លោកមុត ចន្ថា៖ លោកសម រង្ស៊ី និងបក្សពួកតែងតែលាបពណ៌លោកកឹម សុខា
- ភ្នំពេញ
រាជធានីភ្នំពេញ ៖ លោកមុត ចន្ថា មនុស្សជំនិតលោកកឹម សុខា បានអះអាងថា លោកសម រង្ស៊ី និងបក្ខពួកតែងតែលាបពណ៌លោកកឹម…
រាជធានីភ្នំពេញ ៖ លោកមុត ចន្ថា មនុស្សជំនិតលោកកឹម សុខា បានអះអាងថា លោកសម រង្ស៊ី និងបក្ខពួកតែងតែលាបពណ៌លោកកឹម សុខា ជារៀងរហូត ។ លោកមុត ចន្ថា អតីតនាយកខុន្ទកាល័យលោកកឹម សុខា ហើយជាមនុស្សជំនិតលោកកឹម សុខា បានលើកឡើងលើបណ្តាញសង្គម កាលពីថ្ងៃទី២៤ មេសា យ៉ាងដូច្នេះថា« កុំខំតម្លើងតម្លៃខ្លួន» ។
ទោះបីកន្លងមក ជាពិសេសនៅមុនឆ្នាំ២០១២ លោកសម រង្ស៊ី និងក្រុមរបស់គាត់តែងតែលាបពណ៌ ជេរប្រមាថមកលើលោកកឹម សុខា និងអ្នកគាំទ្រនៃគណបក្សសិទ្ធិមនុស្សទោះជាយ៉ាងណាក៏ដោយ ដើម្បីផលប្រយោជន៍ជាតិតាមឆន្ទៈរបស់ប្រជាពលរដ្ឋខ្មែរលោកកឹម សុខា សុខចិត្តរួបរួមជាមួយគណបក្សសម រង្ស៊ី បន្ទាប់ពីលោកសម រង្ស៊ី និងក្រុមរបស់គាត់ដឹងខ្លួនថាគណបក្សសម រង្ស៉ី បច្ចុប្បន្នបក្សភ្លើងទៀនទៅមុខលែងរួចធ្លាក់ចុះបន្ទាប់ពីគណបក្សសិទ្ធិមនុស្សស្ទុះឡើងនៅក្នុងការបោះឆ្នោតឃុំ -សង្កាត់ នៅឆ្នាំ២០១២ ។
លោកបន្តថា ជាការពិតគោលជំហ៊រនយោបាយរបស់លោកកឹម សុខា ដែលលោកតែងតែថ្លែងបញ្ជាក់ជា ច្រើនដងកន្លងមករួចមកហើយគាត់នៅតែរក្សាដដែលនោះ គឺ«គាត់ចង់ឲ្យមានការរួបរួមជាតិទាំងមូលមិនមែនចង់រួបរួមតែជាមួយសម រង្ស៊ីនោះទេ» ។ ក៏ប៉ុន្តែការរួបរួមជាមួយលោកសម រង្ស៊ី នោះគ្រាន់ជាការចាប់ផ្តើមតែប៉ុណ្ណោះ ហើយអ្នកដែលផ្កាប់មុខមិនដឹងខ្យល់អីបង្អាប់ថាកឹម សុខា មានតែ០៣កៅអីទៅសុំចូលគេដែលមាន២៦កៅអីនោះត្រូវសួរទៅលោក សម រង្សី ហេតុម្តេចពីមុនលោកកឹម សុខា បបួលរួបរួម បែរជាប្រមាថលោកកឹម សុខា ហើយបែរក្រោយមកបបួលលោកកឹម សុខា រួបរួមទៅវិញ ?
តើលោកសម រង្ស៊ី ល្ងង់រហូតមិនដឹងថា លេខ២៦ ច្រើនជាងលេខ០៣ មែនទេ ? ឬក៏សម រង្ស៉ី ដឹងថា មាស៣គីឡូក្រាមមានតម្លៃជាងដែក២៦គីឡូក្រាម ។ លោកបណ្ជាក់ថា«ដូចគ្នានឹងបច្ចុប្បន្ននេះដែរលោកសម រង្ស៊ី តែងតែប្រមាថលោកកឹម សុខា ដូចជា យកគាត់ទៅធ្វើជាល្បែងភ្នាល់ធ្វើបក្សប្រហារដែលលោកកឹម សុខា មិនគាំទ្របញ្ចុះតម្លៃលោកកឹម សុខា ថា ជាប់គុកឥតប្រយោជន៍ជាដើម ។ លោកក៏បានដាក់សំណួរថា ចុះហេតុអ្វីបានជាលោកសម រង្ស៊ី នៅតែយកឈ្មោះ និងរូបរបស់លោកកឹម សុខា ទៅភ្ជាប់ជាមួយខ្លួនគាត់ (សម រង្ស៉ី) ហេតុម្តេចមិនផ្តាច់ខ្លួនពីលោកកឹម សុខា បើវាយតម្លៃថា លោកកឹម សុខា ឥតតម្លៃនោះ ? ឬមួយលោក សម រង្ស៉ី ដឹងច្បាស់ថា សហគមន៍អន្តរជាតិមិនខ្វល់ពីគាត់ «សម រង្ស៉ី» ទៀតទេ ព្រោះគេនិយាយតែពីឈ្មោះ«កឹម សុខា» ក្នុងដំណោះស្រាយនយោបាយជាកត្តាចម្បង?
ជាមួយគ្នានោះដែរលោកមុត ចន្ថា ក៏បានស្នើមហាជនពិចារណាផងចុះជាពិសេសអ្នកផ្កាប់មុខ មិនដឹងខ្យល់ ។ លោកមុត ចន្ថា ក៏បានអះអាងជំហររបស់លោកកឹម សុខា ថា លោកកឹម សុខានៅតែប្រាថ្នាបង្រួបបង្រួមជាតិ ។ លោកកឹម សុខា ថ្លែងថា«បើអ្នកប្រមាថខ្ញុំ សុំកុំប្រមាថជាតិខ្ញុំ» ៕
ចែករំលែកព័តមាននេះ