រាជធានីភ្នំពេញ ៖ ក្នុងកាលៈទេសៈ វិស័យបច្ចេកវិទ្យាកំពុងដើរទៅរកបដិវត្តន៍ ឧស្សាហកម្មទី៤ កម្ពុជាក៏កំពុងអភិវឌ្ឍន៍វិស័យបច្ចេកវិទ្យានេះឲ្យទាន់ជាមួយនឹងបណ្ដាប្រទេសជឿនលឿនលើពិភពលោក ដោយសារតែវាដើរតួនាទីសំខាន់ក្នុងការលើកកម្ពស់កិច្ចសម្រួលពាណិជ្ជកម្ម ជាពិសេសការអភិវឌ្ឍសេដ្ឋកិច្ចឌីជីថលនៅកម្ពុជា ។ លោកប៉ាន…
រាជធានីភ្នំពេញ ៖ ក្នុងកាលៈទេសៈ វិស័យបច្ចេកវិទ្យាកំពុងដើរទៅរកបដិវត្តន៍ ឧស្សាហកម្មទី៤ កម្ពុជាក៏កំពុងអភិវឌ្ឍន៍វិស័យបច្ចេកវិទ្យានេះឲ្យទាន់ជាមួយនឹងបណ្ដាប្រទេសជឿនលឿនលើពិភពលោក ដោយសារតែវាដើរតួនាទីសំខាន់ក្នុងការលើកកម្ពស់កិច្ចសម្រួលពាណិជ្ជកម្ម ជាពិសេសការអភិវឌ្ឍសេដ្ឋកិច្ចឌីជីថលនៅកម្ពុជា ។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍នៅក្នុងជំនួបជាមួយលោក Justin Wood នាយកប្រចាំតំបន់អាស៊ីប៉ាស៊ីហ្វិកកាលពីថ្ងៃទី៣០ ខែមេសា ឆ្នាំ ២០១៩ នេះថា បច្ចេកវិទ្យាបានដើរតួនាទីយ៉ាងសំខាន់ ក្នុងការលើកស្ទួយកិច្ចសម្រួលពាណិជ្ជកម្ម និងចំណាត់ថ្នាក់ស្តីពីភាពងាយស្រួលក្នុងការធ្វើធុរកិច្ចរបស់កម្ពុជា ក៏ដូចជាការអភិវឌ្ឍសេដ្ឋកិច្ចឌីជីថល ខណៈដែលពិភពលោកកំពុងតែធ្វើដំណើរឆ្ពោះទៅចាប់យកកាលានុវត្តភាពពីឧស្សាហកម្មជំនាន់ទី៤ ។ លោកបន្តថា ចក្ខុវិស័យរបស់រាជរដ្ឋាភិបាលកម្ពុជានឹងនាំយកបច្ចេកវិទ្យាឌីជីថលឆ្ពោះទៅកាន់ឧស្សាហកម្ម ៤.០ ដើម្បីបង្កើនគណនេយ្យភាព និងតម្លាភាពនៃការផ្តល់សេវាសាធារណៈ ព្រមទាំងអភិវឌ្ឍន៍កំណើនសេដ្ឋកិច្ចប្រកបដោយចីរភាព ដូច្នេះរដ្ឋាភិបាលត្រូវការអ្នកវិនិយោគបន្ថែម ដើម្បីវិនិយោគលើវិស័យបច្ចេកវិទ្យា ។
ដោយឡែក លោក ចាស្ទីន វូដ បានជម្រាបជូនអំពីគម្រោង Digital ASEAN និង E-Payment ដែលផ្តួចផ្តើមបង្កើតដោយមូលនិធិវេទិកាសេដ្ឋកិច្ចពិភពលោក (WEF) និងបានស្នើសុំទស្សនៈ និងការចូលរួមរបស់ រដ្ឋមន្ត្រីពាណិជ្ជកម្ម ដើម្បីអនុវត្តន៍គម្រោងទាំងអស់នេះ សំដៅចូលរួមអភិវឌ្ឍន៍សេដ្ឋកិច្ចឌីជីថល និងជំរុញកិច្ចសម្រួលពាណិជ្ជកម្ម នៅតាមបណ្តារដ្ឋជាសមាជិកអាស៊ាន ។ បើតាមលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានលើកឡើងផងដែរថា បដិវត្តន៍ឧស្សាហកម្មទី ៤ បានបង្ហាញពីការរីកចម្រើនយ៉ាងលឿននៃបច្ចេកវិទ្យា ជាពិសេស ក្នុងផ្នែកឌីជីថល ក្នុងការបង្កើតនូវជីវភាពកំណើនថ្មីមួយដែលពឹងផ្អែកលើបច្ចេកវិទ្យាព័ត៌មាន ។ លោកថា៖« ការរីកចម្រើននៃបច្ចេកវិទ្យាឌីជីថល ក៏នឹងធ្វើឱ្យវិស័យហិរញ្ញវត្ថុផ្លាស់ប្ដូរទៅ រកទម្រង់ថ្មីមួយ ដែលទាមទារឱ្យយើងត្រូវរៀបចំនូវក្របខ័ណ្ឌគតិយុត្ត, រៀបចំយន្តការ អនុវត្តច្បាប់, កសាងហេដ្ឋារចនាសម្ព័ន្ធគាំទ្រ និង បណ្តុះបណ្តាលធនធានមនុស្ស ដើម្បី ចាប់យកកាលានុវត្តភាព ឱ្យបានជាអតិបរមាពីការប្រែប្រួលនេះ » ។
លោកបន្តថា លោកសូមលើកទឹកចិត្ត ឱ្យដៃគូពាក់ព័ន្ធទាំងអស់, ទាំងរដ្ឋ និង ឯកជន, បង្កើនការយកចិត្តទុកលើចំណុចទាំងនោះ ជាពិសេស ការបង្កើនសមត្ថភាព និង អភិវឌ្ឍធនធានមនុស្ស និង ការបណ្ដុះបណ្ដាលវិជ្ជាជីវៈ, ដើម្បីផ្ដល់មូលដ្ឋាន និង ភាពងាយស្រួលដល់យុវជនក្នុងការ- ចាប់យកជំនាញផ្សេងៗនាពេលអនាគត ស្របពេលដែលបរិបទនៃការអភិវឌ្ឍមានការផ្លាស់ប្ដូរ លឿន ក៏ដូចជាក្នុងការចូលរួមចំណែកកសាងប្រទេសជាតិឱ្យរីកចម្រើនកាន់តែឆាប់រហ័ស ។
គួររំលឹកដែរថា កាលពីខែកញ្ញា ឆ្នាំ២០១៨ នៅខាងក្រៅវេទិកាសេដ្ឋកិច្ចពិភពលោក លើកទី២៧ ស្តីពីអាស៊ាន ដែលរៀបចំឡើងនៅទីក្រុងហាណូយ ប្រទេសវៀតណាម សម្តេចតេជោនាយករដ្ឋមន្ត្រី បានទទួលជួបពិភាក្សាជាមួយលោកបណ្ឌិត Klaus Schwab ជាស្ថាបនិកមូលនិធិវេទិកាសេដ្ឋកិច្ចពិភពលោក ដើម្បីផ្លាស់ប្តូរទស្សនៈមួយចំនួន ជុំវិញការអភិវឌ្ឍសេដ្ឋកិច្ចឌីជីថល ។ នៅក្នុងនោះ សម្តេចតេជោបានគូសបញ្ជាក់ថា កម្ពុជា និងអាស៊ានគួរតែផ្តោតការយកចិត្តទុកដាក់លើការប្រើប្រាស់បច្ចេកវិទ្យា ដើម្បីបម្រើការអភិវឌ្ឍសង្គមសេដ្ឋកិច្ច និងការកាត់បន្ថយភាពក្រីក្រ ៕
ចែករំលែកព័តមាននេះ