ខេត្តព្រះវិហារ ៖ កសិករប្រកបរបរដាំដុះដំឡូងមីខេត្តព្រះវិហារនៅដើមរដូវវស្សាឆ្នាំនេះពួកគេ កំពុងព្រួយបារម្ភចំពោះការលូតលាស់ដំណាំប្រភេទនេះ ក្រោយពេលពួកគេបានដាំដុះជាបណ្តើរៗ ប៉ុន្តែទឹកភ្លៀងមិនទាន់បានធ្លាក់គ្រប់គ្រាន់នៅឡើយធ្វើឲ្យដំណុះដំឡូងមីមិនសូវបានល្អ ។ លោកអ៊ឹម សំអ៊ុន ជាកសិកររស់នៅភូមិអូរខ្លែង…
ខេត្តព្រះវិហារ ៖ កសិករប្រកបរបរដាំដុះដំឡូងមីខេត្តព្រះវិហារនៅដើមរដូវវស្សាឆ្នាំនេះពួកគេ កំពុងព្រួយបារម្ភចំពោះការលូតលាស់ដំណាំប្រភេទនេះ ក្រោយពេលពួកគេបានដាំដុះជាបណ្តើរៗ ប៉ុន្តែទឹកភ្លៀងមិនទាន់បានធ្លាក់គ្រប់គ្រាន់នៅឡើយធ្វើឲ្យដំណុះដំឡូងមីមិនសូវបានល្អ ។
លោកអ៊ឹម សំអ៊ុន ជាកសិកររស់នៅភូមិអូរខ្លែង ពណ៌ខាងលិច សង្កាត់ប៉ាលហាល ក្រុងព្រះវិហារបានលើកឡើងថា ការដាំដុះដំណាំដំឡូងមីអាចចាប់ផ្តើមដាំដុះចាប់ពីពាក់កណ្តាលខែមីនាតទៅ ដោយផ្អែកលើកម្រិតទឹកភ្លៀងធ្លាក់មក ប៉ុន្តែគិតមកដល់ខែមេសា ឆ្នាំ២០១៩នេះទឹកភ្លៀងនៅខេត្តព្រះវិហារបានធ្លាក់មកមិនទាន់គ្រប់គ្រាន់នៅឡើយទេ សម្រាប់ឲ្យប្រជាពលរដ្ឋដាំដុះដំណាំប្រភេទនេះ បើធៀបនឹងឆ្នាំមុនទឹកភ្លៀងបានធ្លាក់ច្រើមគួរសមនឹងអាចឲ្យដំណាំនេះលូតលាស់បានល្អ ។
លោកក៏បានសម្តែងនូវកង្វល់យ៉ាងខ្លាំង ប្រសិនបើទឹកភ្លៀងមិនធ្លាក់មកទៀតនោះដំណាំរបស់ គាត់នឹងប្រឈមការលូតលាស់មិនបានល្អ ដោយសារតែសំណើមដីមិនបានគ្រប់គ្រាន់ ដូច្នេះ ហើយជាកត្តាមួយធ្វើឲ្យទិន្នផលដំឡូងមីរបស់ពួកគាត់អាចនឹងធ្លាក់ចុះ ។
ទោះជាបែបនេះក្តីកសិកររូបនេះបានបន្តទៀតថា មូលហេតុដែលពួកគេបន្តដាំដុះដំណាំ ប្រភេទនេះ ដោយសារតែចាប់ពីឆ្នាំ២០១៨ រហូតមកដល់បច្ចុប្បន្ននេះទីផ្សារដំឡូងមី កំពុងហក់ឡើងថ្លៃឡើងវិញជាបណ្តើរៗ នឹងអាចឲ្យពួកគាត់ចំណេញច្រើន ក្រោយពេលប្រមូលផល បើទោះបីជាការដាំដុះដំណាំនេះជួបបញ្ហាប្រឈមនានាក៏ដោយ ។
ជាមួយគ្នានេះលោកពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ បានឲ្យដឹងថា ខេត្តព្រះវិហារទទួលបានទឹកភ្លៀងចាប់ពីដើមរដូវមកដល់ខែមេសានេះ ប្រមាណជា១០០មីលីម៉ែត្រប៉ុននោះ ដែលកម្រិតនេះមិនទាន់ល្អសម្រាប់ដំណាំដំឡូងមី ឬដំណាំសណ្តែកបាយឡើយ ព្រោះសំណើមដីក៏មិនទាន់គ្រប់គ្រាន់ ។ លោកថា ប្រសិនបើកសិករចាប់ផ្តើមដាំដុះពីពេលនេះទៅបារម្ភខ្លាចនៅពេល២ ឬ៣សប្តាហ៍ខាងមុខមិនមានភ្លៀងធ្លាក់អាចធ្វើឲ្យដំណាំនេះធ្វើឲ្យដំណុះដំណាំនេះងាប់ទៅវិញ ។ លោកក៏បានអំពាវនាវឲ្យប្រជាកសិករទាំងអស់រង់ចាំធ្លាក់ភ្លៀងឲ្យបានសើមដីល្អបន្តិចសិនទើបចាប់ផ្តើមដាំដំណាំនេះ ព្រោះវាអាចឲ្យដំឡូងមី ឬសណ្តែកបាយលូតលាស់បានល្អ ។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ក្នុងឆ្នាំ២០១៩នេះបង្ហាញថា ផ្ទៃដីដាំដុះដំឡូងមី នៅទូទាំង៨ក្រុងស្រុកនៃខេត្តព្រះវិហារ មានប្រមាណ២ម៉ឺនហិកតា បើធៀបនឹងឆ្នាំមុនកើនឡើងបន្តិច ៕
ចែករំលែកព័តមាននេះ