រាជធានីភ្នំពេញ ៖ គ្រោះថ្នាក់ចរាចរណ៍រវាងរថយន្តមួយគ្រឿងបុកជាមួយម៉ូតូសណ្តោងរ៉ឺម៉កដឹកផ្កាតែងរោងការ បណ្តាលឱ្យភាគីខាងម៉ូតូសណ្តោងរ៉ឺម៉ករងរបួសធ្ងន់ចំនួន២នាក់ ចំណែកឯរថយន្តបើកចូលផ្ទះបាត់ តែត្រូវប្រជាពលរដ្ឋស្គាល់ផ្ទះផងដែរ ។ ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី២៦ ខែមេសា ឆ្នាំ២០១៩…
រាជធានីភ្នំពេញ ៖ គ្រោះថ្នាក់ចរាចរណ៍រវាងរថយន្តមួយគ្រឿងបុកជាមួយម៉ូតូសណ្តោងរ៉ឺម៉កដឹកផ្កាតែងរោងការ បណ្តាលឱ្យភាគីខាងម៉ូតូសណ្តោងរ៉ឺម៉ករងរបួសធ្ងន់ចំនួន២នាក់ ចំណែកឯរថយន្តបើកចូលផ្ទះបាត់ តែត្រូវប្រជាពលរដ្ឋស្គាល់ផ្ទះផងដែរ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី២៦ ខែមេសា ឆ្នាំ២០១៩ តាមបណ្ដោយផ្លូវបេតុង ក្នុងបុរីពិភពឈូកវ៉ា៣ ដែលស្ថិតនៅភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ ។
ភាគីខាងរថយន្តមួយគ្រឿងខាងលើត្រូវបានប្រជាពលរដ្ឋដឹងថាជារថយន្តម៉ាកសាំយ៉ុង ពណ៌ស ពាក់ស្លាកលេខ ភ្នំពេញ ២AN-៨១០៤ បើកបរដោយបុរសម្នាក់មិនស្គាល់អត្តសញ្ញាណ ។ ចំណែកភាគីខាងម៉ូតូសណ្តោងរ៉ឺម៉កម៉ាកស៊ីរុស ពណ៌ក្រហម អត់ស្លាកលេខ មានដឹកផ្កាតែងរោងការ បើកបរដោយបុរសម្នាក់មិនស្គាល់អត្តសញ្ញាណ បានរងរបួសធ្ងន់ និងអ្នករួមដំណើរម្នាក់ទៀតមិនស្គាល់អត្តសញ្ញាណ បានរងរបួសធ្ងន់ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញ ម៉ូតូសណ្តោងរ៉ឺម៉កមានដឹកផ្កាតែងរោងការខាងលើជិះគ្នា២នាក់ បើកបរក្នុងទិសដៅពីត្បូងទៅជើង លុះមកដល់ចំណុចកើតហេតុ ស្រាប់តែមានរថយន្តម៉ាកសាំយ៉ុង ពណ៌ស បើកបរក្នុងទិសដៅពីត្បូងទៅជើង ស្របទិសគ្នា ហើយរថយន្តសាំយ៉ុងនោះបានបុកម៉ូតូសណ្តោងរ៉ឺម៉កពីក្រោយពេញទំហឹង បណ្តាលឲ្យធ្លាក់ជនរងគ្រោះពីលើម៉ូតូសណ្តោងរ៉ឺម៉ករងរបួសធ្ងន់ទាំង២នាក់តែម្តង រីឯផ្កាសម្រាប់តែងរោងការបានធ្លាក់រាយប៉ាយពេញផ្លូវ ។
ប្រភពព័ត៌មានដដែលបានបន្តទៀតថា ពេលភ្លាមៗនោះ រថយន្តបង្កខាងលើបានបើកចូលផ្ទះ ទល់មុខកន្លែងកើតហេតុ ហើយបិទទ្វារជិត ។ ចំណែកជនរងគ្រោះទាំង២នាក់ខាងលើត្រូវបានរថយន្តសង្គ្រោះរបស់គ្លីនិកឯកជនដឹកយកទៅសង្គ្រោះភ្លាមៗផងដែរ។
ក្រោយពេលកើតហេតុ កំលាំងនគរបាលប៉ុស្តិ៍កាកាបទី២ និងជំនាញចរាចរណ៍ខណ្ឌពោធិ៍សែនជ័យបានសហការជាមួយអាជ្ញាធរភូមិ ដើម្បីហៅម្ចាស់ផ្ទះដែលរថយន្តបង្កបើកចូលខាងលើ តែម្ចាស់ផ្ទះខាងលើមិនចេញមកសហការជាមួយកំលាំងនគរបាលប៉ុស្តិ៍ និងជំនាញចរាចរណ៍ខណ្ឌពោធិ៍សែនជ័យឡើយ បន្ទាប់មកកំលាំងនគរបាលប៉ុស្តិ៍កំពុងយាមនៅខាងមុខផ្ទះនោះ រងចាំពេលភ្លឺនឹងចាត់ការតាមនីតិវិធី ៕
ចែករំលែកព័តមាននេះ