រាជធានីភ្នំពេញ ៖ ក្រសួងព័ត៌មានបានស្នើឲ្យប្រព័ន្ធផ្សព្វផ្សាយទាំងអស់ ដែលកំពុងប្រតិបត្តិការនៅកម្ពុជា ផ្អាកការផ្សាយពាណិជ្ជកម្មគ្រឿងស្រវឹងនៅថ្ងៃបុណ្យវិសាខបូជា និងមាឃបូជា ដែលត្រូវបានចាត់ទុកជាថ្ងៃដ៏សំខាន់ សម្រាប់ប្រជាពលរដ្ឋកម្ពុជាដ៏ច្រើនលើសលប់ប្រតិបត្តិនូវជំនឿព្រះពុទ្ធសាសនា ។
សេចក្តីជូនដំណឹងដែលចុះហត្ថលេខាដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅថ្ងៃទី៣០ ខែមេសា ឆ្នាំ២០១៩ បានបញ្ជាក់ថា ការផ្អាកការផ្សាយពាណិជ្ជកម្មគ្រឿងស្រវឹងនៅថ្ងៃបុណ្យទាំងពីរនេះ គឺដើម្បីកុំឲ្យប៉ះពាល់ដល់វិស័យសាសនារបស់រដ្ឋ ។
សេចក្តីជូនដំណឹងបញ្ជាក់ថា ពិធីបុណ្យវិសាខបូជានិងមាឃបូជា គឺជាថ្ងៃដែលរាជរដ្ឋភិបាលកំណត់ថា ជាថ្ងៃបុណ្យជាតិ និងប្រារព្ធធ្វើឡើងជារៀងរាល់ឆ្នាំ ។ បុណ្យវិសាខបូជា គឺដើម្បីរំឭកដល់ព្រះសម្មាសម្ពុទ្ធទ្រង់ប្រសូត ត្រាស់ដឹង និងចូលបរិនិព្វាន ក្នុងថ្ងៃ១៥កើតពេញបូណ៌មី ខែពិសាខ ។
ចំណែពិធីបុណ្យមាឃបូជា ប្រារព្ធឡើងក្នុងន័យរំឭកដល់ថ្ងៃដែលព្រះសម្មាសម្ពុទ្ធទ្រង់ប្រកាសបង្កើតព្រះពុទ្ធសាសនាក្នុងលោកនៅប្រទេសឥណ្ឌាកាលពី៥៨៨ឆ្នាំមុនគ្រិស្តសករាជ នាថ្ងៃទី១៥កើត ខែមាឃ ក្រោយពីព្រះអង្គត្រាស់ដឹងចំនួន៩ខែគត់ ។
សេចក្តីជូនដំណឹងបានស្នេីឲ្យអាជ្ញាធរគ្រប់លំដាប់ថ្នាក់ សហការអនុវត្តនិងផ្សព្វផ្សាយពីការហាមឃាត់ចំពោះការផ្សាយពាណិជ្ជកម្មគ្រឿងស្រវឹងនៅថ្ងៃបុណ្យទាំងពីរនេះ ឲ្យមានប្រសិទ្ធភាពខ្ពស់បំផុត ។ ជាមួយគ្នានេះ ក៏បានព្រមានចាត់វិធានការតាមផ្លូវច្បាប់ចំពោះអ្នកប្រព្រឹត្តខុស ដែលធ្វើឲ្យប៉ះពាល់ដល់សាសនារបស់រដ្ឋ ៕
ចែករំលែកព័តមាននេះ