រាជធានីភ្នំពេញ ៖ គេធ្លាប់តែដឹងថា ពីមុនមានតែលោក អេ ភូថង ប៉ុណ្ណោះដែលមានកូនហាត់កីឡាប្រដាល់ច្រើនជាងគេ ប៉ុន្តែពេលនេះងាកមកមើលគ្រួសាររបស់លោក សួន ប៊ុន សូត្រវិញថាតើគាត់មានកូនប៉ុន្មាននាក់ដែលចាប់យកអាជីពកីឡាប្រដាល់ដែលកំពុងពេញនិយមនាពេលបច្ចុប្បន្ន។
លោក សួន ប៊ុនសូត្រ ដើមឡើយគ្រាន់ តែជាអតីតកីឡាករប្រដាល់សាកលមួយ រូបប៉ុណ្ណោះថែមទាំងមិនសូវមានឈ្មោះបោះសំឡេងទៀតផង ។ លោកជាសិស្សរួមគ្រូជាមួយលោក មាស សុខគ្រី ហ្វឹកហាត់នៅក្លិប ឬស្សីកែវ។ លោកចូលហាត់ប្រដាល់តាំងពី ឆ្នាំ១៩៨៦ពេលមានអាយុ១៩ឆ្នាំ ហើយបានលាឈប់ពីអាជីពមួយនេះនៅឆ្នាំ១៩៩០ និងបានរៀប ការប្រពន្ធចាប់ពីពេលនោះមក។
ដោយសារតែមានចិត្តស្រឡាញ់ និងចង់លើកស្ទួយវិស័យកីឡាប្រដាល់ក្បាច់គុនបូរាណខ្មែរនៅឆ្នាំ២០០៤ លោកក៏សម្រេចចិត្តបង្កើតក្លិបប្រដាល់មួយនៅមាត់បឹងជិតផ្ទះរបស់លោក ដោយដាក់ឈ្មោះថាបក្សីស្លាបដែកនិងមានសិស្សចូលហាត់រៀនច្រើន ។ ក្រោយមក ទីតាំងក្លិបហ្វឹកហាត់របស់លោកត្រូវម្ចាស់គេយកវិញ លោកក៏ប្ដូរទៅធ្វើនៅសង្កាត់ក្រាំងឃ្នង់ខណ្ឌសែនសុខវិញ ។ ចាប់ពីពេលនោះមកលោកបានសម្រេចចិត្តឈប់បង្ហាត់អ្នកក្រៅគឺបង្ហាត់តែកូនខ្លួនឯងប៉ុណ្ណោះ ។ តើលោកមានកូន ប៉ុន្មាននាក់ដែលសុខចិត្តចាប់យកអាជីពជាអ្នកប្រដាល់ជាងមុខរបរផ្សេងៗនោះ ។
តាម អ្វីដែលលោកបានប្រាប់ ក្នុងចំណោមកូនប្រុសស្រីចំនួន៧នាក់ មាន៥នាក់ហើយដែលបានចាប់យកអាជីពជាអ្នកប្រដាល់ដោយមានតែកូនស្រីច្បងនិងកូនប្រុសទី២ឈ្មោះសូត្រ ផាន់ ដារ៉ា ប៉ុណ្ណោះដែលមិនមាននិស្ស័យស្រឡាញ់ កីឡាប្រដាល់ ក្រៅពីនោះមាន សូត្រ ចាន់ ដារ៉ា ជាអតីតកីឡាករប្រដាល់មួយរូប តែបាន លាឈប់ទៅហើយ នៅសល់តែ សួន ចាន់នី ដែលជាម្ចាស់ខ្សែក្រវាត់២ស្ថាប័ន ហើយសព្វថ្ងៃគេកំពុងតែត្រៀមខ្លួនឡើងប្រកួតនៅវគ្គផ្ដាច់ព្រ័ត្រពានរង្វាន់កំពូលអ្នកប្រយុទ្ធកណ្ដាប់ដៃដែកនៅលើសង្វៀនស៊ីអិនស៊ី ។
ចំណែក សូត្រ ខេវិនក៏ជាអ្នកប្រដាល់ដែលកំពុងតែមានឈ្មោះល្បីមួយរូបដែរក្នុងពេលសូត្រ វាសនា និងសូត្រ សុខឃីម កំពុងតែមានឈ្មោះស្ថិតនៅក្នុងការប្រមូលផ្ដុំកីឡាករជម្រើសជាតិថ្នាល ត្រៀមប្រកួតកីឡាស៊ីហ្គេមឆ្នាំ២០២៣។
លោក សួន ប៊ុនសូត្រ បានប្រាប់ថា កូនៗទាំង៧នាក់មានតែសួន ចាន់នីប៉ុណ្ណោះដែលយកត្រកូលតាមជីតា ក្រៅពីនោះយកត្រកូលតាម ឈ្មោះលោកទាំងអស់ ។ លោកថា តាមពិតទៅលោកក៏មានបំណងចង់ឱ្យ កូនរៀនបានជ្រៅជ្រះដូចគេឯងដែរប៉ុន្តែដោយសារតែគ្រួសាររបស់លោកមានជីវភាពខ្វះខាតខ្លាំងពេក ពុំមានលទ្ធភាពរកប្រាក់ឱ្យកូនរៀនបាន ទើបសម្រេចឱ្យកូនចូលហាត់កីឡាប្រដាល់តែម្ដងទៅ ។
ទោះបីជាកូនៗរបស់លោកមានខ្លះមិនបានចូលសាលារៀនក្ដីតែលោកបានអប់រំពួកគេមិនឱ្យដើរផ្លូវខុស ឬសាងអំពើមិនល្អដែលសង្គមកំពុងតែស្អប់ខ្ពើមនោះទេ ។ លោកបានបញ្ជាក់យ៉ាងច្បាស់ថា មុខរបរអ្វីក៏ ដោយសុទ្ធតែល្អទាំងអស់ សំខាន់ឱ្យតែយើងចាប់វាឱ្យជាប់ ព្យាយាមយកចិត្តទុកដាក់អនុវត្តការងារនោះឱ្យបានល្អ វានឹងផ្ដល់ផលប្រយោជន៍ដល់យើងមិនឱ្យខកបំណងឡើយ៕
ចែករំលែកព័តមាននេះ