រាជធានីភ្នំពេញ ៖ ម៉ូតូរបស់ជនសង្ស័យមួយគ្រឿងត្រូវបានសមត្ថកិច្ចយកទៅរក្សាទុកបន្ទាប់ពីជនសង្ស័យម្នាក់បានជិះទៅធ្វើសកម្មភាពឆក់ទូរស័ព្ទដៃពីនារីជាបុគ្គលិកខារ៉ាអូខេសំរិទ្ធពេជ្រពីរនាក់បានសម្រេច បណ្តាលឲ្យដួលម៉ូតូជនសង្ស័យក៏ងើបរត់ចោលម៉ូតូបាត់ទៅបង្កអោយមានការភ្ញាក់ផ្អើលដល់សមត្ថកិច្ច កាលពីវេលាម៉ោង១១យប់ ថ្ងៃទី២៣ ខែមេសា ឆ្នាំ២០១៩ត្រង់ចំណុចខាងខារ៉ាអូខេប៊េះស្តារ តាមបណ្ដោយផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
ជនរងគ្រោះមានឈ្មោះម៉ៅ ស្រីណាវ ភេទស្រី អាយុ២៩ឆ្នាំ ជាបុគ្គលិកខារ៉ាអូខេសំរិទ្ធពេជ្រ មានស្រុកកំណើតនៅភូមិត្រពាំងត្រាវ ឃុំគោកចក ស្រុកកំពង់ត្របែក ខេត្តកំពង់ចាម ។
តាមប្រភពពីជនរងគ្រោះបានឲ្យដឹងថា នៅមុនពេលកើតហេតុជនរងគ្រោះ និងនារីជាមិត្តភក្តិម្នាក់ទៀតបានជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅ បានជិះដឹកគ្នាចេញពីកន្លែងធ្វើការបម្រុងទៅផ្ទះនៅត្រឡោកបែក ដោយជនរងគ្រោះអង្គុយខាងក្រោយបានធ្វើដំណើរតាមបណ្ដោយផ្លូវ៥៩៨ ក្នុងទិសដៅពីជើងទៅត្បូង ។
លុះមកដល់ចំណុចកើតហេតុក៏ស្រាប់លេចមុខជនសង្ស័យម្នាក់ជិះម៉ូតូមួយគ្រឿងម៉ាកហុងដាប៊ីត ពណ៌សលាយក្រហម ពាក់ស្លាកលេខ ភ្នំពេញ1HE- 0885 ជិះមកពីក្រោយម៉ូតូជនរងគ្រោះ ។ រួចជនសង្ស័យក៏បានធ្វើសកម្មភាពឆក់ទូរសព្ទ័ដៃមួយគ្រឿងពីជនរងគ្រោះដែលកាន់នៅនឹងដៃបណ្តាលឲ្យម៉ូតូរបស់ជនរងគ្រោះ និងជនសង្ស័យដួលទៅលើផ្លូវទាំងពីរគ្រឿង ។
ភ្លាមៗនោះដោយជនសង្ស័យភ័យស្លន់ស្លោក៏ស្ទុះងើបយកទូរស័ព្ទរបស់ជនរងគ្រោះរត់ឡើងជិះម៉ូតូរបស់បក្សពួកមួយគ្រឿងទៀតមិនចាំម៉ាកជិះរត់គេចខ្លួនបាត់ស្រមោល បន្សល់ទុកម៉ូតូមួយគ្រឿងខាងលើនៅកន្លែងកើតហេតុប៉ណ្ណោះ ។ ចំណែកទូរស័ព្ទដៃរបស់ជនរងគ្រោះដែលជនសង្ស័យឆក់យកទៅម៉ាកសាំសុង និងមានលុយជាប់នៅក្នុងសំបកទូរស័ព្ទចំនួន២០ដុល្លារផងដែរ។
ក្រោយកើតហេតុសមត្ថកិច្ចមូលដ្ឋានក៏បានចុះទៅដល់កន្លែងកើតហេតុរួចក៏បាននាំជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលភ្នំពេញថ្មី ។ ចំណែកឯម៉ូតូជនសង្ស័យសមត្ថកិច្ចយកទៅរក្សាទុករង់ចាំធ្វើកាស្រាវជ្រាវចាប់ជនសង្ស័យមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ