រាជធានីភ្នំពេញ ៖ លោកឧត្តមសេនីយសន្តិបណ្ឌិត នេត សាវឿន អគ្គស្នងការនគរបាលជាតិ បានអំពាវនាវទៅដល់កងកម្លាំងសមត្ថកិច្ចទាំងអស់ត្រូវចាត់វិធានការណ៍ទប់ស្កាត់ឧបាយកលប៉ុនប៉ងបំផ្លិចបំផ្លាញចំពោះដំណើរការរៀបចំការបោះឆ្នោតក្រុមប្រឹក្សារាជធានី-ខេត្ត នាពេលខាងមុខនេះ ។ ក្នុងពិធីបើកកិច្ចប្រជុំផ្សព្វផ្សាយសេចក្ដីណែនាំរួមស្ដីពីសកម្មភាព និងការរៀបចំភ្នាក់ងារសន្ដិសុខបោះឆ្នោតការពារការបោះឆ្នោតជ្រើសរើសក្រុមប្រឹក្សាអាណត្តិទី៣ និងការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៩ នៅថ្ងៃទី២៦ ខែមេសា ឆ្នាំ២០១៩នៅទីស្តីការក្រសួង ។
លោកអគ្គស្នងការនគរបាលជាតិនេតសាវឿន បានថ្លែងថា សមត្ថកិច្ចត្រូវធានាឲ្យបាននូវបរិយាកាសស្ងប់ស្ងាត់អព្យាក្រឹត្យ ដើម្បីការបោះឆ្នោត ឬការចុះឈ្មោះបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌ តាមគោលការណ៍លទ្ធិប្រជាធិបតេយ្យប្រកបដោយសុវត្ថិភាព គ្មានការគំរាមកំហែង គ្មានការបំភិតបំភ័យ និងអំពើហិង្សា ។ លោកនេត សាវឿន បានបញ្ជាក់ថា «យើងត្រូវចាត់វិធានការណ៍ទប់ស្កាត់ប្រយុទ្ធរាល់ឧបាយកលការប៉ុនប៉ងបំផ្លិចបំផ្លាញ ឬធ្វើឲ្យមានការរាំងស្ទះដល់ដំណើរការរៀបចំការបោះឆ្នោត និងការចុះឈ្មោះបោះឆ្នោតតាមគ្រប់រូបភាព» ។
លោកបន្ដថា សមត្ថកិច្ចត្រូវផ្តល់នូវសេវាសន្តិសុខ ដោយស្មើភាពគ្នាចំពោះមុខច្បាប់ជូនអ្នកបោះឆ្នោតកិច្ចប្រជុំវាគ្មិន និងគណបក្សនយោបាយដែលឈរឈ្មោះបោះឆ្នោតប្រជាពលរដ្ឋដែលមានសិទ្ធបោះឆ្នោតដែលអញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោតព្រម ទាំងអ្នកសង្កេតការណ៍ជាតិ និងអន្តរជាតិដែលបានចូលរួមសង្កេតការណ៍ ។ លោកទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ.ជ.ប) បានលើកឡើងថា ក្នុងដំណើរការបោះឆ្នោតជ្រើសរើសក្រុមប្រឹក្សាអាណត្តិទី៣នេះ មានគណបក្សនយោបាយចំនួន៧ រួមមាន ទី១-គណបក្សប្រជាជនកម្ពុជា ទី២-គណបក្សសញ្ជាតិកម្ពុជា ទី៣-គណបក្សហ្វ៊ុនស៊ិនប៉ិច ទី៤-គណបក្សខ្មែររូបរួមជាតិ ទី៥- គណបក្សយុវជនកម្ពុជា ទី៦-គណបក្សឆន្ទៈខ្មែរ និងទី៧-គណបក្សសាធារណៈរដ្ឋ ដោយបានចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះត្រូវបាន គ.ជ.ប ប្រកាសទទួលស្គាលជាផ្លូវការ ។ លោកបន្ថែមថា ចំនួនបេក្ខជនសរុបទាំង៧គណបក្សនយោបាយ សម្រាប់មណ្ឌលរាជធានី-ខេត្តមានចំនួន៤៧២៣រូប ក្នុងនោះមានស្ត្រី១៧១៨រូប ត្រូវជា៣៦.៣៨ភាគរយ និងចំនួន បេក្ខជនសរុបសម្រាប់មណ្ឌលក្រុង ស្រុក និងខណ្ឌ មានចំនួន១៦៩៦៩រូបក្នុងនោះ មានស្ត្រី ៥៥៦០រូបត្រូវជា៣២.៧៧ភាគរយ ។
លោកបញ្ជាក់ថា ការឃោសនាបោះឆ្នោតមានរយៈពេល៨ថ្ងៃ ចាប់ពីថ្ងៃទី១៧-២៤ ខែឧសភា ឆ្នាំ២០១៩ ខាងមុខនេះ តាមនីតិវិធីឃោសនាបោះឆ្នោតគ្រប់សកម្មភាពឃោសនារបស់គណបក្សនយោបាយត្រូវចាប់ផ្ដើមពីម៉ោង៦ព្រឹក ដល់ម៉ោង១០យប់ ៕
ចែករំលែកព័តមាននេះ