រាជធានីភ្នំពេញ ៖ ថ្មីៗនេះប្រជាពលរដ្ឋមួយចំនួនបានបង្ហាញការចាប់អារម្មណ៍និង សម្តែងការព្រួយបារម្ភ ទៅលើបញ្ហាថាកម្ពុជានឹងអនុញ្ញាតឱ្យមានការប្រើប្រាស់ប្រាក់យ័ន ដែលជារូបិយប័ណ្ណរបស់ប្រទេសចិន នៅលើទីផ្សារដូចទៅ និងប្រាក់ដុល្លារដែរ បន្ទាប់ពីសមាគមនចិនមួយបានស្នើសុំប្រមុខដឹកនាំកម្ពុជាជួយសម្រួលឲ្យមានការចរាចរណ៍ប្រាក់យ័នចិន នៅកម្ពុជា ។
យ៉ាងណាមិញ ការលើកឡើងនេះត្រូវបានថ្នាក់ដឹកនាំរបស់ធនាគារជាតិនៃកម្ពុជា ឬហៅកាត់ថា (NBC) បញ្ជាក់ជំហររបស់ខ្លួនថា ធនាគារជាតិនៃកម្ពុជាមិនបានអនុញ្ញាត ឬគាំំទ្រឱ្យមានការប្រើប្រាស់ប្រាក់យ័នជាសាធារណៈដូចទៅនឹងប្រាក់ដុល្លារអាមេរិកនោះទេ ។ ពោលគឺមានការអនុញ្ញាតឱ្យធ្វើការទូទាត់រូបិយប័ណ្ណយ័នរបស់ចិន តែនៅក្នុងប្រព័ន្ធធនាគារតែប៉ុណ្ណោះ ខណៈគោលជំហរធំរបស់ធនាគារបន្តជំរុញការប្រើប្រាស់រៀលខ្មែរ ដើម្បីកាត់បន្ថយការប្រើប្រាស់រូបិយប័ណ្ណបរទេស។
លោកបណ្ឌិត ឃូ វុឍ្ឍី តំណាងឱ្យលោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជា បានក្រុមអ្នកសារព័ត៌មានកាលពីថ្ងៃទី ២៨ ខែមេសា ម្សិលមិញនេះថា មកដល់បច្ចុប្បន្ននេះ មានធនាគារចំនួន ១៥ មានប្រតិបត្តិការជាប្រាក់យ័ន និងមានធនាគារចំនួន១២ផ្សេងទៀត មានបំណងចង់ធ្វើប្រតិបត្តិការប្រាក់យ័ននៅថ្ងៃខាងមុខ ព្រោះធនាគារទាំងនោះមើលឃើញឱកាសនៃការទូទាត់ប្រាក់យ័ននឹងមានរីកចម្រើនទៅមុខ និងទាក់ទាញភ្ញៀវទេសចរណ៍ ក៏ដូចជាពាណិជ្ជកម្មពីចិន ។ លោកបណ្ឌិតឃូ វុឍ្ឍី មានប្រសាសន៍បញ្ជាក់យ៉ាងដូច្នេះថា «បច្ចុប្បន្នមានធនាគារដែលមានសិទ្ធ ប្រមូល ផ្គត់ផ្គង់និងចែកចាយប្រាក់យ័នទៅដល់គ្រឹះស្ថានធនាគារនិងហិរញ្ញវត្ថុ មាន ធនាគារឧស្សាហកម្មនិងពាណិជ្ជកម្មចិន (ICBC) និង ធនាគារចិន (Bank of China) និងមានការអនុញ្ញាតធ្វើឱ្យទូទាត់តាមរយៈ We Chat, Alipay និង Union Pay តែប៉ុណ្ណោះ មិនអនុញ្ញាតឱ្យធ្វើចរាចរណ៍ប្រាក់យ័នជាសាធារណៈនោះទេ» ។
តាមតំណាងមន្ត្រីជាន់ខ្ពស់ធនាគារជាតិនៃកម្ពុជា ការទូទាត់ប្រាក់យ័ននៅក្នុងប្រព័ន្ធធនាគារមកដល់សព្វថ្ងៃ គឺនៅបរិមាណតិចតួចបំផុត គឺមានតែប្រមាណ១% ប៉ុណ្ណោះ ហើយការទូទាត់ពាណិជ្ជកម្មឆ្លងកាត់ព្រំដែនរវាងកម្ពុជានិងចិនគឺ មានតិចជាង៥% ក្រៅពីនោះការទូទាត់ធ្វើឡើងដោយប្រាក់ដុល្លារអាមេរិក។ លោកបណ្ឌិតលើកឡើងថា ការទូទាត់ប្រាក់យ័នតាមប្រព័ន្ធធនាគារ វាផ្តល់ញភាពងាយស្រួលក្នុងការគ្រប់គ្រងបានភ្លាមៗ, ជំរុញអ្នកប្រើប្រាស់កាន់តែច្រើនដោយពុំដឹងខ្លួន។ លោកបណ្ឌិត បន្ថែមថា «បើការប្រើប្រាស់ប្រាក់យ័ន ឬប្រាក់យ័នចូលមកកម្ពុជាកាន់តែច្រើនហើយ យើងចាប់ផ្តើមភ័យទៅគ្រាន់តែប្តូរមុខពីប្រាក់ដុល្លារអាមេរិក មកប្រាក់យ័ននេះ ។ សូមកុំភ័យ នៅពេលដែលប្រាក់យ័ននេះស្ថិតនៅក្រោមការគ្រប់គ្រងរបស់ធនាគារជាតិនៃកម្ពុជា លុយនេះចំនួនប៉ុន្មានក៏បានដែរ យើងយកលុយយ័នចូលទៅធនាគារជាតិ ហើយធនាគារជាតិយកលុយយ័ននេះទៅវិនិយោគលើឧបករណ៍ហិរញ្ញវត្ថុនៅប្រទេសចិនដើម្បីទទួលបានផលចំណេញ»។
ទន្ទឹមនឹងការបញ្ជាក់ជំហរមិនឱ្យធនាគារនិងប្រតិបត្តិករចរាចរណ៍ប្រាក់យ័នដូចទៅនឹងប្រាក់ដុល្លារអាមេរិក តាមលោកបណ្ឌិតថា ធនាគារជាតិនៃកម្ពុជានៅតែរក្សាគោលជំហររឹងមាំរបស់ខ្លួនជានិច្ចក្នុងការជំរុញនិងលើកកម្ពស់ការប្រើប្រាស់ប្រាក់រៀល ព្រោះអ្វីដែលធនាគារជាតិនៃកម្ពុជាបានធ្វើគឺមានការរីកចម្រើនគួរឱ្យកត់សម្គាល់។ តែទោះជាយ៉ាងណាទាមទារស្ថាប័នពាក់ព័ន្ធទាំងអស់ត្រូវតែចូលរួមជំរុញទាំងអស់គ្នាដើម្បីលើកកម្ពស់ប្រាក់រៀលខ្មែរ។
លោកស្រី ជា សិរិ ធ្លាប់មានប្រសាសន៍ថា « ការជំរុញការទូទាត់ជារូបវត្ថុជាតិជាមួយចិនក្នុងផ្នែកពាណិជ្ជកម្ម នេះវាមិនមែនមានន័យថាយើងជំរុញឱ្យគេ (ចិន) ដឹកក្រដាសលុយយ័នយកមកប្រើនៅក្នុងប្រទេសនោះទេ។ កិច្ចសហការនេះ ខាងធនាគារជាតិនៃកម្ពុជាក៏មិនមែនធ្វើជាមួយភាគចិនដែរ គឺនៅពេលបច្ចុប្បន្ននេះគឺមាននៅក្នុងតំបន់អាស៊ានគេចង់ជំរុញការទូទាត់លុយរូបិយវត្ថុជាតិរៀងៗខ្លួនជាមួយប្រទេសនៅក្នុងតំបន់ ដោយសារប្រទេសក្នុងតំបន់អាស៊ានមិនចង់ពឹងផ្នែកខ្លាំងតែទៅលើលុយដុល្លារ អឺរ៉ូ ឬលុយផោននោះទេ»។
សូមរម្លឹកថា លោក ឈិន យន់ ប្រធានសមាគមទំនាក់ទំនងអន្តរជាតិចិន នាឱកាសត្រូវបានអនុញ្ញាតិជូបជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅវិមានសន្តិភាពកាលពីថ្ងៃទី២៤ ខែមេសា កន្លងទៅនោះ បានស្នើសម្តេចតេជោនាយករដ្ឋមន្ត្រី «ដើម្បី ជួយសម្រួលអោយមានចរាចរណ៍ប្រើប្រាស់រូបិយប័ណ្ណចិននៅក្នុងទីផ្សាររបស់កម្ពុជាផងដែរ ដែលនឹងកាន់តែទាក់ទាញវិនិយោគគិនជាច្រើនទៀតមកកម្ពុជា និងពីប្រទេសដទៃៗទៀត» ។ នាឱកាសនោះ លោក យន់ បានបញ្ជាក់ថា លោកនឹងជំរុញអោយក្រុមហ៊ុនចិនជាច្រើនទៀតមកវិនិយោគនៅកម្ពុជា ដើម្បីជំរុញកំណើនសេដ្ឋកិច្ចជាតិអោយកាន់តែរឹងមាំខ្លាំងក្លា។
សូមបញ្ជាក់ថានៅក្នុងដំណើរចូលរួម «វេ ទិកាលើកទី២ ស្តីពី «ខ្សែក្រវាត់មួយ និងផ្លូវមួយ សម្រាប់កិច្ចសហប្រតិបត្តិការអន្តរជាតិ» កាលពីថ្ងៃទី ២៦ ខែមេសា នេះ លោក ថោង ខុន រដ្ឋមន្ត្រីក្រសួងទេសចរណ៍កម្ពុជា បានចុះអនុស្សរណៈនៃការយោគយល់គ្នាជាមួយលោក LIN JINGZHEN អនុប្រធានប្រតិបត្តិរបស់ធនាគារចិន (Bank of China) លើកិច្ចសហប្រតិបត្តិការទេសចរណ៍ ឆ្នាំ២០១៩-២០២១ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក LIU LIANGE ដែលជាប្រធានធនាគារចិនផងដែរ ។
នៅក្នុងការចុះ MoU ជាមួយភាគីចិននេះ គឺមាន៥ចំណុចសំខាន់ៗ ដែលក្នុងនោះដែរក៏មានការជំរុញ និងលើកទឹកចិត្តឲ្យមានការប្រើប្រាស់រូបិយប័ណ្ណយ័នក្នុងវិស័យទេសចរណ៍នៅកម្ពុជាផងដែរ ជាពិសេសអនុស្សរណៈនៃការយោគយល់គ្នានេះ គឺឆ្លើយតបនឹងសកម្មភាពនៃការជំរុញកិច្ចសហប្រតិបត្តិការ និងអបអរឆ្នាំវប្បធម៌ទេសចរណ៍កម្ពុជា-ចិន ២០១៩ ដែលអត្ថន័យផ្តោតសំខាន់ទៅលើការងារ៖ ១)- ការបង្កើតផលិតផល ទីផ្សារ និងផ្សព្វផ្សាយ។
២)- ជួយសម្រួលការបង្កើតការបង់ប្រាក់តាមប្រព័ន្ធអនឡាញ ឬតាមប្រព័ន្ធឌីជិតថល ដូចជា Union Pay, WeChat Pay, AliPay ដើម្បីដាក់ឲ្យប្រើប្រាស់ដោយប្រតិបត្តិករទេសចរណ៍ ដូចជា សណ្ឋាគារ ភោជនីយដ្ឋាន ទីភ្នាក់ងារទេសចរណ៍ និងនៅតាមគោលដៅទេសចរណ៍ផ្សេងៗ ដើម្បីឲ្យស្របតាមតម្រូវការវិស័យទេសចរណ៍ក្នុងប្រទេសកម្ពុជា ជាពិសេសសម្រាប់ភ្ញៀវទេសចរចិន។ ៣)- ជំរុញការតភ្ជាប់ផ្លូវអាកាសទៅគោលដៅទេសចរណ៍សំខាន់ៗ។ ៤)- ការបណ្តុះបណ្តាលធនធានមនុស្ស និងការអភិវឌ្ឍសមត្ថភាពមន្ត្រីសាធារណៈ។ ៥)- ជំរុញ និងលើកទឹកចិត្តឲ្យមានការប្រើប្រាស់រូបិយប័ណ្ណយ័នក្នុងវិស័យទេសចរណ៍ និងសកម្មភាពផ្សេងៗទៀត ដើម្បីគាំទ្រ និងជំរុញដល់ការអភិវឌ្ឍវិស័យទេសចរណ៍នៅកម្ពុជា។ គួររលឹកថា ឆ្នាំ២០១៨ កម្ពុជាទទួលបានភ្ញៀវអន្តរជាតិប្រមាណ ៦.២លាននាក់ ក្នុងនោះមានភ្ញៀវទេសចរចិនជាង ២លាននាក់ផងដែរ ៕
ចែករំលែកព័តមាននេះ