមានជ័យ ៖ បុរសជនជាតិចិនម្នាក់បានស្លាប់ក្រោយបញ្ជូនទៅមន្ទីរពេទ្យក្នុងហេតុការណ៍គ្រោះថ្នាក់ចរាចររវាងរថយន្តបុកជាមួយម៉ូតូលើដងផ្លូវជាតិលេខ៥ (មុខផ្លូវចូលបុរីធីធី) ក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត កាលពីវេលារំលងអាធ្រាត្រឈានចូលព្រឹកថ្ងៃទី៥ ឧសភា ២០១៩ ។
ជនរងគ្រោះស្លាប់ឈ្មោះWANG LI ភេទប្រុស អាយុ៣៦ឆ្នាំ កាន់លខិតឆ្លងដែនលេខ EB7162967មុខរបរជាបុគ្គលិកផ្នែកអនឡាញរបស់កាស៊ីណូមួយ ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។
ពាក់ព័ន្ធនឹងករណីគ្រោះថ្នាក់ចរាចរខាងលើនេះ ត្រូវបានសមត្ថកិច្ចជំនាញអះអាងថា ដោយសារហេតុ
ការណ៍គ្រោះថ្នាក់ចរាចរណ៍នេះបានកើតឡើងនៅវេលារំលងអាធ្រាត្រ ទើបពុំមានអ្នកឃើញហេតុការណ៍ច្បាស់ទេ គឺគេគ្រាន់តែដឹងថា ជនរងគ្រោះជិះម៉ូតូមួយគ្រឿងម៉ាកឃ្លីក ពណ៌ស គ្មានស្លាកលេខ បានបុកគ្នាជាមួយរថយន្តមិនស្គាល់ម៉ាកមួយគ្រឿង បណ្តាលឱ្យអ្នកបើកបរម៉ូតូរបួសធ្ងន់ ហើយត្រូវបានរថយន្តបង្កនោះជួយដឹកជនរងគ្រោះបញ្ជូនទៅកាន់មន្ទីរពេទ្យ ក្រោយមកអ្នកបើកបររថយន្តបង្កបានគេចទៅបាត់ រីឯជនរងគ្រោះដោយសាររបួសធ្ងន់ធ្ងរពេកក៏បានស្លាប់តែម្តង។
សមត្ថកិច្ចជំនាញបានប្រាប់ថា នៅវេលាយប់ថ្ងៃទី៥ ឧសភា ឆ្នាំ២០១៩ សមត្ថកិច្ចនឹងជួបសន្តិសុខម្នាក់ដែលឃើញហេតុការណ៍ ព្រោះជាវេនគាត់យាមយប់កាលពីយប់កើតហេតុ ដើម្បីធ្វើការសាកសួររកមូលហេតុពិតប្រាកដ ។ ចំណែកសពជនរងគ្រោះត្រូវបានតម្កល់ទុកនៅវត្តបាលិលេយ្យ ក្នុងភូមិក្បាលស្ពាន២ សង្កាត់ប៉ោយប៉ែត រង់ចាំសាច់ញាតិមកពីប្រទេសចិនចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ