រាជធានីភ្នំពេញ ៖ ក្នុងដំណើរចូលរួមរបស់សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រក្នុងវេទិកាផ្លូវ១ខ្សែក្រវ៉ាត់១ នៅសាធារណរដ្ឋប្រជាមានិតចិន ក្នុងរយៈពេលប៉ុន្មានថ្ងៃនេះ កម្ពុជាហាក់ទទួលបានផលផ្លែផ្កាច្រើន ក្នុងនោះមានគម្រោងវិនិយោគជាច្រើនបានចុះហត្ថលេខាជាមួយគ្នា និងគម្រោងអភិវឌ្ឍន៍ជាច្រើនទៀតផងដែរ ។
យោងតាមគេហទំព័រផ្លូវការសម្ដេចអគ្គ មហាសេនាបតីតេជោហ៊ុន សែននាយករដ្ឋមន្ត្រី ក្នុងដំណើរសម្ដេចតេជោនៅប្រទេសចិន កម្ពុជា បានចុះហត្ថលេខាលើកិច្ចព្រមព្រៀងសំខាន់ៗ ចំនួន៦ ជាមួយភាគីចិន ដូចជា៖ ១)- អនុស្សរណៈនៃការយោគយល់គ្នាពីគម្រោងគន្លឹះវង់ទី២ សម្រាប់កិច្ចសហប្រតិបត្តិការសមត្ថភាពផលិតនិងការវិនិយោគ, ២)- អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការ នៃការជួយគ្នាទៅវិញទៅមកក្នុងកិច្ចការ ។ ៣)- អនុស្សារណៈ នៃការយោគយល់គ្នា ស្តីពីកិច្ចសហប្រតិបត្តិការ ស្តីពីការនាំអង្ករកម្ពុជាចំនួន៤០ម៉ឺនតោន ចូលទីផ្សារចិន ។ ៤)- អនុស្សារណៈនៃការយោគយល់គ្នា ស្តីពីសហប្រតិបត្តិការក្រោមយុទ្ធសាស្ត្រចតុកោណ និងគំនិតផ្តួចផ្តើមខ្សែក្រវាត់ និងផ្លូវ ។ ៥)- ផែនការសកម្មភាព ស្តីពីការបង្កើតសហគមន៍វាសនារួម កម្ពុជាចិន ចុះ និង ៦ កិច្ចព្រមព្រៀង ស្តីពីកិច្ចសហ ប្រតិបត្តិការសេដ្ឋកិច្ច និងបច្ចេកទេស ជាហិរញ្ញប្បទានឥតសំណង ។
នៅក្នុងដំណើរទស្សនកិច្ចសម្ដេចតេជោ សម្ដេចក៏បានជួបជាមួយបណ្ដាវិនិយោគិននានានៅក្នុងប្រទេសចិន ដើម្បីជួបពិភាក្សានិងបង្ហាញពីសក្ដានុពលវិនិយោគនៅក្នុងប្រទេសកម្តុជាទៅកាន់វិនិយោគិនចិនទាំងនោះ ក្នុងនោះដែរសម្ដេចក៏បានជំរុញអោយវិនិយោគិនបណ្ដាក់ទុនវិនិយោគលើវិស័យថាមពលអគ្គិសនីបន្ថែមទៀត ខណៈបច្ចុប្បន្នកម្ពុជាកំពុងទទួលរងនូវកង្វះខាតថាមពលអគ្គិសនីសម្រាប់ប្រើប្រាស់ ។ ក្រៅពីនោះ កម្ពុជាក៏បានស្នើរអោយចិនបណ្ដាក់ទុនវិនិយោគលើវិស័យអាទិភាពនានាជាច្រើន ដែលកំពុងមានតម្រូវការខ្ពស់ ហើយជាការកត់សម្គាល់ តាមរយៈគេហទំព័រសម្ដេចតេជោ ភាគីចិនក៏ហាក់ដូចជាចាប់អារម្មណ៍លើការវិនិយោគនានានៅក្នុងប្រទេសកម្ពុជាផងដែរ ។
ដោយឡែកនៅក្នុងថ្ងៃទី២៩ មេសា ២០១៩នេះដែរ ក្នុងជំនួបរវាងសម្ដេចតេជោ និងលោកស៊ីជិនពីង ប្រធានាធិបតីចិន ប្រទេសចិនក៏សម្រេចជួយកម្ពុជានូវទឹកប្រាក់៦០០លានយន់ប្រាក់ចិន រឺប្រមាណ៩០លានដុល្លារអាមេរិក ក្នុងវិស័យការពារជាតិ ដែលនេះជាជំនួយឥតសំណងរបស់មហាមិត្តចិន ជួយដល់កម្ពុជា ។
យោងតាមគេហទំព័រសង្គមរបស់ស្ថានទូតចិនប្រចាំកម្ពុជា បានបង្ហោះសារបង្ហាញឲ្យសាធារណជនបានដឹងថា កម្ពុជាជាប្រទេសដ៏សំខាន់ដែលរដ្ឋាភិបាលចិនយកចិត្តទុកដាក់ខ្ពស់លើការផ្សាភ្ជាប់គំនិតផ្តួចផ្តើម «ខ្សែក្រវាត់ និងផ្លូវ» ។ ក្នុងនោះដែរ ចិនជាប្រភពទុនវិនិយោគធំបំផុតនិងជាដៃគូរពាណិជ្ជកម្មធំទី១ របស់ប្រទេសកម្ពុជា ។ ភាគិចិនសាងសង់ផ្លូវបានវែងជាងគេ និងស្ពានបានច្រើនជាងគេនៅកម្ពុជា ហើយបានតភ្ជាប់ខ្សែកាបអុបទិចវែងបំផុតទៀតផង ។ នៅដើមឆ្នាំ ២០១៩នេះភាគីទាំងពីរ បានកំណត់គោលដៅដើម្បីសម្រេចឲ្យបានទំហំពាណិជ្ជកម្មទ្វេភាគីកើនឡើងដល់ចំនួន ១០ពាន់លានដុល្លារសហរដ្ឋអាមេរិក ក្នុងឆ្នាំ២០២៣ ហើយប្រទេសទាំងពីរនឹងចាប់ផ្តើមសិក្សាពីកិច្ចព្រមព្រៀងពាណិជ្ជកម្មសេរី ក្នុងឱកាសសមស្របណាមួយ។ តាមរយៈការជំរុញជាបន្តបន្ទាប់នៃការកសាងយុទ្ធសាស្ត្រ «ខ្សែក្រវាត់ និងផ្លូវ» ការបំពេញគុណសម្បត្តិទៅវិញទៅមករវាងសេដ្ឋកិច្ចចិន និងកម្ពុជានឹងបញ្ចេញសមត្ថភាពផ្ទាល់ខ្លួនបានយ៉ាងពេញលេញ ហើយកិច្ចសហប្រតិបត្តិការធុរកិច្ចរវាងចិន និងកម្ពុជានឹងឈានចូលដល់សម័យកាលអភិវឌ្ឍន៍ដ៏វិសេសវិសាលយ៉ាងឆាប់រហ័ស និងគ្រប់ជ្រុងជ្រោយ ដែលនឹងនាំមកនូវសមិទ្ធផលជាផ្លែផ្កា។
ប្រភពដដែលបានបញ្ជាក់ថា ការប្រាស្រ័យទាក់ទងមនុស្សសាស្ត្រយ៉ាងទូលំទូលាយជំរុញដល់ការផ្សាភ្ជាប់មនោសញ្ចេតនារវាងប្រជាជននិងប្រជាជន។ មិត្តភាពចិន និងកម្ពុជា ជានិច្ចកាលចាក់ឬសក្នុងបេះដូងរបស់ប្រជាជនប្រទេសទាំងពីរ។ ប៉ុន្មានឆ្នាំកន្លងមកនេះ ទំនាក់ទំនងមនុស្សសាស្ត្រប្រទេសទាំងពីរមានការអភិវឌ្ឍន៍ខ្ពស់ក្លាយទៅជាកម្លាំងជំរុញសំខាន់ក្នុងការអភិវឌ្ឍន៍លើគ្រប់ជ្រុងជ្រោយ។ កាលពីឆ្នាំ២០១៨ភ្ញៀវទេសចរចិន មកទស្សនាប្រទេសកម្ពុជាមានចំនួនលើសពី២លាននាក់ហើយ រីឯភ្ញៀវទេសចរកម្ពុជាដែលទៅទស្សនាប្រទេសចិនមានចំនួនលើសពី ១សែននាក់ កំណើនជាមធ្យមលើសពី៦០%។ ប្រទេសចិនបានក្លាយជាប្រភពភ្ញៀវទេសចរធំជាងគេសម្រាប់កម្ពុជា។ ចំនួនជើងហោះហើររវាងចិន និងកម្ពុជាមានប្រមាណ ៣៩៨លើកក្នុងមួយសប្តាហ៍។
គួរបញ្ជាក់ថា រហូតមកដល់ពេលនេះ ទំហំពាណិជ្ជកម្មរវាងកម្ពុជានឹងចិន បានកើនឡើងដល់ ជាង៥ពាន់លានដុល្លារអាមេរិក ក្នុងនោះកម្ពុជានាំចេញជិត១ពាន់លានដុល្លារអាមេរិក និងនាំចូលប្រទេសចិនមកវិញជាង៤ពាន់លានដុល្លារអាមេរិក ។ ហើយបើតាមមន្ត្រីជាន់ខ្ពស់នៃរាជរដ្ឋាភិបាលកម្ពុជា ក្នុងរយៈពេល៥ឆ្នាំចុងក្រោយ ពីឆ្នាំ ២០១៣ ដល់ឆ្នាំ ២០១៨ កម្ពុជាទទួលបានទុនវិនិយោគផ្ទាល់ពីប្រទេសចិន ប្រមាណ២១ពាន់លានដុល្លារអាមេរិកដែលធ្វើអោយចិនក្លាយជាវិនិយោគិនឈរលំដាប់កំពូលនៅក្នុងប្រទេសកម្ពុជា ៕
ចែករំលែកព័តមាននេះ