ប្រទេសស៊ីរី ៖ ទោះបីបាត់បង់ដែនដីកាន់កាប់ក៏ក្រុមរដ្ឋអ៊ិស្លាមដែលប្រកាសទទួលខុសត្រូវ លើការការវាយប្រហារភេរវកម្មដ៏បង្ហូរឈាមនៅស្រីលង្កាកាលពីថ្ងៃទី២១មេសា នៅតែជាការគំរាមកំហែងក្នុងប្រទេសស៊ីរី។
ក្រោយកិច្ចប្រជុំមួយរបស់ក្រុមធ្វើឲ្យមានស្ថេរភាព ដឹកនាំរួមគ្នាដោយអាល្លឺម៉ង់និងអេមីរ៉ាត់អារ៉ាប់រួមព្រមទាំងសហរដ្ឋអាមេរិក ក្រុមនោះវាយតម្លៃថា ក៏ទោះជាក្រុមរដ្ឋអ៊ិស្លាមត្រូវលុបបំបាត់ចេញពីផែនទីស៊ីរី កាលពីដំណាច់ខែមីនាឆ្នាំ២០១៩ ហើយកងកម្លាំងប្រឆាំងជីហាដសន្យាបន្តការតស៊ូប្រឆាំងអ្វីដែលក្រុមនោះនៅសេសសល់ ពិសេសកន្លែងលាក់ខ្លួននៃមនុស្សរបស់គេ ក៏ការលុបបំបាត់ក្នុងរយៈពេលយូរអង្វែងនូវអង្គការភេរវកម្មនោះ នឹងពុំអាចទៅរួចឡើយ បើអវត្តមាននៃនយោបាយអភិវឌ្ឍន៍ ដែលអាចជីករំលើងប្ញសជ្រៅៗនៃបាតុភូតជីហាដ។
ភាពក្រីក្រ ភាពគ្មានការងារធ្វើនិងវិសមភាពសង្គម ទាំងនោះជាបញ្ហាដែលគេកត់សម្គាល់ឃើញ តែគេធ្វើមិនដឹងមិនឭុក្នុងសុន្ទរកថាជាសាធារណៈនិងក្នុងបណ្ដាសារព័ត៌មាន គឺតាំងពីចាប់ផ្ដើមជម្លោះនៅស៊ីរីមកម្ល៉េះ មកពីបញ្ហាភូមិសាស្ត្រនយោបាយ និងយោធា។
ក្រុមចម្រុះអន្តរជាតិប្រឆាំងក្រុមរដ្ឋអ៊ិស្លាម ជាក្រុមមួយមានប្រទេសដល់ទៅ៧៤ចូលរួម ហើយជួយទ្រទ្រង់ដល់កងកម្លាំងមូលដ្ឋាន នៅស៊ីរីនិងអុីរ៉ាក់ ដើម្បីបណ្ដេញពួកជីហាដចេញពីដែនដី ដែលពួកគេកាន់កាប់ក្នុងប្រទេសទាំង២នោះ ទទួលស្គាល់រឿងនេះដោយខ្លួនឯង។ ក៏ទោះបីក្រុមរដ្ឋអ៊ិស្លាម បាត់បង់ដែនដីកាន់កាប់នៅស៊ីរីនិងអុីរ៉ាក់ តែស្ថេរភាពក្នុងតំបន់នានាដែលរំដោះបាន គឺសំខាន់ណាស់ដើម្បីធានាដល់បរាជ័យជាស្ថាពររបស់ក្រុមនេះ រួចមានតែការអភិវឌ្ឍន៍ទេដែលជាមធ្យោបាយឲ្យសម្រេចបានគោលដៅនោះ៕
ចែករំលែកព័តមាននេះ