រាជធានីភ្នំពេញ ៖ បើទោះបីជាវិស័យកាត់សម្លៀកបំពាក់ និងស្បែកជើងកម្ពុជា បច្ចុប្បន្នស្ថិតក្នុងភាពអាចមិនច្បាស់លាស់ ឬប្រឈមនឹងការបាត់បង់នូវភាពអនុគ្រោះពន្ធពីសហគមន៍អឺរ៉ុប «អ្វីៗគ្រប់យ៉ាងលើកលែងតែអាវុធ» (EBA) យ៉ាងណាក្តី តែវិស័យមួយនេះនៅតែទទួលបានចាប់អារម្មណ៍ពីវិនិយោគិនបរទេស…
រាជធានីភ្នំពេញ ៖ បើទោះបីជាវិស័យកាត់សម្លៀកបំពាក់ និងស្បែកជើងកម្ពុជា បច្ចុប្បន្នស្ថិតក្នុងភាពអាចមិនច្បាស់លាស់ ឬប្រឈមនឹងការបាត់បង់នូវភាពអនុគ្រោះពន្ធពីសហគមន៍អឺរ៉ុប «អ្វីៗគ្រប់យ៉ាងលើកលែងតែអាវុធ» (EBA) យ៉ាងណាក្តី តែវិស័យមួយនេះនៅតែទទួលបានចាប់អារម្មណ៍ពីវិនិយោគិនបរទេស ហើយវិស័យនេះទៀតសោតនៅត្រូវបានរំពឹងថា នៅឆ្នាំនេះនិងឆ្នាំបន្ទាប់ៗ នឹងមានរោងចក្រផលិតកាបូប និងស្បែកជើង មិនក្រោម១០រោងចក្រនោះទេ នឹងមកបើកដំណើរការបន្ថែមនៅកម្ពុជា។
ប្រធានសមាគមរោងចក្រកាត់ដេរនៅកម្ពុជា ថ្មីៗនេះប្រាប់អ្នកសារព័ត៌មានថាបើតាមទិន្នន័យ ប.ស.ស បង្ហាញថាកម្មករកម្មការិនីកំពុងបម្រើការនៅក្នុងវិស័យកាត់ដេរសម្លៀកបំពាក់ ស្បែកជើង និងកាបូប គឺមានប្រមាណ៩០ម៉ឺននាក់ ហើយចំនួននេះនឹងបន្តកើនឡើងបន្ថែមទៀតនៅគ្រាបន្ទាប់ ព្រោះសព្វថ្ងៃនេះរោងចក្រផលិតកាបូបមានការរីកចម្រើនខ្លាំងគួរឲ្យកត់សម្គាល់ ។ លោកឧកញ៉ា វ៉ាន់ សូអៀង ប្រធានសមាគមរោងចក្រកាត់ដេរនៅកម្ពុជា មានប្រសាសន៍ឲ្យដឹងថា «ការនាំចេញកាបូបមានទឹកប្រាក់សរុបប្រមាណ៥៥០លានដុល្លារអាមេរិកកាលពីឆ្នាំមុន ហើយខ្ញុំជឿថានឹងមានរោងចក្រផលិតស្បែកជើងនិងកាបូបនឹងចូលមកកម្ពុជាប្រហែល១០រោងចក្របន្ថែមទៀតនៅក្នុងរយៈពេលពីរឆ្នាំហ្នឹង » ។
លោកឧកញ៉ា បានឲ្យដឹងបន្តទៀតថា «ហេតុអ្វីបានជាខ្ញុំថាអីចឹង0x017d7 ព្រោះវិស័យកាត់ដេរយើងជាវិស័យមួយមានស្ថិរភាពយូរអង្វែង ហើយវិស័យមួយនេះត្រូវបានប្រមុខរាជរដ្ឋាភិបាលកម្ពុជាជួយគាំំទ្រ និងបានយល់ច្បាស់ពីវិស័យមួយនេះខ្លាំងណាស់ ថែមទាំងបានប្រាប់ទៅកម្មករឱ្យទុកចិត្តនិងខិតខំធ្វើការបង្កើនផលិតភាពការងារ»។
ចំណែកលោក ខេន លូ អគ្គលេខាធិកានៃសមាគមរោងចក្រកាត់ដេរនៅកម្ពុជា ក៏បានប្រាប់ឱ្យដឹងកាលពីថ្ងៃទី២៩ ខែមេសា ម្សិលមិញនេះថា «កាលពីឆ្នាំ២០១៨ ការនាំចេញផលិតផលកាបូបមានទឹកប្រាក់ប្រមាណ៥៥០លានដុល្លារអាមេរិក ហើយមកដល់សព្វថ្ងៃ កម្ពុជាមានរោងចក្រផលិតស្បែកជើងមានប្រមាណ៦១រោងចក្រ និង រោងចក្រផលិតកាបូបមានប្រមាណ៧០រោងចក្រ។ សម្រាប់ផលិតផលកាបូបនាំចេញប្រមាណ៦០% ទៅកាន់ទីផ្សារអឺរ៉ុប គិតជាទឹកប្រាក់មានប្រមាណ៣៣០លានដុល្លារអាមេរិក»។
ទន្ទឹមនឹងការនាំចេញផលិតផលស្បែកជើងនិងកាបូបកំពុងរីកចម្រើន គេសង្កេតឃើញថាជារួម វិស័យមួយនេះស្ថិតក្នុងការប្រឈមបាត់បង់នូវប្រព័ន្ធអនុគ្រោះពន្ធពីសហគមន៍អឺរ៉ុប«អ្វីៗគ្រប់យ៉ាងលើកលែងតែអាវុធ» (EBA)។
ប្រធានសមាគមរោងចក្រកាត់ដេរនៅកម្ពុជា លោកឧកញ៉ា វ៉ាន់ សូអៀង មានប្រសាសន៍ថា «បញ្ហារឿង EBA វាជាបញ្ហាប្រឈមមួយ តែខ្ញុំជឿថា ផ្នែកមួយនៅក្នុងរោងចក្រស្បែកជើងបានសហការជាមួយ ILO ខ្លាំងណាស់។ រោងចក្រនីមួយៗ អនុញ្ញាតឱ្យ ILO ត្រួតពិនិត្យរកឃើញថាមានរោងចក្ររហូតដល់ប្រមាណ៨០% គោរពនិងអនុវត្តបានតាមច្បាប់ការងារ។ ផ្អែកលើចំណុចនេះសហភាពអឺរ៉ុបគួរ ធ្វើការពិនិត្យឡើងវិញឱ្យច្បាស់ ព្រោះរឿងនេះវាធ្វើឱ្យប៉ះពាល់ដល់កម្មករ»។ លោកឧកញ៉ា បញ្ជាក់ថា «រឿង EBA វាបានជួយកម្មករបានច្រើន ហើយខ្ញុំសង្ឃឹមថាគេនឹងពិចារណាឡើងវិញ និងមិនដកប្រព័ន្ធអនុគ្រោះពន្ធពីកម្ពុជានោះទេ»។
លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈថ្លែងក្នុងសន្និបាតប្រចាំឆ្នាំ២០១៩ របស់សមាគមរោងចក្រកាត់ដេរនៅកម្ពុជាថ្មីៗនេះថា ផ្តើមចេញពីគោលនយោបាយពាណិជ្ជកម្មផ្សាភ្ជាប់នឹងបទដ្ឋានការងារអន្តរជាតិ ដែលរាជរដ្ឋាភិបាលបាននឹងកំពុងអនុវត្តចាប់ពីឆ្នាំ១៩៩៩ បានធ្វើឱ្យឧស្សាហកម្មកាត់ដេរសំលៀកបំពាក់ និងផលិតស្បែកជើងនៅកម្ពុជាបន្តរីកចម្រើនគួរជាទីមោទនៈ ចាប់ផ្តើមពីរោងចក្រប្រមាណជាង៦០រោងចក្រ ជាមួយនឹងកម្មករនិយោជិកប្រមាណ ៨ម៉ឺននាក់ រហូតមកដល់ពេលនេះ រោងចក្រកើនឡើងដល់ប្រមាណ ១២០០រោងចក្រ ជាមួយនិងកម្មករនិយោជិតប្រមាណជាង ៨៤ម៉ឺននាក់។ វិស័យកាត់ដេរ គឺជាវិស័យមួយដែលបានដើរតួនាទីយ៉ាងសំខាន់ ក្នុងការជំរុញកំណើនសេដ្ឋកិច្ចនៅកម្ពុជា និងបានផ្តល់ឱកាសការងារជូនប្រជាពលរដ្ឋ។
លោករដ្ឋមន្ត្រីសង្កត់ធ្ងន់ថា ស្ថិតក្នុងបរិ បទវិស័យនេះកាន់តែប្រឈមខ្លាំងទៅនឹងលទ្ធភាពប្រកួតប្រជែងជាមួយប្រទេសនាំចេញនានា យើងបានធ្វើការយ៉ាងជិតស្និតជាមួយគ្នា ស្វែងរកដំណោះស្រាយរួមគ្នា ដើម្បីធានាថា វិស័យនេះនៅតែអាចបន្តធានាបាននូវឧត្តមភាពប្រកួតប្រជែង សមាជិកទាំងអស់របស់GMACអាចរក្សាបានដំណើរផលិតកម្មអាជីវកម្មរបស់ខ្លួន ប្រកបដោយចីរភាព។ សម្តេចតេជោនាយករដ្ឋមន្ត្រី បានដាក់ចេញនូវវិធានការកែទម្រង់មុតស្រួចជាកញ្ចប់ សំដៅពង្រឹងភាពប្រកួតប្រជែង និងជំរុញធ្វើពិពិធកម្មសេដ្ឋកិច្ចលើប្រធានបទចំនួន១៥។
លោករដ្ឋមន្ត្រី បន្តថា «ប៉ុន្តែខ្ញុំសូមលើកតែចំណុចខ្លះៗ ដែលពាក់ព័ន្ធនឹងវិស័យការងារ និងបណ្តុះបណ្តាលវិជ្ជាជីវៈ ៖១-) ការកាត់បន្ថយថ្ងៃឈប់សម្រាកបុណ្យ និងទិវា។ ២-)ការពិនិត្យ និងរៀបចំជាបញ្ជីស្ថាប័ន និងពេលវេលាចុះពិនិត្យនៅតាមរោងចក្រ។ ៣-)ការកំណត់អាត្រាភាគទាននៃរបបសោធន។៤-)ការកំណត់នូវពេលវេលា និងចំនួនថ្ងៃបើកប្រាក់បំណាច់អតីតភាព ការងារ។៥-)ការកែសម្រួលច្បាប់ស្តីពីការងារ។៦-)ប្រាក់ឈ្នួលអប្បបរមានៅក្នុងវិស័យកាត់ដេរនិង៧-)បញ្ហាផ្សេងៗ ក្រសួងការងារ និងបណ្តុះបណ្តាលវិជ្ជាជីវៈ ត្រូវបន្ត ខិតខំធានានូវការអនុវត្តច្បាប់ និងលិខិតបទដ្ឋានពាក់ព័ន្ធឱ្យបានម៉ឹងម៉ាត់ និងមានប្រសិទ្ធភាព ដើម្បីកាត់បន្ថយការធ្វើកូដកម្ម បាតុកម្មខុសច្បាប់។ ក្រុមការងារផែ្នកអប់រំ និងក្រសួងការងារ និងបណ្តុះបណ្តាលវិជ្ជាជីវៈ ត្រូវយកសំណូមពរដោះស្រាយបញ្ហាខ្វះបុគ្គលិកជំនាញ ដើម្បីផ្គត់ផ្គង់ទីផ្សារការងារ ទៅពិភាក្សា និងលើកអនុសាសន៍ដោះស្រាយ» ។
សូមរម្លឹកថាសហភាពអឺរ៉ុបធ្លាប់បានសេចក្តីប្រកាសព័ត៌មានកាលពីថ្ងៃទី១១ ខែកុម្ភៈ កន្លងទៅដោយបានបញ្ជាក់ថា បើទោះបីនីតិវិធីព្យួរការអនុគ្រោះពន្ធអ្វីៗ ទាំងអស់លើកលែងតែសព្វាវុធ ឬហៅកាត់ថា (EBA) ពីកម្ពុជានេះ មិនមែនបានន័យថា សហភាពអឺរ៉ុប នឹងដកការអនុគ្រោះពន្ធនេះភ្លាមៗនោះទេ ។ ព្រមជាមួយគ្នានោះផងដែរ សហរដ្ឋអាមេរិកធ្លាប់គម្រាមថាប្រទេសខ្លួនអាចនឹងអនុវត្តនីតិវិធីដូចសហភាពអ៊ឺរ៉ុប ដែរ ។ ជាក់ស្តែងកាល ពីថ្ងៃពុធ ទី០៩ ខែមករា ឆ្នាំ២០១៩ សមាជិកព្រឹទ្ធសភាអាមេរិក ចំនួនពីររូប បានដាក់សំណើរច្បាប់ថ្មីមួយ ដោយតម្រូវឲ្យរដ្ឋបាលរបស់លោកប្រធានាធិបតី ដូណាល់ ត្រាំ លុបចោលនូវការអនុគ្រោះពន្ធអាមេរិក ឬហៅកាត់ GSP ចេញពីកម្ពុជាដូចគ្នា ។ ក្រោមកម្មវិធី GSP កម្ពុជាអាចនាំទំនិញចូលទីផ្សាររបស់សហរដ្ឋអាមេរិកបានចំនួនប្រមាណជាង ៤០០លានដុល្លារនៅឆ្នាំ២០១៧ ដោយមិនបង់ពន្ធគយនោះទេ ។
កម្ពុជាបានការអនុគ្រោះពន្ធទូទៅផ្នែកពាណិជ្ជកម្ម ពីសហរដ្ឋអាមេរិកដើម្បីនាំផលិតផលជាច្រើនមុខ ទៅលក់នៅផ្សារអាមេរិក ដោយបង់ពន្ធតិចតួច ឬមិនចាំបាច់បង់ពន្ធសោះ ។ កម្ពុជាចាប់ផ្ដើមទទួលបានការអនុគ្រោះពន្ធ GSP នៅឆ្នាំ ១៩៩៧។ តាមរយៈការអនុគ្រោះនេះ ក្នុងមួយឆ្នាំៗ កម្ពុជានាំចេញទំនិញទៅទីផ្សារសហរដ្ឋអាមេរិក គិតជាទឹកប្រាក់ជាង ១៨០លានដុល្លារ។ កាលពីខែមេសា ឆ្នាំ២០១៨ សហរដ្ឋអាមេរិក បន្តផ្ដល់ការអនុគ្រោះពន្ធនេះ ដល់កម្ពុជា រហូតដល់ឆ្នាំ ២០២០ ៕
ចែករំលែកព័តមាននេះ