ប៉េកាំង- ភ្នំពេញ ៖ នាយករដ្ឋមន្ត្រីបានបញ្ជាក់ថា ទោះបីមានបញ្ហាអ្វីក៏ដោយមិនអាចបំបែកបំបាក់ចំណងមិត្តភាពរវាងកម្ពុជា-ចិនបានឡើយ ។ ការប្តេជ្ញារបស់នាយករដ្ឋមន្ត្រីចិនលោកលី ឌឹកឈាង ក្នុងជំនួបជាមួយសម្តេចតេជោហ៊ុន សែន នាយករដ្ឋមន្ត្រីកម្ពុជានា ថ្ងៃទី២៨ មេសាឆ្នាំ២០១៩ ។ ក្នុងជំនួបលោកនាយករដ្ឋមន្ត្រីចិនបានអរគុណជូនចំពោះសម្តេចតេជោដែលបានអញ្ជើញចូលរួមវេទិកាខ្សែក្រវ៉ាត់ និងផ្លូវលើកទី២ សម្រាប់កិច្ចសសហប្រតិបត្តិការអន្តរជាតិ នៅទីក្រុងប៉េកាំងប្រទេសចិន ។
លោកបន្តថា ប្រទេសកម្ពុជា គឺជាមិត្តដ៏ល្អរបស់ប្រទេសចិន ។ ប្រទេសចិនជាមិត្តរបស់កម្ពុជាហើយចិនជឿជាក់ និងទុកចិត្តគ្នាទៅវិញទៅមក ។ ជាការឆ្លើយតបសម្តេចតេជោនាយករដ្ឋមន្ត្រីមានប្រសាសន៍ថា ក្នុងគំនិតផ្តួចផ្តើមខ្សែក្រវ៉ាត់ និងផ្លូវបច្ចុប្បន្ននេះកម្ពុជា- ចិនកំពុងធ្វើយ៉ាងណាឲ្យគំនិតផ្លូវផ្តើមខ្សែក្រវ៉ាត់ និងផ្លូវ និងយុទ្ធសាស្ត្រចតុកោណរបស់កម្ពុជាមានការស៊ីសង្វាក់គ្នា និងមានការតភ្ជាប់គ្នា ពិសេសការតភ្ជាប់គ្នាទាំងផ្នែកទុន និងផ្នែករឹង ។
សម្តេចតេជោក៏បានលើកឡើងពីយន្តការនៃការបន្តបង្កើនកិច្ចសហប្រតិបត្តិការជាមួយគ្នាក្នុងក្របខណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវ ។ ក្នុងជំនួបពិភាក្សាគ្នានោះសម្តេចតេជោនាយករដ្ឋមន្ត្រីមានប្រសាសន៍អរគុណជូនចំពោះរដ្ឋាភិបាលចិនដែលផ្តើមការពិភាក្សាជាមួយកម្ពុជាដែលទាក់ទិនទៅនឹងសហភាពអឺរ៉ុប ដែលត្រៀមដក EBA ពីកម្ពុជា ។ តាមរយៈអ្វីដែលភាគីចិនមានគម្រោងជួយដល់កម្ពុជានោះសម្តេចបានស្នើនៅចំពោះមុខលោកនាយករដ្ឋមន្ត្រីចិន ធ្វើយ៉ាងណាជួយជំរុញឲ្យក្រុមហ៊ុនចិនបន្តការបណ្តាក់ទុនវិនិយោគ និងធ្វើពាណិជ្ជកម្មក្នុងប្រទេសកម្ពុជាជាបន្តទៅទៀត ។
សម្តេចតេជោបន្តថា កម្ពុជានឹងបន្តធ្វើកំណែទម្រង់ផ្ទៃក្នុងខ្លួនឯងឲ្យកាន់តែស៊ីជម្រៅថែមទៀត ដើម្បីធ្វើយ៉ាងណាជំរុញកំណើនសេដ្ឋកិច្ចកម្ពុជាឲ្យកាន់តែមានល្បឿនខ្ពស់ជាងមុន ។ ក្នុងជំនួបពិភាក្សាគ្នានោះដែរ សម្តេចក៏បានស្នើដល់ភាកីចិនជួយដល់ខេត្តព្រះសីហនុលើការគ្រប់គ្រង ពិសេសជួយដល់បញ្ហាទឹកកខ្វក់ តាមរយៈការផ្តល់ហិរញ្ញប្បទានដល់គម្រោងអភិវឌ្ឍទឹកស្អាត និងការអភិវឌ្ឍជនបទ ដើម្បីឲ្យខេត្តព្រះសីហនុក្លាយជាខេត្តគំរូនៃការនុវត្តគំនិតផ្តួចផ្តើមខ្សែក្រវ៉ាត់ និងផ្លូវនេះ ។
ជាការឆ្លើយតបទៅនឹងប្រសាសន៍លើកឡើងរបស់សម្តេចតេជោលោកនាយករដ្ឋមន្ត្រីចិនបានលើកឡើងថា អ្វីដែលលោកចង់ឃើញ គឺការពង្រឹងកិច្ចសហប្រតិបត្តិការនៃប្រទេសទាំងពីរឲ្យកាន់តែរឹងមាំ និងបោះជំហានទៅមុខ និងការបម្រើផលប្រយោជន៍រួមសម្រាប់ប្រទេស និងប្រជាជនទាំងពីរ ពិសេសចិននឹងបន្តគាំទ្រដល់យុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលកម្ពុជា ។ លោកបញ្ជាក់ថា«ចិនមានឆន្ទះច្បាស់លាស់ក្នុងការជួយដល់ប្រទេសកម្ពុជា ពិសេសពាក់ព័ន្ធទៅនឹងក្រុមហ៊ុនចិនដែលកំពុងធ្វើពាណិជ្ជកម្ម និងវិនិយោគនៅកម្ពុជា ។ រដ្ឋាភិបាលចិន នឹងជំរុញនិងលើកទឹកចិត្តដល់ក្រុមហ៊ុនទាំងនោះបង្កើនខ្សែសង្វាក់ផលិតបន្ថែមទៀតនៅកម្ពុជា» ។
លោកក៏បានសង្កត់ធ្ងន់ថា «បើទោះបីជាមានបញ្ហាអ្វីក៏ដោយ គឺមិនអាចបំបែកចំណងមិត្តភាពដ៏រឹងមាំរវាងចិន និងកម្ពុជាបានឡើយ ហើយចិនបន្តជួយដល់កម្ពុជាលើគ្រប់ផ្នែកទាំងអស់» ។ ទាក់ទិនទៅនឹងសំណើររបស់សម្តេចតេជោដែលបានស្នើឲ្យភាគីចិនបន្តបើកចំហរទីផ្សារក្នុងប្រទេសចិន ដើម្បីទទួលយកនូវផលិតផលពីប្រទេសកម្ពុជា ។ លោកនាយករដ្ឋមន្ត្រីចិនបានបន្ថែមថា ភាគីចិននឹងពិនិត្យលទ្ធភាពគ្រប់បែបយ៉ាងក្នុងការទទួលនូវផលិតផលពីប្រទេសកម្ពុជាលើអ្វីដែលប្រទេសចិនមានតម្រូវការចាំបាច់នោះ ៕
ចែករំលែកព័តមាននេះ