រាជធានីភ្នំពេញ ៖ ផ្ទះថ្មមួយល្វែងប្រក់សង្ក័សីដែលម្ចាស់បានទុកចោលអស់រយៈពេលជាច្រើនឆ្នាំត្រូវបានអគ្គិភ័យឆាបឆេះយ៉ាងសន្ធោសន្ធៅបង្កឲ្យមានភ្ញាក់ផ្អើលយ៉ាងខ្លាំង បន្ទាប់ពីជនសង្ស័យម្នាក់បានចូលទៅសង្ងំជក់ថ្នាំញៀននៅខាងក្នុងផ្ទះរហូតវង្វេងស្មារតី (បែកថ្នាំ) ក៏ធ្វើកម្មភាពដុតតែម្តង ។ ហេតុការណ៍នេះបានបង្កឲ្យមានការភ្ញាក់ផ្អើលយ៉ាងខ្លាំង ដល់ប្រជាពលរដ្ឋ សមត្ថកិច្ច និងរថយន្តពន្លត់អគ្គិភ័យ កាលពីវេលាម៉ោង៨យប់ ថ្ងៃទី២២ ខែមេសា ឆ្នាំ២០១៩ត្រង់ចំណុចជាប់ និងគល់ស្ពានអាកាស៥មករា ផ្ទះលេខ១១០ ផ្លូវសហព័ន្ធរុស្ស៊ី ភូមិ៣ សង្កាត់ផ្សារដេប៉ូទី៣ ខណ្ឌទួលគោក ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានផ្សែង និងធំក្លិនឈ្ងៀមចេញមកពីជាន់ទី១ ក្នុងផ្ទះកើតហេតុខាងលើ ។ មួយស្ទុះក្រោយមកក៏ស្រាប់តែលេចចេញជាអណ្ដាតភ្លើងបានឆាបឆេះយ៉ាងសន្ធោសន្ធៅបង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុ និងបានរាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យឲ្យចុះមកជួយអន្តរាគមន៍ ។ ភ្លាមៗនោះក៏ស្រាប់តែលេចមុខជនសង្ស័យម្នាក់បានរត់ចេញមកពីក្នុងផ្ទះកើតហេតុទាំងក្នុងស្ថានភាពស្មារតីវង្វេងវង្វាន់(បែកថ្នាំ) ក៏ត្រូវបានប្រជាពលរដ្ឋដែលរស់នៅក្បែរនោះនាំគ្នាចាប់ឃាត់ខ្លួន និងបានស្វាគមន៍ម្នាក់មួយដៃមួយជើង បណ្តាលឲ្យជនសង្ស័យខាងលើរងរបួសបែកក្បាល។
ប្រភពដដែលបន្តថា បន្ទាប់មកក៏មានសមត្ថកិច្ចមូលដ្ឋាន និងរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញបានចុះមកដល់កន្លែងកើតហេតុចំនួន១៤គ្រឿងបានធ្វើការបាញ់ទឹកពន្លត់អស់ចំនួន៤គ្រឿង ទើបរលត់ទៅវិញជាស្ថាពរ ។ នៅក្នុងហេតុការណ៍អគ្គិភ័យនេះ មិនបង្កឲ្យឆេះរាលដាលដល់ផ្ទះអ្នកជិតខាងនោះទេ គឺឆាបឆេះតែផ្ទះថ្មខាងលើដែលមានទំហំប្រមាណ១៨ម៉ែត្រគុណនឹង៣០ម៉ែត្រ រងការខូចខាតជាន់ទីមួយស្ទើរទាំងស្រុង និងបានបង្កអោយស្ត្រីវ័យចំណាស់ម្នាក់ដែលស្នាក់នៅជាប់ផ្ទះកើតហេតុខាងលើបានសន្លប់ ដោយសារតែឈ្លក់ និងផ្សែង រួចក៏បានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗផងដែរ ។
មូលហេតុជំហានដំបូង គឺសង្ស័យថា មកពីជនសង្ស័យខាងលើដែលមិនស្គាល់ឈ្មោះ ភេទប្រុស អាយុ២៥ឆ្នាំ ជាអ្នកដុតបន្ទាប់ពីជក់ថ្នាំរួច ។ ប្រភពដដែលបានបន្តទៀតថាផ្ទះកើតហេតុខាងលើ គឺត្រូវបានទុកចោលអស់រយៈពេលជាច្រើនឆ្នាំណាស់មកហើយ គឺតាំងតែពីផ្ទះខាងលើមានទ្វារ និងបង្អួចត្រឹមត្រូវ រហូតត្រូវចោរលួចគាស់យកអស់សល់តែសំបកផ្ទះនៅតែមិនឃើញម្ចាស់មកមើលលម្តងសោះ ។ កន្លងមក គឺតែងតែមានជនអនាថាបាននាំគ្នាមកស្នាក់នៅ និងពពាក់ពពូនគ្នាជក់ថ្នាំញៀននៅក្នុងផ្ទះខាងលើជារៀងរាល់ថ្ងៃ ។ កន្លងមកធ្លាប់មានការដុតដូចករណីខាងលើចំនួនពីរទៅបីដងដែរ ប៉ុន្តែក៏ត្រូវបានប្រជាពលរដ្ឋដឹងពន្លត់រលត់វិញទាន់ពេលវេលា ។
ក្រោយពេលកើតជនសង្ស័យខាងលើត្រូវបានសម្ថកិច្ចនាំខ្លួនយកទៅសាកសួរនៅប៉ុស្តិ៍នគរបាលរដ្ឋបាលផ្សារដេប៉ូទី៣ ដើម្បីធ្វើការចាត់ការទៅតាមនីតិវិធីជាបន្តទៀត ៕
ចែករំលែកព័តមាននេះ