ខេត្តស្វាយរៀង ៖ លោកគ្រូ អ្នកគ្រូ និងសិស្សានុសិស្សអនុវិទ្យាល័យអណ្តូងពោធិ៍ ស្ថិតក្នុងភូមិត្រពាំងបុស ឃុំអណ្តូងពោធិ៍ ស្រុករមាសហែក បានអំពាវនាវដល់ប្រមុខរាជរដ្ឋាភិបាល មេត្តាផ្តល់អគារសិក្សាមួយខ្នងមាន៥បន្ទប់ ដល់សិស្សានុសិស្ស ដើម្បីបានសិក្សារៀនសូត្រ ដោយសារក្នុងឆ្នាំសិក្សា២០១៨-២០១៩នេះមានការខ្វះបន្ទប់សិក្សាថ្នាក់ទី៨ ហើយត្រូវរៀននៅក្នុងរោងរខេករខាកមួយប្រក់ស្លឹក ដំបូលរហែកធ្លុះធ្លាយក្រោមកម្តៅថ្ងៃ គ្មានជញ្ជាំង និងពិបាកខ្លាំងពេលមានភ្លៀងគឺខកខានមិនបានសិក្សាឡើយ។
ជាមួយនេះ ដោយសារកំណើនសិស្សពីមួយឆ្នាំទៅមួយឆ្នាំ ធ្វើឱ្យស្ថានភាពរបស់អនុវិទ្យាល័យខ្វះអគារទីចាត់ការ បណ្ណាល័យ និងបន្ទប់សិក្សា ទើបត្រូវឲ្យសិស្សរៀននៅក្នុងរោងប្រក់ស្លឹក ដំបូលរហែកធ្លុះធ្លាយបែបនេះ ។ លោក ប្រាក់ ដន នាយករងអនុវិទ្យាល័យអណ្តូងពោធិ៍ បានឲ្យដឹងថា អនុវិទ្យាល័យនេះមានសភាពតូចចង្អៀត មូលហេតុខ្វះខាតអគារ និងបន្ទប់សម្រាប់ឱ្យសិស្សសិក្សា ដោយត្រូវសង់រោងដោលមួយប្រក់ស្លឹក ដើម្បីឱ្យសិស្សបានរៀនជាបណ្តោះអាសន្នអស់រយៈពេលជាង២ឆ្នាំមកហើយ ។ អនុវិទ្យាល័យនេះមានអគារតែមួយខ្នង៥បន្ទប់ ហើយមួយបន្ទប់ត្រូវយកទៅធ្វើជាទីចាត់ការថែមទៀត ។
លោកនាយករង បន្តទៀតថា គ្រូមានចំនួន២៣រូប(ស្រី៧រូប) សិស្សានុសិស្សឆ្នាំសិក្សា២០១៨-២០១៩សរុប២៦២នាក់(ស្រី១៤២នាក់)ហើយបញ្ហាខ្វះបន្ទប់សិក្សានេះ គឺចាប់តាំងពីឆ្នាំ២០១៥រហូតមក ។បច្ចុប្បន្ន អនុវិទ្យាល័យនេះខ្វះអគារទីចាត់ការ បណ្ណាល័យ ជាពិសេសថ្នាក់រៀនតែម្តង។លោកបានអំពាវសូមឲ្យរាជរដ្ឋាភិបាល និងអង្គការនានាមេត្តាជួយផ្តល់អគារសិក្សាមួយខ្នងមាន៥បន្ទប់ ដើម្បីឲ្យសិស្សានុសិស្សបានចូលរៀនសូត្រដោយអនុគ្រោះ ។
ពាក់ព័ន្ធទៅនឹងករណីខាងលើនេះដែរ មន្ត្រីសាលាខេត្តក៏បានឱ្យដឹងដែរថា កន្លងមកខេត្ត ក៏បានធ្វើរបាយការណ៍ជម្រាបជូនលោក សៅ សុខា ដែលជាប្រធានក្រុមការងារចុះជួយស្រុករមាសហែក និងលោកស្រី ឈុន សារឹម តំណាងរាស្ត្រមណ្ឌលស្វាយរៀង ដើម្បីចុះពិនិត្យសិក្សាវាយតម្លៃអំពីបញ្ហាកង្វះខាតអគារនិងបន្ទប់សិក្សារួចរាល់ហើយដែរ ដើម្បីបំពេញតម្រូវការរបស់លោកគ្រូអ្នកគ្រូនិងប្អូនៗសិស្សានុសិស្ស
ទោះបីជាយ៉ាងណាក៏ដោយ ចំពោះលទ្ធផលថាបានអគារសិក្សាថ្មីបន្ថែមទៀតនោះនៅពុំទាន់ដឹងលទ្ធផលនៅឡើយទេរហូតមកដល់ពេលនេះហើយកង្វល់ខ្លាំងបំផុតនោះ គឺរដូវវស្សាជិតឈានចូលមកដល់ហើយ ដែលអាចប្រឈមនឹងការលំបាក ៕
ចែករំលែកព័តមាននេះ