រាជធានីភ្នំពេញ ៖ ប្រធានបទស្តីអំពី «គ្រប់មុខទំនិញលើកលែងសព្វាវុធ » (EBA) ដែលជាប្រព័ន្ធអនុគ្រោះពន្ធផ្ដល់ជូនកម្ពុជា ពីសំណាក់សហភាពអឺរ៉ុប ក្នុងការនាំទំនិញពីកម្ពុជា ដោយមិនគិតពន្ធ នៅតែជាប្រធានក្ដៅ ដោយមានមតិខ្លះបង្ហាញពីការព្រួយបារម្ភ និងខ្លះទៀតហាក់មិនមានការភ័យព្រួយនោះទេ ។ ជាក់ស្ដែងរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អុិត សំហេង បានលើកឡើងថា បើទោះបីជាកម្ពុជា «មានឬគ្មាន EBA រោងចក្រនៅកម្ពុជានឹងនៅតែដំណើរការផ្ដល់ការងារជូនកម្មករនិយោជិតដដែល» ខណៈ សមាគមរោងចក្រកាត់ដេរសម្លៀកបំពាក់ និងស្បែកជើង (GMAC) ស្នើភាគីអឺរ៉ុបពិចារណាអោយបានច្បាស់មុនសម្រេចដកពីកម្ពុជានោះ ។
នៅក្នុងពិធីបូកសរុបការងាររបស់សមាគមរោងចក្រកាត់ដេរនិងសម្លៀកបំពាក់ កាលពីថ្ងៃទី២៧ មេសា កន្លងទៅនេះ លោក អុិត សំហេង បានមានប្រសាសន៍ថា វិស័យកាត់ដេរបានចាប់ផ្ដើមដំបូងនៅឆ្នាំ ១៩៩៨ ដោយដំបូងឡើយ កម្មករ-វិនិយោជិតបានប្រាក់ឈ្មួលតែប្រមាណ ៣០ដុល្លារ ឬ៣៥ដុល្លារអាមេរិកប៉ុណ្ណោះ ។ តែក្រោយមកក៏មានការចរចារដំឡើងជាបន្តបន្ទាប់រហូតមកដល់បច្ចុប្បន្ននេះ កម្មករ និយោជិតទទួលបានប្រាក់ឈ្មួលទាបបំផុត១៨២ដុល្លារអមេរិកក្នុងមួយខែ ។
លោករដ្ឋមន្ត្រីក្រសួងការងារ បានបន្តថា ទន្ទឹមនឹងនោះដែរ បច្ចុប្បន្ននេះ វិស័យកាត់ដេរសម្លៀកបំពាក់ក៏កំពុងប្រឈមនឹងបញ្ហាការដកប្រព័ន្ធអនុគ្រោះពន្ធ EBA ពីសហភាពអឺរ៉ុបផងដែរ ។ ប៉ុន្តែរដ្ឋាភិបាលនិងវិស័យឯកជន ដែលមានសមាគមរោងចក្រកាត់ដេរសម្លៀកបំពាក់និងស្បែកជើងក៏កំពុងជួបចរចារជាមួយសហភាពអឺរ៉ុបផងដែរធ្វើយ៉ាងណា ដើម្បីរក្សាទំនាក់ទំនងល្អជាមួយដៃគូរពាណិជ្ជកម្មនៅអឺរ៉ុប ។
លោក អុិត សំហេង ថ្លែងបញ្ជាក់ថា « នៅថ្ងៃខាងមុខ បើទោះជាមាន ឬគ្មាន EBA ក៏យើងត្រូវបន្តធ្វើទំនាក់ទំនងល្អជាមួយបណ្ដាដៃគូរពាណិជ្ជកម្មរបស់យើងដូចជា អ្នកបញ្ជាទិញផលិតផលរបស់យើង ដើម្បីអោយដំណើរការរោងចក្រនៅកម្ពុជានៅតែបន្តនិងផ្ដល់ការងារដល់ពលរដ្ឋក្នុងស្រុកជាច្រើននាក់ » ។ លោកបន្ថែមថា រដ្ឋាភិបាលក៏បានគិតគូររួចហើយពីការទប់ស្កាត់ហានិភ័យដែលកើតមានក្រោយពេលអត់ EBA ក្នុងនោះរដ្ឋាភិបាលក៏បានលុបបំបាត់នូវស្ថាប័នត្រួតពិនិត្យមួយចំនួន ដូចជាកាំកុងត្រូល ស្ថាប័នកាំសាប ជាដើម ដើម្បីសម្រួលដល់ការដឹកទំនិញចេញរបស់វិនិយោគិន ដែលក្នុងន័យនេះ គឺដើម្បីកាត់បន្ថយការចំណាយនានា ដែលអាចធ្វើថ្លៃដើមកាន់តែតិចៗទៅ ។
លោកឧកញ៉ា វ៉ាន់ សូអៀង ប្រធានសមាគមរោងចក្រកាត់ដេរសម្លៀកបំពាក់ និងស្បែកជើង ដែលទើបជាប់ឆ្នោតជាប្រធានបន្តក្នុងអាណត្តិថ្មីបានមានប្រសាសន៍ថា EBA គឺជាការប្រកួតប្រជែងក្នុងការធ្វើពាណិជ្ជកម្មរវាងកម្ពុជា និងប្រទេសក្នុងតំបន់ ហើយលោកសង្ឃឹមថា EBA នឹងមិនបាត់ពីកម្ពុជានៅពេលឆាប់ៗនេះទេ ពី ព្រោះវិស័យរោងចក្រកាត់ដេរកម្ពុជា បានសហការយ៉ាងស្អិតជាមួយអង្គការពលកម្មពិភពលោក ( ILO ) ដោយគ្រប់រោងចក្រទាំងអស់ត្រូវឆ្លងកាត់ការត្រួតពិនិត្យរបស់ក្រុមការងារ ILO អោយប្រាកដថាគ្របរោងចក្រទាំងអស់មិនមានការរំលោភច្បាប់ការងារនោះឡើយ ។
លោកឧកញ៉ា វ៉ាន់ សូអៀង បន្តថា « នៅលើពិភពលោកនេះ អត់មានប្រទេសណាមួយ អនុញ្ញាតអោយអង្គការពលកម្មពិភពលោកមកត្រួតពិនិត្យ គ្រប់រោងចក្រទាំងអស់នោះទេ អញ្ចឹងកម្ពុជា គឺជាប្រទេសដែលអនុវត្តបានល្អឥតខ្ចោះតាមអ្វីដែលអឺរ៉ុបចង់បាន » ។ លោកបន្តថា លោកចង់អោយភាគីអឺរ៉ុបពិចារណាអោយបានច្បាស់មុនសម្រេចដកប្រព័ន្ធអនុគ្រោះពន្ធ EBA ពីកម្ពុជា ពីព្រោះនៅពេលដែលដកប្រព័ន្ធអនុគ្រោះពន្ធនេះចេញពីកម្ពុជា វាប៉ះពាល់ខ្លាំងមែនទែនដល់វិស័យកាត់ដេរកម្ពុជា ។
លោកបន្ថែមទៀតថា « ប្រព័ន្ធអនុគោះពន្ធដែលអឺរ៉ុបបានផ្ដល់ដល់កម្ពុជាកន្លងមក វាបានជួយដល់កម្មករនិងប្រជាពលរដ្ឋកម្ពុជាជាច្រើន ដោយសព្វថ្ងៃនេះមានកម្មករប្រមាណជិត១លាននាក់កំពុងបម្រើការនៅក្នុងវិស័យកាត់ដេរ និងត្រូវចំណាយប្រាក់ប្រមាន២,៨ពាន់លានដុល្លារក្នុងមួយឆ្នាំ សម្រាប់បើកជូនកម្មករនិយោជិតក្នុងវិស័យមួយនេះ »។ លោកបន្តថា តាមរយៈការផ្ដល់ប្រព័ន្ធអនុគ្រោះនេះផងដែរ ក៏បានធ្វើអោយកម្ពុជាផ្លាស់ប្តូរពីប្រទេសចំណូលទាប ទៅជាប្រទេសដែលមានប្រាក់ចំណូលមធ្យមកម្រិតទាប ដែលធ្វើអោយប្រាក់ចំណូលរបស់ប្រជាពលរដ្ឋកម្ពុជាក្នុងម្នាក់ៗ កើនឡើងដល់ជិត១៦០០ដុល្លារអាមេរិក ។
ពាក់ព័ន្ធជាមួយប្រធានបទ EBA នេះដែរ ក្នុងដំណើរទស្សនកិច្ចជាផ្លូវការរបស់សម្ដេចតេជោហ៊ុន សែននាយករដ្ឋមន្ត្រី សម្រាប់ការចូលរួម «វេទិកាខ្សែក្រវាត់ និងផ្លូវលើកទី២ សម្រាប់កិច្ចសហប្រតិបត្តិការអន្តរជាតិ» នៅទីក្រុងប៉េកាំង ប្រទេសចិន នោះ មន្ត្រីជាន់ខ្ពស់បក្សកុម្មុយនីស្តចិន បានសន្យាថានឹងជួយជ្រោមជ្រែងកម្ពុជា បើទោះបីជាអឺរ៉ុបដក EBA ក្ដី ដោយភាគចិនថាខ្លួននឹងរកវិធីជួយកម្ពុជា ក្នុងពេលអឺរ៉ុបដកយកប្រព័ន្ធអនុគ្រោះពន្ធ EBA ពីកម្ពុជាវិញនោះ ៕
ចែករំលែកព័តមាននេះ