រាជធានីភ្នំពេញ៖ ក្រសួងព័ត៌មានស្នើឲ្យដល់ប្រព័ន្ធផ្សព្វផ្សាយទាំងអស់ដែលកំពុងប្រតិបត្តិការនៅកម្ពុជា ផ្អាកការផ្សាយពាណិជ្ជកម្មគ្រឿងស្រវឹងនៅថ្ងៃបុណ្យវិសាខបូជា និងមាឃបូជា ដែលត្រូវបានចាត់ទុកជាថ្ងៃដ៏សំខាន់សម្រាប់ប្រជាពលរដ្ឋកម្ពុជាដែលប្រណិប័តន៍នូវជំនឿរបស់ព្រះពុទ្ធ។
សេចក្តីជូនដំណឹងរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ចុះថ្ងៃទី៣០ ខែមេសា បានបញ្ជាក់ថា ការផ្អាកការផ្សាយពាណិជ្ជកម្មគ្រឿងស្រវឹងនៅថ្ងៃបុណ្យជាតិទាំងពីរនេះ គឺដើម្បីឲ្យប៉ះពាល់ដល់វិស័យសាសនារបស់រដ្ឋ។
សេចក្តីជូនដំណឹងដដែលបានបញ្ជាក់ថា ពិធីបុណ្យវិសាខបូជា និងមាឃបូជា គឺជាថ្ងៃដែល រាជរដ្ឋភិបាលបានកំណត់ថា ជាថ្ងៃបុណ្យជាតិ និងប្រារព្ធធ្វើឡើងជារៀងរាល់ឆ្នាំ ដើម្បីរំឭកដល់ព្រះសម្មាសម្ពុទ្ធប្រសូត ត្រាស់ដឹង និងការចូលនិព្វាន ក្នុងថ្ងៃ១៥កើត ពេញបូណ៌មី ខែវិសាខ។ ចំណែកពិធីបុណ្យមាឃបូជា បានប្រារព្ធឡើងក្នុងន័យរំឭកដល់ថ្ងៃ ដែលព្រះសម្មាសម្ពុទ្ធទ្រង់ប្រកាស បង្កើតព្រះពុទ្ធសាសនាក្នុងលោក នៅប្រទេសឥណ្ឌា កាលពី៥៨៨ឆ្នាំ មុនគ្រឹស្តសករាជ នាថ្ងៃទី១៥កើត ខែមាឃ ក្រោយព្រះអង្គត្រាស់ដឹងចំនួន៩ខែគត់ ។
សេចក្តីជូនដំណឹងបានស្នើអោយអាជ្ញាធរគ្រប់លំដាប់ថ្នាក់សហការអនុវត្ត និងផ្សព្វផ្សាយពីការហាមឃាត់ចំពោះការផ្សាយពាណិជ្ជកម្មគ្រឿងស្រវឹងនៅថ្ងៃទាំងពីរនេះ ឲ្យមានប្រសិទ្ធភាពខ្ពស់បំផុត។ ជាមួយគ្នានេះ ក៏បានព្រមានចាត់វិធានការតាមផ្លូវច្បាប់ចំពោះអ្នកប្រព្រឹត្តខុស ដែលធ្វើឲ្យប៉ះពាល់ដល់សាសនារបស់រដ្ឋ៕
ចែករំលែកព័តមាននេះ