ខេត្ត Quang Ngai ភាគកណ្តាលបានដាក់ឱ្យដំណើរការរោងចក្រថាមពលព្រះអាទិត្យលើកដំបូងនៅស្រុកមិញឌូ បន្ទាប់ពីការសាងសង់អស់រយៈពេល៣ឆ្នាំ ដោយផ្គត់ផ្គង់២៨លានគីឡូវ៉ាត់ក្នុងមួយម៉ោងទៅបណ្តាញអគ្គិសនីជារៀងរាល់ឆ្នាំ និងសន្សំសំចៃការបញ្ចេញឧស្ម័នកាបូន២១០០០តោន ។
រោងចក្រថាមពល១៩.២មេហ្គាវ៉ាត់ដែលត្រូវបានដាក់ឱ្យដំណើរការកាលពីសប្ដាហ៍មុន គឺជាគម្រោងថាមពលកកើតឡើងវិញធំជាងគេនៅក្នុងខេត្ត ដោយមានទុនវិនិយោគសរុបចំនួន ៣៩.៨លានដុល្លារ ។
ប្រធានក្រុមហ៊ុន Tianjin Group ដែលជាម្ចាស់គម្រោង លោក Huynh Kim Lập បានថ្លែងថាគម្រោងនេះត្រូវបានគេមើលឃើញថា ជាចំណុចពិសេសមួយនៃថាមពលស្អាត និងបៃតងនាពេលអនាគតនៅក្នុងខេត្ត និងឆ្នេរសមុទ្រវៀតណាម ។
លោកបាននិយាយថា វាជាគម្រោងថាមពលពន្លឺព្រះអាទិត្យដំបូងគេ នៅក្នុងខេត្តដែលមានបំណងទាញយកប្រភពថាមពលកកើតឡើងវិញ នៅតាមឆ្នេរសមុទ្រក៏ដូចជា កាត់បន្ថយការបញ្ចេញកាបូន ។
យោងតាមមន្ទីរឧស្សាហកម្ម និងពាណិជ្ជកម្មខេត្តវិនិយោគិនបរទេសពីចក្រភពអង់គ្លេស ថៃ និងវៀតណាមបានស្នើគម្រោងថាមពលពន្លឺព្រះអាទិត្យមួយចំនួននៅខេត្ត Quang Ngai ដែលមានសមត្ថភាពប្រមាណ៦០០មេហ្កាវ៉ាត់ និងការវិនិយោគ៨៦០លានដុល្លារ ។
រហូតមកដល់ពេលនេះ គម្រោងថាមពលពន្លឺព្រះអាទិត្យចំនួន១២០ ត្រូវបានសាងសង់ និងអនុម័តនៅក្នុងប្រទេសវៀតណាមក្នុងការផ្គត់ផ្គង់ថាមពល២៦០០០មេហ្គាវ៉ាត់ដែលមាន៦០%នៃសមត្ថភាពថាមពលសរុបរបស់ប្រទេស ហើយគម្រោងដទៃទៀតចំនួន២២១គ្រោងនឹងចាប់ផ្តើមសាងសង់នៅឆ្នាំ២០៣០ ។
ក្រុមហ៊ុន Tianjin Group ក៏មានគម្រោងវិនិយោគ២ពាន់លានដុល្លារ ដើម្បីសាងសង់គម្រោងថាមពលពន្លឺព្រះអាទិត្យទាំង៥ នៅខេត្ត Ninh Thuan នៅត្រឹមឆ្នាំ២០២០ ៕
ចែករំលែកព័តមាននេះ