សេអ៊ូល ៖ ភ្នាក់ងារសារព័ត៌មាន Bloomberg បានឲ្យដឹងកាលពីថ្ងៃទី២៧កន្លងមកថា លោក Moon Jae-in បានក្លាយជាប្រធានាធិបតីកូរ៉េខាងត្បូងព្រោះតែការសន្យាថានឹងដោះស្រាយបញ្ហាធំៗពីរគឺ បញ្ហាកូរ៉េខាងជើង និងសេដ្ឋកិច្ច ប៉ុន្តែបញ្ហាទាំងពីរមិនមែនជាបញ្ហាងាយស្រួលដោះស្រាយឡើយ។
ធនាគារជាតិកូរ៉ែខាងត្បូងបានឲ្យដឹងកាលពីថ្ងៃព្រហស្បត្តិ៍ថា ផលិតផលក្នុងស្រុកសរុប (GDP) របស់ប្រទេសបានធ្លាក់ចុះ ០.៣% កាលពីត្រីមាសទី១កន្លងមក ដែលជាការធ្លាក់ចុះច្រើនជាងគេក្នុងរយៈពេល១០ឆ្នាំមកនេះ។
លោក Park Sangin ដែលជាសាស្ត្រាចារ្យមួយរូបនៅមហាវិទ្យាល័យរដ្ឋបាលសាធារណៈក្រោមសាកលវិទ្យាល័យជាតិសេអ៊ូលបានឲ្យដឹងថា “មិនត្រឹមតែទិន្នន័យក្នុងថ្ងៃនេះទេ តែទិន្នន័យថ្មីៗដទៃក៏បានបង្ហាញថាសេដ្ឋកិច្ចកំពុងតែដំណើរការទៅមុខមិនល្អដូចការគិតដែរ។ វាពិតជាស្ថានការដ៏មានសម្ពាធមួយរដល់រដ្ឋាភិបាលលោក Moon Jae-in ណាស់”។
បញ្ហារចនាសម្ព័ន្ធសេដ្ឋកិច្ចដែលរួមមានការអន់ថយនៃសេដ្ឋកិច្ចចិន និងការធ្លាក់ចុះនៃតម្រូវការ Semiconductor នឹងផ្តល់បញ្ហាដល់អ្នកដឹកនាំកូរ៉េខាងត្បូងគ្រប់រូប។ ដោយហេតុដូច្នេះ លោក Moon មិនបានសន្យាថានឹងបង្កើតការងារទេ ប៉ុន្តែលោកបានដើរតួនាទីបញ្ចុះបញ្ចូលលោកប្រធានាធិបតីដូណាល់ត្រាំ (Donald Trump) នឹងលោក Kim ឲ្យបញ្ឈប់ការកឲគម្រាមកំហែងនិងមកពិភាក្សាគ្នាវិញ។
ការជំរុញនេះបានជួយដោះស្រាយបញ្ហាសេដ្ឋកិច្ចមួយចំនួន ប៉ុន្តែការគាំទ្ររបស់លោកបែរជាធ្លាក់ចុះបន្ទាប់ពីការចរចារវាងសហរដ្ឋអាមេរិកនិងកូរ៉េខាងជើងមានភាពរអាក់រអួល។
គណបក្ស Liberty Korea Party កំពុងតែមានប្រជាប្រិយភាពកាន់តែខ្លាំងឡើងផងដែរ ខណៈដែលពួកគេប្រឆាំងនឹងសំណើរចាត់តាំងរបស់លោក Moon នៅសភាជាតិ និងរិះគន់គោលនយោបាយរបស់លោកទាក់ទិននឹងកូរ៉េខាងជើងកាលពីសប្តាហ៍មុនផងដែរ។
ជាមួយគ្នានេះទៀត លោក Kim Jong-un បានបង្កើនការរិះគន់ដល់លោកប្រធានាធិបតី Moon ដោយប្រាប់ដល់លោកឲ្យបញ្ឈប់ការតាំងខ្លួនជាអ្នកសម្របសម្រួលចេះដឹងច្រើនជ្រុលខណៈដែលសារពត៌មានកូរ៉េខាងជើងរិះគន់ពីការផ្លាស់ប្តូរផ្នែកយោធារវាងសហរដ្ឋអាមេរិកនិងកូរ៉េខាងត្បូង។
ចែករំលែកព័តមាននេះ