រាជធានីភ្នំពេញ ៖ ខ្សែភ្លើងមួយកន្លែងត្រូវបានរាយគងលើស្លាកប៉ាណូបុរីបណ្តាលឲ្យទុស្សេខ្សែភ្លើងឆេះដូចកាំជ្រួច តែសំណាងល្អប្រជាពលរដ្ឋបានជួយសហការគ្នាយកបំពង់ពន្លត់អគ្គីភ័យមកបាញ់ពន្លត់ទាន់ពេលវេលា បង្កឲ្យមានការភ្ញាក់ផ្អើលនៅវេលាម៉ោង១១និង៤០នាទីយប់ថ្ងៃទី២៣ ខែមេសា ឆ្នាំ២០១៩ នៅតាមបណ្ដោយផ្លូវវេងស្រេងកែងផ្លូវបេតុងបុរី ផុន ស៊ុយ ស្ថិតនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
តាមប្រភពព័ត៌មានពីប្រជាពលរដ្ឋដែលឃើញហេតុការណ៍បានអោយដឹងថា នៅមុនពេលកើតហេតុឃើញខ្សែភ្លើងមួយកន្លែងខាងលើនៅគងលើស្លាកប៉ាណូ (ស្លាកយីហោបុរី ) ផុន ស៊ុយ យ៉ាងរញ៉េរញ៉ៃ និងឃើញមានការទុស្សេខ្សែភ្លើងព្រៀកៗបន្តិចម្តងៗ បន្ទាប់មកដោយផ្ទុះខ្លាំងទៅៗហើយមានអណ្តាតភ្លើងឆាបឆេះខ្សែភ្លើងធ្លាក់លើដំបូលផ្ទះប្រជាពលរដ្ឋ ចំណែកខ្សែភ្លើងវិញបានផ្ទុះដូចកាំជ្រួចផ្កាដូង ។
ប្រភពព័ត៌មានដដែលបានបន្តទៀតថា ខណៈពេលភ្លាមៗនោះដែរខ្សែភ្លើងដែលឆេះដាច់គរលើគ្នាដោយឆាបឆេះយ៉ាងសន្ធោសន្ធៅត្រូវបានប្រជាពលរដ្ឋដែលរស់នៅជិតកន្លែងកើតហេតុនាំគ្នាយកបំពង់ពន្លត់អគ្គីភ័យមកជួយបាញ់ពន្លត់អស់ជាង២០បំពង់ផងដែរ ។
ភ្លាមៗនោះដែរមានសមត្ថកិច្ចមូលដ្ឋានមកជួយអន្តរាគមន៍ភ្លាមៗផងដែរហើយបម្រុងហៅរថយន្តពន្លត់អគ្គីភ័យមកជួយពន្លត់ផងដែរតែប្រជាពលរដ្ឋនាំគ្នាយកបំពង់ពន្លត់អគ្គីភ័យជួយពន្លត់ទាន់ពេលវេលា ចំណែកសមត្ថកិច្ចបានផ្អាកអោយរថយន្តពន្លត់អគ្គីភ័យមិនអោយមកផងដែរ ។ ក្រោយពេលកើតហេតុជំនាញអគ្គិសនីបានមកដល់ និងបានជួសជុលភ្លើងទាំងយប់ភ្លាមៗផងដែរ ៕
ចែករំលែកព័តមាននេះ