រាជធានីភ្នំពេញ៖ អតីតប្រធានគណបក្សអំណាចខ្មែរលោក សួន សេរីរដ្ឋា ហើយក៏ជាអ្នកនយោបាយប្រឆាំងមួយរូបបានលាតត្រដាងពីគំនិតបង្កើតនយោបាយលាបពណ៌របស់អតីតគណបក្សប្រឆាំងមកលើករាជរដ្ឋាភិបាលកម្ពុជា តាំងពីដើម ។ លោកសួន សេរីរដ្ឋាឲ្យដឹងនៅថ្ងៃទី២៨ ខែមេសា យ៉ាងដូច្នេះថា ថ្ងៃនេះខ្ញុំនិយាយពីមេគំនិតបង្កើតនយោបាយលាបពណ៌ ។
វប្បធម៌លាបពណ៌នយោបាយជាគំនិតនយោបាយរបស់សម រង្ស៊ី ដែលលោកសម រង្ស៊ី លោក យឹម សុវណ្ណ និងលោកអ៊ូ ប៊ុនឡុង បាននិយាយផ្ទាល់ក្រៅផ្លូវការជាមួយពួកខ្ញុំ តំណាងក្រុមអង្គការសង្គមស៊ីវិលតាំងពីឆ្នាំ២០០១ មកម្ល៉េះ!» ។ លោកបន្តថា លោកសម រង្ស៊ី និយាយថា «ដើម្បីឲ្យពលរដ្ឋខ្មែរអ្នកស្អប់សម្តេចហ៊ុន សែន ស្អប់យួនទាំងអស់គាំទ្រ និងបោះឆ្នោតឲ្យគណបក្ស សម រង្ស៊ី គឺត្រូវតែនិយាយថា គណបក្សផ្សេងៗដែលបង្កើតដែលមិនចូលរួមជាមួយសម រង្ស៊ី នោះ គឺជាគណបក្សអាយ៉ង ហ៊ុន សែន និងជាគណបក្សដែល ហ៊ុន សែន ឲ្យលុយង្កើត» ។ គាត់បានបន្តថា ៖ «ខ្មែរអ្នកប្រជាធិបតេយ្យ អ្នកស្នេហាជាតិ ស្អប់ ហ៊ុន សែន ដល់ឆ្អឹង ។ ដូច្នោះឲ្យពួកយើងនិយាយថា គណបក្សដែលក្រៅពីគណបក្ស សម រង្ស៊ី ជាគណបក្សអាយ៉ង សម្តេចហ៊ុន សែន ហើយសម្តេចហ៊ុន សែន ឲ្យលុយង្កើតនោះគ្មាននណាបោះឆ្នោតឲ្យទេ ។ ពេលនោះយើងគណបក្សសម រង្ស៊ី ទទួលបានសំឡេងអ្នកស្អប់ ហ៊ុន សែន ទាំងអស់» ។
លោកសួន សេរីរដ្ឋាបានលើកឡើងថា ក្នុងកិច្ចប្រជុំនោះមានលោក អ៊ូ ប៊ុនឡុង និងលោកយឹម សុវណ្ណ ជាអ្នកងក់ក្បាលបន្ថែម និងទទួលយកគំនិតនេះ ។ ដូច្នោះហើយទើបក្រុមសម រង្ស៊ី និយមនេះប្រើនយោបាយលាបពណ៌នេះរហូតដល់ថ្ងៃនេះ ។ ឲ្យតែគេមិនចូលជាមួយខ្លួន គឺលាបពណ៌ថា ជាអាយ៉ងបក្សកាន់អំណាចថា យកលុយហ៊ុន សែន និងថាហ៊ុន សែន ឲ្យបង្កើតទាំងអស់ ។ អតីតប្រធានបក្សអំណាចខ្មែរក៏បានលើកឡើងថា ពីឆ្នាំ១៩៩៩ ដល់ឆ្នាំ២០០៧ មុនពេលខ្ញុំចាកចេញទៅអាមេរិក គឺខ្ញុំធ្វើការជាមន្ត្រីជាន់ខ្ពស់របស់អង្គការសង្គមស៊ីវិលនៅក្នុង ប្រទេសខ្មែររហូតបោះឆ្នោតជាប់ជាសមាជិកក្រុមប្រឹក្សាគណកម្មាធិការតស៊ូមតិនៅអាស៊ីអា គ្នេយ៍ (Member of Board Council of South East Asia Committee for Advocacy) សម័យប្រជុំនៅ Jorjakata ប្រទេសឥណ្ឌូណេស៊ី ។
មុនការបោះឆ្នោ តក្រុមប្រឹក្សា ឃុំសង្កាត់ដំបូងនៅឆ្នាំ២០០២ អង្គការសង្គមស៊ីវិលជាច្រើនធ្វើការតស៊ូមតិទាមទារឲ្យបោះឆ្នោតរើសមេឃុំ ចៅសង្កាត់ និងបោះឆ្នោតរើសមេភូមិ មិនមែនបោះឆ្នោតក្រុមប្រឹក្សាឃុំសង្កាត់ រើសសមាជិកក្រុមប្រឹក្សាឃុំសង្កាត់ និងតែងតាំងមេភូមិដូចរាល់ថ្ងៃនេះទេ ។ ដែលក្នុងនោះមានគណបក្ស៣ ដែលមានកៅអីក្នុងរដ្ឋសភាកាលណោះ គឺ គណបក្ស សម រង្ស៊ី (តំណាងដោយលោក អ៊ូ ប៊ុនឡុង) កាលណោះជំទាស់ខ្លាំងបំផុត មិនព្រមទទួលយកការបោះឆ្នោតរើសមេឃុំ ចៅសង្កាត់ និងមេភូមិទេ ដោយខ្លាចមិនបានកៅអីមេឃុំ មេភូមិនឹងគេ (បញ្ជាក់ថា គណបក្ស២ទៀត គឺ CPP & Funcinpec មិនជំទាស់ទេ) ។ លោកបន្ថែមថា មុននឹងឈានដល់ការសម្រេចបោះឆ្នោតរើសក្រុមប្រឹក្សាឃុំ សង្កាត់នោះក្រុមតំណាងអង្គការសង្គមស៊ីវិល (ខ្ញុំ និងក្រុមការងារ) បានជួបមេបក្ស និងតំណាងគណបក្សច្រើនលើកណាស់ដែលរួមទាំងទៅធ្វើជាគ្រូបង្គោលបង្ហាត់មន្ត្រីគណបក្សនយោបាយពីយុទ្ធនាកាបោះឆ្នោតផង ៕
ចែករំលែកព័តមាននេះ